ជនជាតិវៀតណាម ២២នាក់ ក្នុងនោះមានទាំងស្ត្រី ១២នាក់ផងដែរ ត្រូវបានសមត្ថកិច្ចកម្ពុជាចាប់ខ្លួន នៅរាជធានីភ្នំពេញ នៅព្រឹកថ្ងៃនេះ ដោយសង្ស័យថា បានស្នាក់នៅ និងប្រកបរបរខុសច្បាប់នៅកម្ពុជា។ នេះបើតាមការចុះផ្សាយរបស់គេហទំព័រនគរបាលជាតិ។
គេហទំព័រនគរបាលជាតិ បានដកស្រង់សម្ដីលោក ជា ចិត្រា នាយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលរាជធានី ដែលបានប្រាប់ថា កម្លាំងនគរបាលរាជធានីភ្នំពេញ បានចុះត្រួតពិនិត្យ និងរកឃើញជនជាតិវៀតណាម ២២នាក់ កាន់កាប់ឯកសារអន្តោប្រវេសន៍ខុសច្បាប់ នៅតាមហាងកាហ្វេ និងហាងម៉ាស្សា ៣កន្លែង ស្ថិតនៅក្នុងខណ្ឌដូនពេញ និងខណ្ឌឫស្សីកែវ។
មន្ត្រីនរគបាលដដែលនេះ បានឲ្យដឹងបន្ថែមថា ជនជាតិវៀតណាម ៣នាក់ ត្រូវបានសមត្ថកិច្ចឃាត់ខ្លួននៅក្នុងខណ្ឌដូនពេញ ខណៈដែល ១៩នាក់ទៀត ត្រូវឃាត់ខ្លួននៅក្នុងខណ្ឌឫស្សីកែវ។
បើមន្ត្រីនគរបាលរូបនេះ ជនជាតិវៀតណាមទាំងនោះ ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ ដោយថា ដើម្បីអនុវត្តទៅតាមនីតិវិធីច្បាប់កម្ពុជា។
បើតាមរបាយការណ៍របស់អគ្គនាយកដ្ឋានអន្តោប្រវេសន៍ បានឲ្យដឹងថា លទ្ធផលនៃការជំរឿនបានរកឃើញថា ជនបរទេសសរុប ៤៦ ៧៧៦គ្រួសារ ឬស្មើនឹងចំនួនមនុស្ស ១៧៦ ៨១២នាក់ ក្នុងភាគច្រើនលើសលប់ជាជនជាតិវៀតណាម កំពុងស្នាក់នៅដោយខុសច្បាប់ក្នុងប្រទេសកម្ពុជា៕