អភិបាលឧត្តរមានជ័យ បានដាក់បញ្ជាឲ្យមន្ត្រីថ្នាក់ក្រោមបង្ក្រាប ឈ្មួញជួញឈើពីររូបនៅស្រុកត្រពាំងប្រាសាទ ដែលរងការចោទថា កំពុងធ្វើសកម្មភាពប្រមូលទិញឈើខុសច្បាប់ជាទ្រង់ទ្រាយធំ។
អភិបាលខេត្តឧត្តរមានជ័យ លោក ស ថាវី បានបញ្ជាឲ្យប្រធានមន្ទីរ កសិកម្មខេត្ត ព្រមទាំងកងកម្លាំងពាក់ព័ន្ធសហការគ្នា បង្ក្រាបឈ្មួញឈើឈ្មោះ ឆាយ និងម្នាក់ទៀត ឈ្មោះ រិទ្ធដែលជាឈ្មួញដឹកឈើទ្រង់ទ្រាយធំច្រើនឆ្នាំមកនេះ នៅក្នុងស្រុកត្រពាំងប្រាសាទ។ នេះយោងតាមហ្វេសប៊ុកអគ្គស្នងការដ្ឋាននគរបាលជាតិបានចុះផ្សាយនៅថ្ងៃសៅរ៍នេះ។
ប្រភពដដែលបានឲ្យដឹងទៀតថា ឈ្មួញឈើធំៗទាំងនេះ បានប្រមូលទិញឈើខុសច្បាប់ពីឈ្មួញកណ្តាលផ្សេងៗទៀត ដើម្បីស្តុកទុក ហើយបានដឹកជញ្ជូនយកទៅលក់បន្តនៅតាមបណ្តាស្រុកនិង ខេត្តផ្សេងៗទៀតដូចជា នៅបន្ទាយមានជ័យ និង ខេត្តសៀមរាប។
កាលពីដើមខែកក្កដា កន្លងទៅ ប្រជាពលរដ្ឋនិងអាជ្ញាធរថ្នាក់ក្រោម ក៏ធ្លាប់បានរិះគន់ដល់សមត្ថកិច្ចថ្នាក់លើដែរថា មិនបានចាត់វិធានការលើឈ្មួញឈើឈ្មោះឆាយ ដែលបណ្តោយឲ្យការដឹកជញ្ជូនឈើរបស់ឈ្មួញនេះ បណ្តាលឲ្យខូចផ្លូវធ្វើដំណើររបស់ប្រជាពលរដ្ឋទូទៅ។
ហូរ តុងហាន់
