មូលនិធិរូបិយវត្ថុអន្តរជាតិ ហៅកាត់ថា IMF បានបង្ហាញក្ដីបារម្ភពីស្ថានភាពមិនប្រាកដប្រជានៃនយោបាយកម្ពុជា និងហានិភ័យនៃម៉ាក្រូហិរញ្ញវត្ថុ ដោយថា អាចប៉ះពាល់ទំនុកចិត្តអតិថិជន និងអ្នកវិនិយោគ។
ក្នុងសេចក្តីប្រកាសរបស់ IMF ចេញផ្សាយកាលពីថ្ងៃទី១៧ ខែមីនា បន្ទាប់ពីក្រុមការងាររបស់ IMF ដែលដឹកនាំដោយលោក Jarkko Turunen បានបញ្ចប់ដំណើរទស្សនកិច្ចនៅកម្ពុជានោះ បានវាយតម្លៃថា ស្ថានភាពសេដ្ឋកិច្ចកម្ពុជានៅតែរក្សាបានកំណើនខ្ពស់ប្រមាណជា៧ភាគរយ ហើយសេដ្ឋកិច្ចនៅតែមានភាពវិជ្ជមានដដែល។
ប៉ុន្តែ លោកបានព្រួយបារម្ភអំពីហានិភ័យនៃស្ថានភាពរបស់ម៉ាក្រូហិរញ្ញវត្ថុ និងភាពមិនប្រាកដប្រជានៃស្ថានភាពនយោបាយ ដែលលោកយល់ថា អាចនឹងជះឥទ្ធិពលដល់ទំនុកចិត្តរបស់អតិថិជន និងអ្នកវិនិយោគមកកម្ពុជា។
លោកបានឲ្យជាយោបល់ថា រដ្ឋាភិបាលគួរធានាឲ្យមានគោលនយោបាយគ្រប់គ្រងហានិភ័យម៉ាក្រូសេដ្ឋកិច្ចឲ្យបានល្អ ដោយការពារនិរន្តភាពនៃសារពើពន្ធ និងការធ្វើកំណែទម្រង់ ដើម្បីជំរុញកំណើនភាពរឹងមាំ និងទំនុកចិត្ត។
អគ្គនាយកនៃអគ្គនាយកដ្ឋានគោលនយោបាយសេដ្ឋកិច្ច និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ លោក ទេព ភិយោរិន មិនទាន់បានឃើញរបាយការណ៍វាយតម្លៃរបស់ IMF នេះនៅឡើយទេ។
លោកថា៖ «ការវាយតម្លៃជារួមដែលថា IMF គាត់ដាក់ហ្នឹងដូចជាត្រឹមត្រូវរបស់គាត់ហើយ ក្នុងសេចក្តីថ្លែងការណ៍របស់គាត់។ តែចំពោះការយោបល់ពីរឿងហ្នឹង(ការបារម្ភរបស់ IMF ទៅលើបញ្ហានយោបាយ និងម៉ាក្រូសេដ្ឋកិច្ច) ខ្ញុំអត់បានមើលពីរឿងហ្នឹងដែរ គាត់ដាក់ចូលក្នុងហ្នឹងអញ្ចឹង ខ្ញុំពិបាកផ្តល់ព័ត៌មាន»។
អ្នកជំនាញផ្នែកសេដ្ឋកិច្ច លោក ង៉ែត ជូ បានបង្ហាញឯកភាពចំពោះការលើកឡើងរបស់ស្ថាប័ន IMF នេះ ដោយថា ស្ថានភាពនយោបាយបច្ចុប្បន្ននេះ អាចនឹងធ្វើឲ្យវិស័យជាច្រើនរងផលប៉ះពាល់ ប្រសិនជាមានទណ្ឌកម្មពីអន្តរជាតិ។ លោកបន្ថែមថា ក្នុងស្ថានភាពនេះ កម្ពុជាគួរមានគោលនយោបាយគ្រប់គ្រងហានិភ័យនៃម៉ាក្រូសេដ្ឋកិច្ចឲ្យបានច្បាស់លាស់។
លោកថា៖ «យើងដឹងហើយថា យើងកំពុងប្រឈមមុខជាមួយនឹងការអំពាវនាវរបស់សភាសហភាពអឺរ៉ុប ឲ្យសហភាពអឺរ៉ុបហ្នឹងពិចារណាឡើងវិញទាក់ទងជាមួយនឹងប្រព័ន្ធអនុគ្រោះពន្ធរបស់កម្ពុជាទៅសហគមន៍អឺរ៉ុប ហើយកន្លែងហ្នឹងដែល IMF មើលឃើញជា កត្តាហានិភ័យខ្ពស់សម្រាប់សេដ្ឋកិច្ចកម្ពុជា។ […] ខ្ញុំយល់ថា យើងមានចំណុចខ្វះខាតច្រើនជាមួយនឹងចំណុចម៉ាក្រូសេដ្ឋកិច្ចនោះ ទាក់ទងនឹងហានិភ័យហិរញ្ញវត្ថុ និងទំនាក់ទនងការបរទេសជាមួយនឹងបណ្តាប្រទេសមហាអំណាចក៏ដូចជាសហគមន៍អឺរ៉ុប។ ខ្ញុំយល់ថា យើងនៅមានភាពផុយស្រួយ និងខ្វះខាតច្រើន»។
ប្រទេសកម្ពុជាត្រូវបានសហគមន៍អន្តរជាតិបានចាត់ទុកជាប្រទេសដែលគ្រប់គ្រងតែមួយបក្ស បន្ទាប់ពីមេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួនដាក់ឃុំ ហើយបក្សនេះត្រូវបានតុលាការសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ដែលស្ថានភាពបែបនេះ ត្រូវបានសហភាពអឺរ៉ុប និងអាមេរិក ចាត់ទុកជាការបំផ្លាញលទ្ធិប្រជាធិបតេយ្យនៅកម្ពុជា និងឈានទៅរងទណ្ឌកម្មជាបន្តបន្ទាប់ពីសហគមន៍អន្តរជាតិ៕
