រដ្ឋា​ភិបាល​​គ្រោង​រៀប​ចំ​​ច្បាប់​ស្តី​ពី​​ប្រាក់​​ឈ្នួល​​គោល​​អប្ប​បរមា​ក្នុង​វិស័យ​​កាត់​​ដេរ

ទិដ្ឋភាពនៅក្នុងរោងចក្រកាត់ដេរមួយនៅរាជធានីភ្នំពេញ កាលពីពេលកន្លងទៅ។

រដ្ឋា​ភិបាល​គ្រោង​នឹង​រៀប​ចំការសិក្សាមួយដើម្បីធ្វើសេចក្តីព្រាងច្បាប់​ស្តីពី​ប្រាក់​ឈ្នួលគោល​អប្បបរមា​របស់​កម្មករនិយោជិតក្នុង​វិស័យ​វាយនភណ្ឌ កាត់​ដេរ សម្រាប់​ឆ្នាំ​២០១៧ ដែល​រដ្ឋាភិបាលអះអាង​ថា​ដើម្បីជំរុញកំណែទម្រង់នៃការ​អភិវឌ្ឍការងារនិងបណ្តុះ​បណ្តាល​វិជ្ជា​ជីវៈ។

ក្នុង​សេចក្តីជូន​ដំណឹង​មួយ​របស់​ក្រ​សួង​ការ​ងារនិង​បណ្តុះបណ្តាល​វិជ្ជាជីវៈស្តីពី​លទ្ធផល​សន្និបាតបូក​សរុប​កាងារ​ឆ្នាំ២០១៥និង​ទិសដៅ​ឆ្នាំ២០១៦ ក្រសួងបាន​​បញ្ជាក់​ថា​ទិសដៅ​អនុវត្តក្នុង​ឆ្នាំ​២០១៦ មាន​សកម្ម​ភាព​សំ​​ខាន់ៗ​ចំនួន​១៤ ដែលក្នុង​នោះ​រួមមានបន្ត​ខិត​ខំ​ដក​ហូត​និង​ទប់​ស្កាត់​កម្លាំងពលកម្មកុមារ​ដែល​ធ្វើការ​ក្នុង​ទម្រង់​ធ្ងន់​ធ្ងរ ការ​រៀប​ចំដាក់​ឲ្យ​អនុវត្តរបបធានារ៉ាប់រង​សុខភាពនិងសិក្សារៀប​ចំដាក់​ឲ្យ​ដំណើរការរបបប្រាក់​សោធននិង​ការសិស្សា​រៀប​ចំច្បាប់ស្តីពីប្រាក់​ឈ្នួល​អប្បបរមាជា​ដើម។

ក្រសួង​បាន​បញ្ជាក់​ថា“អនុវត្តកម្មវិធី​សិក្សានិង​ពិភាក្សាកំណត់​ប្រាក់​ឈ្នួល​គោលអប្បបរមាឆ្នាំ២០១៧ សម្រាប់​​កម្មករ​និយោជិតផ្នែក​វាយនភណ្ឌ កាត់​ដេរនិង​ផលិត​ស្បែក​ជើង តាម​លក្ខខណ្ឌវិនិច្ឆ័យ យន្តការ និង​កា​ល​​វិភាគ​ដែល​បាន​កំណត់”។​ ក្នុងឆ្នាំ​២០១៦នេះ ក្រសួង​បាន​ដាក់ទិសដៅសិក្សា​រៀបចំច្បាប់ស្តីពីប្រាក់ឈ្នួលអប្បបរមា។​

អ្នកនាំពាក្យក្រសួងការងារ លោក ហេង សួរ ប្រាប់វីអូឌី(VOD)ថារដ្ឋាភិបាលពិតជាមានផែនការរៀបចំច្បាប់នេះប្រាកដមែន។ លោកបន្ត​ថា​ច្បាប់នេះមិនមានអត្ថន័យអ្វីដែលប្លែក​ខុសអ្វីដែលមានចែងកន្លងមកក្នុង​សេចក្តីប្រកាសរបស់ក្រសួងការងារនិងអនុស​ញ្ញារបស់អង្គការអន្តរជាតិផ្នែកការងារជាដើម។ លោកថា ច្បាប់នេះនឹងមិនកំណត់ពីចំនួនភាគរយនៃទឹកប្រាក់ដែលត្រូវដំឡើងប្រចាំឆ្នាំនោះទេ តែលោកគេត្រូវវិនិច្ឆ័យទៅលើកត្តាសេដ្ឋកិច្ចនិងសង្គមមុននឹងសម្រេចដំឡើងប្រាក់ឈ្នួលគោល។ លោកឲ្យដឹងដែរថាការចរចាររវាងសហជីពនិងនិយោជកនៅតែបន្តមានដដែល។

លោកបន្ថែមថា៖ “មិនមែនអ្វីដែលប្លែកគ្នាទេត្រង់ថាយន្តការដែលមាននៅក្នុងអនុក្រឹត្យបច្ចុប្បន្ននេះ ក៏ដូចជាមាននៅក្នុងប្រកាសនេះ នឹងប្រែក្លាយជាមាត្រាផ្សេងៗនៅក្នុងច្បាប់…ប៉ុន្តែជាលិខិតជាទម្រង់បទដ្ឋានគតិ​យុត្តិ កាលណាយើងរុញវាទៅជាច្បាប់គឺយើងមានបទដ្ឋានមួយខ្ពស់ជាងការអនុវត្តរាល់ថ្ងៃនេះ ដែលយើងហៅថាការអនុវត្តតាមទម្លាប់​ ត្រឹមប្រកាសដែលវាមិនមែនទម្ងន់”។

ប្រធានសហភាពការងារកម្ពុជា លោក អាត់ ធន់ មានប្រសាសន៍ថាលោកគាំទ្រឲ្យមានបង្កើតច្បាប់នេះ ដែលលោកថាអាចជួយកាត់បន្ថយជម្លោះនៅពេលមានការចរចាប្រាក់ឈ្នួលគោលអប្បបរមារវាងនិយោ​ជកនិងតំណាងកម្មករ។ លោកបន្ថែមថា៖ “វាចៀសមិនផុតទេជម្លោះនៅនៅតែមាន ប៉ុន្តែគ្រាន់តែថាវាកាត់បន្ថយ បើកាលណាវាមានគោលការណ៍ទៅវាកាត់បន្ថយហើយ កាលណាយើងអត់មានគោលការណ៍យើងមានជម្លើច្រើន”។ ទោះយ៉ាងណា លោក អាត់ ធន់ ស្នើឲ្យក្រសួងបើកឲ្យមានការចូលរួមជជែកពិភាក្សាឲ្យបានទូលំទូលាយពីភាគីពាក់ព័ន្ធលើសេចក្តីព្រាងច្បាប់ដែលអាចនឹងមាននេះ។

ទិដ្ឋភាព​នៅក្នុងរោងចក្រកាត់ដេរមួយនៅរាជធានីភ្នំពេញ​
ទិដ្ឋភាព​នៅក្នុងរោងចក្រកាត់ដេរមួយនៅរាជធានីភ្នំពេញ​

អគ្គលេខាធិការ​សមាគមរោងចក្រកាត់ដេរ​នៅកម្ពុជា(GMAC) លោក ខេន លូ ប្រាប់វីអូឌីថា​ច្បាប់ស្តីពីប្រាក់ឈ្នួលនេះល្អសម្រាប់​ថោកែរោងចក្រនិងកម្មករ ដោយ​លោក​បញ្ជាក់ថា​វា​នឹង​បញ្ច្រៀស​ជម្លោះក្នុងការ​ចរចា​លើ​ប្រាក់ឈ្នួល។ លោក​ស្នើ​ឲ្យសិក្សា​ល្អិតល្អន់​ពី​ស្ថានភាពសេដ្ឋកិច្ចពិភពលោក​ តំបន់​ និង​ផលិត​ភាព​​របស់កម្មករ​ មុន​នឹងកំណត់តួលេខណាមួយ។​

គួរបញ្ជាក់​ថាប្រាក់​ឈ្នួលគោល​អប្បបរមារបស់​កម្មករនិយោជក​ក្នុង​វិស័យ​កាត់​ដេរនិង​ផលិត​ស្បែក​ជើងបច្ចុប្បន្ន​​មាន​ចំនួន​១៤០​ដុល្លារ កើន​ឡើង​ឆ្នាំ២០១៤ ចំនួន​១២​ដុល្លារ តាមរយៈ​ការ​ចរចា​ត្រីភាគីវាងនិយោជក សហជីព និង​ក្រ​សួងការងារ។

ក្នុងការ​ចរចាពីការដំឡើងប្រាក់ឈ្នួលកន្លងទៅ សហជីព​ តំណាងថៅកៅរោងចក្រ ក្រុមប្រឹក្សាការងារ តែ​ងតែ​មានការខ្វែងគំនិតគ្នា​លើ​ការដំឡើង​ប្រាក់ឈ្នួលរបស់កម្មករ។ ភាគីរោងចក្រ​តែ​ងតែចង់ឲ្យមានការដំឡើង​តិច​ ចំណែក​សហជីពវិញ​​តែង​តែចង់ឲ្យ​មាន​ការដំឡើងច្រើន។​ បញ្ហានេះ​ពេលខ្លះអាច​នាំ​ឲ្យ​មានការ​តវ៉ារបស់កម្មករនៅពេលដែល​ពួកគេមិនពេញចិត្ត​នឹង​ការ​ដំឡើងនេះ។​

បើ​តាម​ក្រ​សួង​ការងារ កម្មករ​ម្នាក់​អាច​រក​ប្រាក់​ចំណូល​ពី​វិស័យ​នេះ​បាន​ចន្លោះពី១៥៧ដុល្លារទៅ​១៦៨​ដុល្លា​រក្នុង​​១ខែដោយ​បូក​បន្ថែម​ទាំង​អត្ថប្រយោជន៍​ផ្សេងៗទៀត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ