មេដឹកនាំដឹកនាំគណបក្សប្រឆាំងលោក សម រង្ស៊ី នៅរសៀលថ្ងៃអង្គារនេះបានបកស្រាយពន្យល់ថាការអំពាវនាវរបស់លោកឲ្យអឺរ៉ុបបិទការនាំចូលទំនិញពីប្រទេសកម្ពុជា គឺដើម្បីជំរុញឲ្យមេដឹកនាំកម្ពុជាបច្ចុប្បន្នចេះកែខ្លួននិងដើម្បីឲ្យកម្មករមានការងារកាន់តែច្រើននិងទទួលបានប្រាក់ខែកាន់តែច្រើនថែមទៀត។
នៅក្នុងបទអន្តរាគមន៍មួយនៅក្នុងសភាអឺរ៉ុបកាលពីថ្ងៃទី១៣ ខែកក្កដាកន្លងមក ប្រធានគណបក្សសង្គ្រោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេសនោះបានអំពាវនាវឲ្យអឺរ៉ុបបិទការនាំចូលទំនិញវាយណភណ្ឌពីកម្ពុជានិងថាអាចបើកឲ្យនាំចូលវិញបានលុះត្រាតែមានលក្ខខណ្ឌនយោបាយណាមួយ។
ប៉ុន្តែរដ្ឋលេខាធិការក្រសួងការបរទេសកម្ពុជាលោក អ៊ូច បូរិទ្ធិ និងមេដឹកនាំសហជីពលោក ប៉ាវ ស៊ីណា រិះគន់ថា ការអំពាវនាវរបស់លោក សម រង្ស៊ី នឹងធ្វើឲ្យប្រទេសកម្ពុជាខាតបង់ប្រយោជន៍ ហើយកម្មករ-កម្មការិនីរាប់សែននាក់នឹងបាត់បង់ការងារ។
ទោះជាយ៉ាងណាលោក សម រង្ស៊ី បានបង្ហោះសារនៅលើហ្វេសប៊ុករបស់លោកនៅរសៀលថ្ងៃអង្គារនេះ ដោយបានសេរសេរថា៖ «ពេលស្នើឲ្យដាក់លក្ខខណ្ឌចំពោះជំនួយអន្តរជាតិឬចំពោះការបើកទីផ្សារនៅបរទេសរបស់ខ្ញុំ គឺចង់ឲ្យមេដឹកនាំប្រទេសកម្ពុជាសព្វថ្ងៃចេះកែខ្លួនដើម្បីជម្រើសទី១»។
លោកបានពន្យល់បន្ថែមថា ជម្រើសទី១គឺបញ្ឈប់ការគាប់សង្កត់លើប្រជាពលរដ្ឋ បញ្ឈប់ការរំលោភសិទ្ធិមនុស្សហើយងាកទៅគោរពលទ្ធិប្រជាធិបតេយ្យ។
នៅព្រឹកថ្ងៃនេះតំណាងរាស្ត្រគណបក្សសង្គ្រោះជាតិលោក អេង ឆៃអ៊ាង ក៏បានថ្លែងការពារជំហររបស់លោក សម រង្ស៊ី ផងដែរ ដោយលោកបញ្ជាក់ប្រាប់អ្នកគាំទ្រថា លោក សម រង្ស៊ី មិនចង់ឲ្យកម្មករខ្មែរវេទនានោះឡើយ ផ្ទុយទៅវិញលោក សម រង្ស៊ី ចង់ឲ្យកម្មករខ្មែរមានប្រាក់ខែគ្រប់គ្រាន់និងធ្វើការតាមច្បាប់ទម្លាប់ត្រឹមត្រូវ៕