រដ្ឋាភិបាលបានសម្រេចកំណត់យកថ្ងៃទី២០ ខែឧសភា ជាថ្ងៃឈប់សម្រាកបុណ្យជាតិមួយថ្ងៃទៀតដោយថា ដើម្បីរំឭកដល់ជនរងគ្រោះ និងការឈឺចាប់របស់ប្រជាជនកម្ពុជាដែលកើតឡើងក្នុងរបបខ្មែរក្រហម។
ក្នុងសេចក្តីសម្រេចចុះថ្ងៃទី១៤ កុម្ភៈលោកនាយករដ្ឋមន្ត្រី ហ៊ុន សែន បានសម្រេចកំណត់យកថ្ងៃ២០ ឧសភា រៀងរាល់ឆ្នាំជា «ទិវាជាតិនៃការចងចាំ» ដោយបានកំណត់យកជាថ្ងៃឈប់សម្រាកជាសាធារណៈ ដើម្បីរំឭកដល់ជនរងគ្រោះដែលបានស្លាប់ រួមទាំងប៉ះប៉ូវផ្លូវចិត្ត និងផ្នែកសង្គមដល់អ្នកដែលឆ្លងកាត់សម័យនោះ ចូលរួមផ្សះផ្សាជាតិ និងលើកកម្ពស់ការផ្សព្វផ្សាយ និងយល់ដឹងពីអំពើដែលកើតមានក្នុងរបបខ្មែរក្រហម។
គួររំលឹកផងដែរថាទិវាចងចាំ២០ឧសភា កន្លងទៅត្រូវបានគេហៅថា ទិវាចងកំហឹង។ ទិវានេះត្រូវបានសភានៃសាធារណរដ្ឋប្រជាមានិតកម្ពុជានៅឆ្នាំ១៩៨៣កំណត់យកជាថ្ងៃចងកំហឹងទៅនិងរបបខ្មែរក្រហមដែលបានធ្វើទុក្ខបុកម្នេញកាប់សម្លាប់ប្រជាពលរដ្ឋរាប់លាននាក់។
ទោះជាយ៉ាងណាទិវានេះទើបតែត្រូវបានដាក់បញ្ជូលជាថ្ងៃឈប់សម្រាកសាធារណៈនៅពេលនេះ ដែលធ្វើឲ្យថ្ងៃឈប់សម្រាកសាធារណៈនៅកម្ពុជាកើនដល់ចំនួន ២៨ថ្ងៃ។
របបកម្ពុជាប្រជាធិបតេយ្យ ខ្មែរក្រហមបានកំណត់យកថ្ងៃទី២០ ឧសភា ឆ្នាំ១៩៧៣ គឺជាថ្ងៃកំណើតរបស់ សហករណ៍ខ្លួន នឹងបានបន្តសង្គ្រាមរហូតដល់ឈានដល់ការគ្រប់គ្រងទីក្រុងភ្នំពេញឆ្នាំ១៩៧៥៕