ប្រជាពលរដ្ឋនៅ ខណ្ឌច្បារអំពៅ ក្នុងរាជធានីភ្នំពេញ ដែលមានជម្លោះដីធ្លីជាមួយអ្នកស្រី ស៊ុយ សុផាន បានស្នើសុំអាជ្ញាធរចូលទៅបង្កបង្កើនផលលើដីកំពុងមានជម្លោះវិញ ខណៈវិវាទដីធ្លីនេះ អូសបន្លាយជាង ១០ឆ្នាំគ្មានដំណោះស្រាយ។
ពលរដ្ឋម្នាក់ លោក ឡេង សារិ ប្រាប់វីអូឌីថា ពលរដ្ឋប្រមាណ ៨០នាក់តំណាងឲ្យពលរដ្ឋជាង ២០០គ្រួសាររស់នៅភូមិចុះពុះក្អែក សង្កាត់ព្រែកថ្មី នៅថ្ងៃនេះ បានញ្ញត្តិទៅក្រសួងរៀបចំដែន ដើម្បីសុំចូលទៅបង្កបង្កើនផលលើដីទំហំ ៥៨ហិកតាដែលកំពុងមានជម្លោះជាមួយអ្នកស្រី ស៊ុយ សុផាន។
លោកបន្តថា ប្រជាពលរដ្ឋមានជម្លោះដីធ្លីជាមួយអ្នកស្រី ស៊ុយ សុផាន តាំងពីឆ្នាំ២០០៧ ដោយក្រុមពលរដ្ឋ បានរកកិច្ចអន្តរាគមន៍ពីក្រសួងដែនដី និងស្ថាប័នរដ្ឋផ្សេងៗទៀតជាច្រើនដងហើយ ប៉ុន្តែថា មិនទាន់ទទួលបានដំណោះស្រាយនោះទេ។
លោកបន្ថែមថា៖ «ការដែលពួកយើងតវ៉ានោះដោយសារអ្នកស្រី ស៊ុយ សុផាន ហ្នឹង គាត់ធ្វើប័ណ្ណ[កម្មសិទ្ធិ]គ្របពីលើដីប្រជាពលរដ្ឋកំពុងកាន់កាប់ហ្នឹង ហើយរាល់ឯកសារគាត់ទាំងអស់ គឺក្លែងទាំងអស់ហ្មង តាំងពីមេភូមិ តាំងពីម្ចាស់ដី គឺនីតិវិធីរបស់គាត់ហ្នឹង គឺធ្វើខុសទាំងអស់ តែគាត់មានប្លង់រឹងចេញដោយក្រសួងដែនដីចេញតាំងពីឆ្នាំ១៩៩៦។ សូម្បីតែទីតាំងដីដែលគាត់ចូលទៅរំលោភហ្នឹង ក៏ខុសដែរ ឯកសាររបស់គាត់នៅកន្លែងផ្សេងទេ ប៉ុន្តែ គាត់បែរជាមករំលោភយកដីពួកយើងនៅកន្លែងផ្សេងមួយទៀត»។
ពលរដ្ឋម្នាក់ទៀត លោក ចន្ទ្រា និយាយថា វិវាទដីធ្លីនេះកើតឡើយដោយសារមានអំពើពុករលួយជាប្រព័ន្ធ ដោយអ្នកស្រី ស៊ុយ សុផាន ឃុបឃិតជាមួយក្រុមអាជ្ញាធរលួចធ្វើប័ណ្ណកម្មសិទ្ធិជាន់លើដីពលរដ្ឋ។
លោកបន្តថា ដីដែលកំពុងមានជម្លោះនោះ គឺពលរដ្ឋខ្លះបានទិញតគ្នា និងមួយចំនួនទៀត បានកាន់កាប់ផ្ទាល់ចន្លោះពីឆ្នាំពីឆ្នាំ១៩៨១-១៩៨២ ដោយមានលិខិតទិញលក់ និងបញ្ជាក់ការកាន់កាប់ត្រឹមត្រូវ។
លោកបន្ថែមថា៖ «អាជ្ញាធរហ្នឹងបានឃុបឃិតគ្នាជាប្រព័ន្ធតាំងពីសុរិយោដី ដោយរំលោភយកដីប្រជាពលរដ្ឋតែម្តង ហើយពលរដ្ឋស្នើសុំទៅបង្កបង្កើនផលដោយសារតែយើងដាក់ញត្តិចុងក្រោយតាំងពីខែ៧ ឆ្នាំ២០១៦ តាំងពីយាយ ផាន គាត់ដាក់កម្លាំងចូលទន្រ្ទានហ្នឹង គឺបានដាក់របងព័ទ្ធជុំវិញ អញ្ចឹងធ្វើឲ្យពលរដ្ឋមួយចំនួន មិនបានបង្ករបង្កើនផល ធ្វើឲ្យជីវភាពរបស់ពួកគាត់ខ្វះខាតជីវភាព ហើយក្រសួងគាត់ដោះស្រាយយឺតយ៉ាវ គិតទៅជិត ២ឆ្នាំ»។
វីអូឌីមិនអាចសុំការឆ្លើយតបពីអ្នកនាំពាក្យក្រសួងរៀបចំដែន នគរូបនីយកម្ម និងសំណង់ លោក ឡោ រ៉ាវុទ្ធ បានទេជុំវិញវិវាទដីធ្លីមួយនេះ ដោយទូរស័ព្ទចូលច្រើនដងគ្មានអ្នកទទួល។
ប៉ុន្តែបើតាមពលរដ្ឋកាលពីព្រឹកមិញនេះ មន្រ្តីក្រសួងបានទទួលយកញត្តិពីក្រុមពលរដ្ឋរួចហើយ ដោយនិយាយថា ក្រសួងកំពុងតែដោះស្រាយគ្រាន់តែយឺតយ៉ាវបន្តិចដោយលើកហេតុផលថា វិវាទដីធ្លីច្រើនដោះស្រាយមិនទាន់។
ចំណែកអ្នកស្រី ស៊ុយ សុផាន ក៏មិនអាចសុំការបំភ្លឺបានដែរជុំវិញបញ្ហានេះ។
ញត្តិរបស់ប្រជាពលរដ្ឋ បានឲ្យដឹងថា ក្រុមពលរដ្ឋប្រមាណ ២១៨គ្រួសារ និងមានដីទំហំ ៥៨ហិកតា ស្ថិតភូមិចំពុះក្អែក សង្កាត់ព្រែកថ្មី មានជម្លោះដីជាមួយអ្នកស្រី ស៊ុយ សុផាន តាំងឆ្នាំ២០០៧មកម៉្លេះ៕