យ៉ាងហោចណាស់មនុស្ស ២នាក់បានស្លាប់ និង ៣នាក់ទៀតបានរងរបួសធ្ងន់ និងស្រាល ក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ដែលជំរុញឲ្យចំនួនមនុស្សស្លាប់នៅក្នុងគ្រោះថ្នាក់ចរាចរណ៍នៅក្នុងរយៈពេល ១៧ថ្ងៃខែមីនានេះ កើនឡើងដល់ចំនួន ៩០នាក់។
របាយការណ៍នគរបាលចរាចរណ៍ ដែលផ្សាយនៅលើវេបសាយនគរបាលជាតិកម្ពុជា បានបង្ហាញថា គ្រោះថ្នាក់ចរាចរណ៍ចំនួន ៤ករណីបានកើតឡើងនៅទូទាំងប្រទេសកាលពីថ្ងៃម្សិលមិញនេះ ដោយបានសម្លាប់មនុស្ស ២នាក់ ខណៈមនុស្ស ៣នាក់ទៀតរងរបួសធ្ងន់ និងស្រាល។
របាយការណ៍នេះ បានបន្ថែមទៀតថា គ្រោះថ្នាក់ចរាចរណ៍ពីចន្លោះថ្ងៃទី ១ដល់ថ្ងៃ១៧ ខែមីនាឆ្នាំ ២០១៧ បានកើតឡើងចំនួន ១៦៩ លើកបណ្តាលឱ្យមនុស្សស្លាប់ចំនួន ៩០នាក់ និងរបួសធ្ងន់ស្រាលចំនួន ២២២នាក់៕