ក្រសួងកសិកម្មរុក្ខាប្រមាញ់ និង នេសាទបានបកស្រាយថាក្រុមហ៊ុនវៀតណាមគ្រាន់តែចង់វៀបចំឲ្យពលរដ្ឋខ្មែរមានការដាំដុះតាមបទដ្ឋានបច្ចេកទេសសមស្រប ពូជមានទិន្នផលខ្ពស់ ហើយក្រុមហ៊ុនប្រមូលទិញវិញដើម្បីផ្គត់ផ្គង់តម្រូវការទីផ្សារកម្ពុជា។
ក្រសួងកសិកម្មបានលើកឡើងបែបនេះក្នុងសេចក្ដីប្រកាសព័ត៌មានមួយចុះថ្ងៃទី ១៨ ខែ ឧសភា ដោយឆ្លើយតបទៅនឹងការរិៈគន់ និងការព្រួយបារម្ភរបស់អ្នកឃ្លាំមើលបញ្ហាសង្គមមួយចំនួន ជុំវិញករណីក្រុមហ៊ុនវៀតណាមគ្រោងបោះទុនវិនិយោគដាំបន្លែ ផ្លែឈើ ដើម្បីនាំចេញ និង ផ្គត់ផ្គង់សណ្ឋាគារ និង កន្លែងលំហែកាយរបស់វៀតណាមនៅកម្ពុជា និងនៅប្រទេសវៀតណាម។
ក្នុងសេចក្ដីប្រកាសព័ត៌មានក្រសួងបានលើកឡើងថាអ្នកវិនិយោគវៀតណាមគ្រាន់តែបង្ហាញពី គោលបំណងនៃការបោះទុនវិនិយោគលើវិស័យកសិកម្មផ្នែកដំណាំស្បៀងសុវត្ថិភាពតែប៉ុណ្ណោះ ហើយបើគម្រោងនេះដំណើរការក្រុមហ៊ុននឹងសហការជាមួយកសិករដាំបន្លែ ផ្លែឈើ រួមទាំងសហគមន៍កសិកម្ម ដោយអនុវត្តផលិតកម្មកសិកម្មតាមកិច្ចសន្យា ដើម្បីផលិតតាមគោលការណ៍កសិកម្មសរីរាង្គ ឬការអនុវត្តកសិកម្មល្អ (Good Agricultural Practice-GAP)។
សេចក្ដីប្រកាសព័ត៌មានដដែលក្រសួងបន្តថាក្រុមហ៊ុននឹងរៀបចំកសិដ្ឋានដាំដុះគំរូ ដើម្បីបង្ហាញឲ្យកសិករធ្វើការដាំដុះតាមបទដ្ឋានបច្ចេកទេសសមស្រប ពូជមានទិន្នផលខ្ពស់ និង ក្រុមហ៊ុននឹងប្រមូលទិញមកវិញ ដើម្បីផ្គត់ផ្គង់តម្រូវការទីផ្សារ សណ្ឋាគារ កន្លែងកំសាន្ត ទាំងនៅកម្ពុជា និង នៅប្រទេសវៀតណាម។
ជាមួយគ្នានោះក្រសួងក៏លើកឡើងដែរថាគម្រោងវិនិយោគនេះមិនទាន់ដំណើរការនោះឡើយទេ ព្រោះអ្នកវិនិយោគវៀតណាមមិនទាន់បានធ្វើការសិក្សាច្បាស់លាស់ ដើម្បីដាក់សំណើរទៅរដ្ឋាភិបាល ឲ្យពិនិត្យពីផលប៉ះពាល់ ឬអនុញ្ញាតឲ្យវិនិយោគនៅឡើយ។
បន្ថែមលើនោះក្រសួងក៏ជំរុញឲ្យពលរដ្ឋមានការជឿជាក់លើរដ្ឋាភិបាលក្នុងការគ្រប់គ្រងការវិនិយោគមួយនេះផងដែរ៕