ទីភ្នាក់ងារព័ត៌មានអន្តរជាតិ បានចុះផ្សាយថា មេដឹកនាំអាមេរិកបានគំរាមដាក់ពន្ធគយបន្ថែមទៀតទៅលើទំនិញនាំចូលពីចិន ដែលជំរុញឲ្យសង្គ្រាមពាណិជ្ជកម្មរវាងអាមេរិក និងចិន កាន់តែតានតឹងថែមទៀត។
រដ្ឋបាលប្រធានាធិបតីអាមេរិក ដូណាល់ ត្រាំ បានដាក់រួចមកហើយនូវពន្ធគយទៅលើទំនិញនាំចូលពីចិនមានតម្លៃ ៥០ពាន់លានដុល្លារ ដែលនាំឲ្យចិនបញ្ចេញប្រតិកម្មតបវិញជាមួយការកំណត់យកពន្ធគយលើទំនិញនាំចូលពីអាមេរិកមានតម្លៃប្រហាក់ប្រហែលនឹង ៥០ពាន់លានដុល្លារផងដែរ។
ខណៈដែលចិនសងសឹកត្រឡប់មកវិញនោះ ទីភ្នាក់ងារព័ត៌មានរ៉យទ័រ បានដកស្រង់សម្ដីលោក ត្រាំ ដែលបានគំរាមថា នឹងបញ្ចេញផែនការផ្សេងទៀត ដើម្បីកំណត់យកពន្ធគយ ១០ភាគរយទៅលើទំនិញចិនដទៃទៀតមានតម្លៃដល់ទៅ ២០០ពាន់លានដុល្លារ។
លោក ត្រាំ ត្រូវបានដកស្រង់សម្ដីដែលនិយាយថា រដ្ឋបាលរបស់លោកនឹងចាត់វិធានការបន្ថែមទៀត ដើម្បីជំរុញចិនឲ្យផ្លាស់ប្ដូរការអនុវត្តពាណិជ្ជកម្មដោយមិនស្មើភាព បើកទីផ្សារសម្រាប់ទំនិញអាមេរិក និងទទួលយកទំនាក់ទំនងពាណិជ្ជកម្មកាន់តែមានតុល្យភាពនឹងគ្នា។
ប្រឈមមុខនឹងសំឡេងគំរាមបែបនេះ ក្រុងប៉េកាំងក៏បានបន្តប្រតិកម្មតបមកវិញទៀត ដោយប្រកាសថា នឹងចាត់វិធានការទាំងបរិមាណ និងគុណភាព ប្រសិនបើអាមេរិកកំណត់ពន្ធគយបន្ថែមទៀតទៅលើទំនិញរបស់ចិននោះ។
ក្រសួងពាណិជ្ជកម្មចិនត្រូវបានរ៉យទ័រដកស្រង់សម្ដីដែលនិយាយក្នុងសេចក្ដីប្រកាសរបស់ខ្លួនថា សម្ពាធដ៏ជ្រុលបែបនេះរបស់អាមេរិក បានឃ្លាតឆ្លាយពីអ្វីដែលភាគីទាំងពីរបានព្រមព្រៀងគ្នាជាច្រើនលើកច្រើនសារមកហើយនោះ ហើយធ្វើឲ្យសហគមន៍អន្តរជាតិខកចិត្ត។
អាមេរិក និងចិន បានឈានដល់ភាពតានតឹងផ្នែកពាណិជ្ជកម្មនឹងគ្នា បន្ទាប់ពីអាមេរិកបានប្រកាសកំណត់ពន្ធគយលើទំនិញនាំចូលពីចិនមានតម្លៃ ៥០ពាន់លានដុល្លារ ដែលវិធានការថ្មីនេះ នឹងចាប់ផ្ដើមអនុវត្តចាប់ពីខែក្រោយនេះ។
សង្គ្រាមពាណិជ្ជកម្មកាន់តែរីកធំរវាងអាមេរិក និងចិននេះ បានជំរុញឲ្យក្រុមអ្នកវិភាគហិរញ្ញវត្ថុអន្តរជាតិមានក្ដីបារម្ភថា វានឹងរីករាលដាលទៅជាសង្គ្រាមពាណិជ្ជកម្មទាំងមូល និងមានការរឹតបណ្ដឹងដាក់គ្នាទៅវិញទៅមកបន្ថែមទៀតរហូតដល់បញ្ហាផ្ទុះទៅហួសពីការគ្រប់គ្រង៕
