អាជ្ញាធរកម្ពុជា បានបញ្ជាទៅមន្ត្រីតាមច្រកព្រំដែន ឲ្យបង្កើនការរឹតបន្តឹងបន្ថែមទៀតនៅលើទំនិញនាំចូលពីវៀតណាម ជាពិសេស កាហ្វេ បន្ទាប់ពីសារព័ត៌មានបានចុះផ្សាយថា អាជ្ញាធរវៀតណាមបានរកឃើញ និងបញ្ឈប់សិប្បកម្មផលិតកាហ្វែក្លែងក្លាយមួយ នៅភាគកណ្ដាលប្រទេសនេះ។
សារព័ត៌មាននានារបស់វៀតណាម បានចុះផ្សាយថា អាជ្ញាធរខេត្តដាណុង បានចុះត្រួតពិនិត្យសិប្បកម្មផលិតកាហ្វេមួយ ដោយបានរកឃើញថា សិប្បកម្មនោះបានផលិតកាហ្វេលាយជាមួយកាកសំណល់ថ្មពិល ដី និងកម្ទេចថ្ម ដែលបញ្ហានេះជំរុញឲ្យមានក្ដីបារម្ភនៅក្នុងចំណោមអ្នកប្រើប្រាស់កម្ពុជាផងដែរ ខណៈដែលវៀតណាម គឺជាអ្នកនាំចេញកាហ្វេធំលំដាប់ទីពីរ នៅក្នុងចំណោមប្រទេសនាំចេញកាហ្វេទៅកាន់ទីផ្សារពិភពលោក។
អគ្គនាយករង នៃអគ្គនាយកដ្ឋានកាំកុងត្រូល លោក ឌឹម ថេង បានប្រាប់វីអូឌីនៅព្រឹកថ្ងៃនេះថា ស្ថាប័នលោកបានដាក់បញ្ជាទៅកាន់មន្ត្រីកាំកុងត្រូលនៅតាមព្រំដែនកម្ពុជា-វៀតណាមរួចហើយ ដោយថា ដើម្បីត្រួតពិនិត្យបន្ថែមទៀតទៅលើការនាំចូលទំនិញកាហ្វេពីប្រទេសវៀតណាម។ លោកអះអាងបន្ថែមថា កាហ្វេដែលផលិតលាយឡំជាមួយកាកសំណល់ពុលទាំងនោះ មិនត្រូវបាននាំចូល និងចែកចាយនៅលើទីផ្សារកម្ពុជានោះទេ។
លោកថា៖ «យើងអាចទប់ស្កាត់បាននូវទំនិញទាំងអស់នោះ មិនឲ្យចូលមកកម្ពុជានោះទេ។ ដូចខ្ញុំបានជម្រាបប្អូនហើយថា កន្លងមកក៏មានការចាប់កាហ្វេដែលមានការសហការជាមួយប៉ូលីសប្រឆាំងបទល្មើសសេដ្ឋកិច្ច និងស្ថាប័នពាក់ព័ន្ធហ្នឹងចាប់កាហ្វេដែលមិនមានច្បាប់អនុញ្ញាត្តិហ្នឹង ហើយចាប់ពីពេលហ្នឹងមក យើងឃើញថា ចំពោះកាហ្វេ គឺប្រជាជនយើងយកចិត្តទុកដាក់ដែលធ្វើឲ្យប៉ះពាល់ច្រើនដែរប្អូន។ និយាយឲ្យចំទៅ កាំកុងត្រូលរកអត់ទាន់ឃើញ តែយើងមានវិធានការទប់ស្កាត់»។
បើតាមសារព័ត៌មានវៀតណាម Tuoi Tre News ម្ចាស់អាជីវកម្មកាហ្វេមានលាយកំទេចថ្មពិលនោះ បានបើកអាជីវកម្មជាងមួយឆ្នាំហើយ និងបានលក់កាហ្វេនេះទៅកាន់ទីផ្សារជាង ៣តោនរួចទៅហើយតាំងពីដើមឆ្នាំ២០១៨នេះ។
ប្រធានសហព័ន្ធសហជីពកម្មករចំណីអាហារ លោក ស ម៉ូរ៉ា បានសាទរចំពោះចំណាត់ការរបស់អគ្គនាយកដ្ឋានកាំកុងត្រូលកម្ពុជា ប៉ុន្តែ លោកថា រដ្ឋាភិបាលគួរបញ្ចេញថវិការបន្ថែមទៀត ដើម្បីបង្កើនប្រសិទ្ធិភាពការងាររបស់កាំកុងត្រូល ជាពិសេស អាជ្ញាធរមូលដ្ឋានត្រូវដើរតួនាទីយ៉ាងសំខាន់ចំពោះកិច្ចការពារសុខភាពប្រជាពលរដ្ឋនេះ។
លោកថា៖ « ខ្ញុំគិតថា ជារឿងសំខាន់ដែលរដ្ឋាភិបាលគួរយកចិត្តទុកដាក់បន្ថែមទៀត ចំពោះការពិនិត្យទៅលើទំនិញដែលនាំចូលហ្នឹងទៅលើគុណភាព ហើយសង្ឃឹមថា មិនមានបញ្ហាពុករលួយដែលធ្វើឲ្យខ្វះចន្លោះក្នុងការនាំចូលផលិតផលចូលស្រុកខ្មែរយើងហ្នឹង» ។
តួលេខពីក្រសួងកសិកម្ម និងអភិវឌ្ឍន៍ជនបទវៀតណាម បានឲ្យដឹងថា ប្រទេសនេះបាននាំចេញផលិតកាហ្វេចម្រាញ់ដល់ទៅជាង ១លាន ៥៩ម៉ឺនតោន ទៅកាន់ទីផ្សារអន្តរជាតិ កាលពីឆ្នាំ២០១៧កន្លងមកនេះ ដែលធ្វើឲ្យវៀតណាមកាន់កាប់ចំណែកទីផ្សារកាហ្វេពិភពលោកដល់ទៅ ២០ភាគរយ ហើយប្រទេសនេះរំពឹងថា ទំហំនៃការនាំចេញផលិតផលកាហ្វេ នឹងកើនឡើងថែមទៀតនៅក្នុងឆ្នាំ២០១៨នេះ។
តួលេខរដ្ឋាភិបាលវៀតណាម ក៏បានបង្ហាញផងដែរថា ប្រទេសនេះនាំចូលគ្រាប់កាហ្វេឆៅពីបណ្ដាជិតខាងខ្លួន ក្នុងនោះនាំចូលពីកម្ពុជាក្នុងចំនួនរាប់ពាន់តោនកាលពីឆ្នាំកន្លងមកនេះ។
ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម លោក គង់ ភាជ ប្រាប់វីអូឌីតាមទូរស័ព្ទថា លោកពុំមានរបាយការណ៍ស្តីពីការនាំចេញ នាំចូលផលិតផលកាហ្វេមកកម្ពុជានោះទេ ខណៈលោកមិនទាន់ទទួលព័ត៌មានពីកាហ្វេមានលាយកំទេចថ្មពិលរបស់វៀតណាមនេះនៅឡើយ។
លោកថា៖ «យើងមានតែកាហ្វេថៃ កាហ្វេដូចជាអាម៉ាហ្សូនហ្នឹង ជាកាហ្វេដែលគេនាំមកតែម្តង។ ដោយឡែក កាហ្វេវៀតណាមមានតែឆុងបន្តិចបន្តួចទៅតាមរោង និយាយទៅតាមលក្ខខណៈតូចតាច មិនមែនជាហាងធំដុំ ហើយភាគច្រើនទៅទៀត ហាងរបស់យើងមួយចំនួន គឺយើងលីងកាហ្វេខ្លួនយើងដែរ។ អាហ្នឹងតាមអ្វីដែលយើងកត់សម្គាល់»។
តួលេខពីក្រសួងពាណិជ្ជកម្មកម្ពុជាកាលពី ៣ឆ្នាំមុន បង្ហាញថា បើទោះបីជាកម្ពុជាជាប្រទេសដាំកាហ្វេនាំចេញក៏ដោយ ប៉ុន្តែ តម្លៃនៃការនាំចេញកាហ្វេទៅបរទេសមានត្រឹមតែជាង ៧ម៉ឺនដុល្លារប៉ុណ្ណោះ ខណៈដែលទំហំនៃការនាំចូលកាហ្វេពីបរទេសវិញ មានតម្លៃដល់ទៅជាង ៨លានដុល្លារឯណោះ៕