អភិបាលរាជធានី និងខេត្តចំនួន ៤ ត្រូវបានរដ្ឋាភិបាលសម្រេចផ្លាស់ប្ដូរកាលពីថ្ងៃម្សិលមិញនេះ ក្នុងនោះក៏មានស្ត្រីម្នាក់ផងដែរ ដែលនេះគឺជាលើកដំបូងហើយដែលរដ្ឋាភិបាលបានសម្រេចតែងតាំងស្ត្រីជាចៅហ្វាយខេត្ត។
ក្នុងព្រះរាជក្រឹត្យដាច់ដោយឡែកពីគ្នា ប៉ុន្តែ ចុះថ្ងៃទី១៧ ខែមិថុនាដូចគ្នា ព្រះមហាក្សត្រ ព្រះបាទ នរោត្ដម សីហមុនី បានត្រាស់បង្គាប់តែងតាំងអភិបាលរងរាជធានីភ្នំពេញ លោក ឃួង ស្រេង ជាអភិបាលរាជធានីភ្នំពេញ អតីតអភិបាលខណ្ឌដូនពេញ លោក គួច ចំរើន ទៅជាអភិបាលខេត្តកំពង់ចាម អភិបាលរងខេត្តកោះកុង អ្នកស្រី មិថុនា ភូថង ទៅជាអភិបាលខេត្តកោះកុង និងអភិបាលរងខេត្តត្បូងឃ្មុំ លោក លី ឡេង ទៅជាអភិបាលខេត្តត្បូងឃ្មុំ ទៅតាមសំណើរបស់លោកនាយករដ្ឋមន្ត្រី ហ៊ុន សែន។
ក្នុងព្រះរាជក្រឹត្យដាច់ដោយឡែកមួយទៀតចេញផ្សាយកាលពីថ្ងៃម្សិលមិញនេះដែរ អភិបាលរាជធានីភ្នំពេញ លោក ប៉ា សុជាតិវង្ស អភិបាលខេត្តកំពង់ចាម លោក លន់ លឹមថៃ អភិបាលខេត្តត្បូងឃ្មុំ លោក ប្រាជ្ញ ចន្ទ និងអភិបាលខេត្តកោះកុង លោក ប៊ុន លើត ត្រូវបានរដ្ឋាភិបាលសម្រេចតែងតាំងជាទីប្រឹក្សា ដោយមានឋានៈស្មើនឹងរដ្ឋមន្ត្រី។
ក្រោយពីព្រះរាជក្រឹត្យត្រូវបានផ្សព្វផ្សាយជាសាធារណៈរួចមក អ្នកស្រី មិថុនា ភូថង ដែលជាកូនស្រីរបស់អតីតចៅហ្វាយខេត្តកោះកុង លោក យុទ្ធ ភូថង នោះ បានក្លាយជាស្ត្រីកម្ពុជាដំបូងគេ ដែលត្រូវបានរដ្ឋាភិបាលតែងតាំងជាចៅហ្វាយខេត្ត៕