«ពួកអប្សរានេះគេឃើញយើងលើកជើងសរសរដែរ តែគេអត់ហាមឃាត់យើងទេគេដើរទៅមកទៅមកគេអត់ហាមយើងទេដល់ពេលបោះឆ្នោតហើយគេមហាមយើងថា អត់ឲ្យយើងធ្វើបន្ដទៀតទេ។អស់ពាក្យនិយាយណាងបងគេរុះរើផ្ទះខ្ញុំអស់និយាយតទៅទៀត អស់ពីចិត្ដបន្ដនិយាយទៅថ្នាក់លើឲ្យគេដោះស្រាយមិនដឹងនិយាយថាយ៉ាងម៉េចចប់បាត់ហើយ ចប់ត្រឹមថ្ងៃហ្នឹង»។
នេះជាការរៀបរាប់ពីទុក្ខកង្វល់របស់អ្នកភូមិអង្គរ ស្ថិតនៅសង្កាត់នគរធំ ក្រុងសៀមរាប បន្ទាប់ពីលំនៅឋានពួកគេត្រូវបានអាជ្ញាធរជាតិអប្សរា ឲ្យរុះរើនិងវាយកំទេចចោល កាលពីល្ងាចថ្ងៃទី១៩ខែមិថុនាឆ្នាំ២០១៧នេះ ។
ពលរដ្ឋទាំងនោះសម្ដែងការខកចិត្ដចំពោះអាជ្ញាធរមូលដ្ឋានដោយសារការសាងសង់ផ្ទះនោះ បានការអនុញ្ញាតិមុនពេលឃោសនារកសំឡេងឆ្នោតក្រុមប្រឹក្សា ឃុំសង្កាត់អាណត្ដិទី៤នេះ ប៉ុន្ដែផ្ទុយទៅវិញ ការមិនហាមឃាត់នេះ គ្រាន់តែចង់បានសំឡេងឆ្នោតប៉ុណ្ណោះ។
ពលរដ្ឋនៅភូមិរហាល សង្កាត់នគរធំ អ្នកស្រី ស៊ុន សុគន្ធា បានរៀបរាប់ថា កាលពីថ្ងៃទី២០ខែមិថុនា ស្របពេលគណបក្សនយោបាយ បានបើកយុទ្ធនាការឃោសនារកសំឡេងឆ្នោត ក្រមប្រឹក្សា ឃុំសង្កាត់ អ្នកភូមិបានចាប់ផ្ដើមសង់លំនៅឋានជាបន្ដបន្ទាប់នៅតំបន់ហាមឃាត់ឧទ្យានអង្គរ។ ហើយការសាងសង់នោះ អ្នកស្រីថា មានមន្ដ្រីអាជ្ញាធរជាតិអប្សរា និងអាជ្ញាធរមូលដ្ឋានមួយចំនួនជួយសម្រួលនិងចេញលិខិតបញ្ជាក់ឲ្យសង់ផងដែរ។ ប៉ុន្ដែផ្ទុយទៅវិញអ្នកស្រីថា បន្ទាប់ពីបោះឆ្នោតហើយ បែរជាអាជ្ញាធរឲ្យផ្ដិតមេដៃរុះរើផ្ទះអ្នកស្រីទៅវិញ។
អ្នកស្រីបន្ដថា «មានអាជ្ញាធរហ្នឹងហើយដែលជាអ្នកឲ្យយើងធ្វើនោះ រួចហើយចឹងអប្សរាទារឲ្យរុះរើវិញអាជ្ញាធរមានចេញមុខជួយយើងណាអត់វិញ។អប្សរាក៍ចឹងឃើញយើងលើកជើងសរសេរ ឃើញយើងធ្វើមានហាមឃាត់ណាហើយគួរណាអាជ្ញាធរដាក់មេក្រូស្រែកទៅថា ឥឡូវបងប្អូនប្រជាពលរដ្ឋទាំងអស់គ្នាកុំជ្រួលច្របល់នឹងធ្វើផ្ទះធ្វើសំបែងនៅមុនពេលបោះឆ្នោតនេះបើសិននៅតែធ្វើគេរុះរើអីគេអាហ្នឹងបងប្អូនទទួលខុសត្រូវខ្លួនឯងចុះព្រោះខ្ញុំជាអាជ្ញាធរដែនដីខ្ញុំប្រាប់អស់ហើយ»។
អ្នកស្រីសុគន្ធា បន្ដទាំងទឹកមុខក្ដុកក្ដួលថា អ្នកស្រី បានចំណាយលុយជាងពីរម៉ឺនដុល្លា សង់ផ្ទះទំហំ១២ម៉ែត្រគុណ១០ម៉ែត្រ ធ្វើអំពីឈើថ្មក្រោម ប៉ុន្ដែត្រូវបានអាជ្ញាធរជាតិអប្សរា បង្ខំឲ្យរុះរើវិញដោយចោទថា សង់ឡើងគ្មានច្បាប់ទម្លាប់ពីស្ថាប័ន គ្រប់គ្រងតំបន់ ឧទ្យានអង្គរ។ អ្នកស្រីសម្ដែងការខកចិត្ដចំពោះអាជ្ញាធរមូលដ្ឋាន ដោយថា នៅពេលពួកគាត់សាងសង់ ហេតុអីមិនហាមឃាត់ពួកគាត់។
អ្នកស្រីបន្ដថា «បើគេហាមឃាត់ខ្ញុំមិនធ្វើទេ ព្រោះធ្វើអីគេហាមឃាត់ហើយគេគង់តែវាយចោលយើងយកលុយបំផ្លាញធ្វើអីតែគេអត់ហាមទេ គេមានតែធ្វើទៅបងធ្វើឲ្យលឿនៗទៅគេធ្វើដូចហែកឋិនទៅហើយនៅតែគិតអីទៀតហ្នឹងប្រធានភូមិ»។
មិនខុសពីអ្នកស្រីសុគន្ធាប៉ុន្មាននោះទេ អ្នកភូមិវ័យ៣៩ឆ្នាំ លោក ស៊ុន វុទ្ធី បានឲ្យដឹងដែរថា លោកបានច្បាប់ពីភូមិសង្កាត់ ឲ្យសង់ផ្ទះទំហំ៥ម៉ែត្រ គុណ១០ម៉ែត្រ ដោយអស់ទឹកប្រាក់ជិត១ម៉ឺនដុល្លាសហរដ្ឋអាមេរិក និងសង់រួចរាល់មុនពេលបោះឆ្នោតមួយថ្ងៃ ប៉ុន្ដែលោកថា ផ្ទះរបស់លោកត្រូវបានអាជ្ញាធរជាតិអប្សរាដាក់កំហិតឲ្យរុះរើរយៈពេលបីថ្ងៃ ខណៈដែលលោកខ្ចីលុយមីក្រូហិរញ្ញវត្ថុ ដើម្បីសង់ផ្ទះនោះ។ លោកបន្ដថា គ្រួសារលោកមានសមាជិក៨នាក់ ប្រឈមអត់ជម្រក ជំពាក់បំណុលគេផងដែរ។ ប៉ុន្ដែទោះយ៉ាងនេះក្ដីលោកថា លោកមិនព្រមរុះរើតាមការបញ្ជាពីអាជ្ញាធរជាតិអប្សរានោះទេ។
លោកបន្ដថា «កាលពីដំបូងដាក់សរសរអីគេអស់តិចទេ ខ្ញុំមិនសូវខឹងទេឥឡូវអស់រលីងហើយគាត់មករើទៀតមានអីទៀត។តាមស្ដាប់មើលអត់មានសំណងសងអីទេ គេនិយាយថាសំណង់យើងខុសច្បាប់តែខ្ញុំឆ្ងល់សំណង់ខុសច្បាប់ពីមុនមិនប្រាប់ខ្ញុំឥឡូវលុងខ្លួនមកវ៉ៃរបស់ខ្ញុំ»។
អង្គុយនៅលើគ្រែក្នុងផ្ទះប្រក់សង្កសី អមដោយទឹកភ្នែករលីងរលោងផងនោះអ្នកស្រី អ៊ឹង សារ៉ាយ ឲ្យដឹងថា អ្នកស្រីក៍ដូចអ្នកភូមិជាច្រើនទៀតមិនចង់សង់ផ្ទះនៅលើតំបន់ហាមឃាត់ ទេ ប៉ុន្ដែដោយសារមេភូមិជម្រុញឲ្យធ្វើទើបពលរដ្ឋជ្រួលច្របល់និងនាំគ្នាធ្វើបន្ដគ្នា។ អ្នកស្រីរំលឹកថា កាលពីបោះឆ្នោតឆ្នំាំ២០១៣ កន្លងមកអ្នកភូមិបាននាំគ្នាសំរុកផ្ទះក្នុងតំបន់ហាមឃាត់ឧ្យានអង្គរដែរ ប៉ុន្ដែមិនមានបញ្ហាអ្វីកើតឡើង ទើបតែពេលបោះឆ្នោតក្រុមហ្រឹក្សាឃុំអាណត្ដិទី៤នេះ ។
ទាក់ទងករណីនេះ ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាលោក ឡុង កុសល មានប្រសាសន៍ថា អាជ្ញាធរមិនទាន់ដឹងពីចំនួនខ្នងផ្ទះ ដែលពលរដ្ឋសាងសង់នៅក្នុងតំបន់ហាមឃាត់នៅឡើយទេ ប៉ុន្ដែកើតមានចំនួន៥២១ករណី ដែលក្នុងមានទាំងការចាក់ដី ធ្វើរោងទុកចោលជាដើម។ លោកថា ការរុះរើលំនៅឋាននោះគឺអនុវត្ដទៅតាមច្បាប់។
ទោះជាយ៉ាងណា អ្នកឃ្លាំមើលការរំលោភសិទ្ធិមនុស្សនៃសមាគមអាដហុកខេត្ដសៀមរាបលោក សួស ណារិន មានប្រសាសន៍ថា ពលរដ្ឋសង់លំនៅឋានបាននៅតំបន់ហាមឃាត់នៃឧទ្យានជាតិអង្គរនោះ ដោយសារមានអាជ្ញាធរមូលដ្ឋានផ្ដល់សិទ្ធឲ្យពួកគាត់ ដែលលោកថា អាជ្ញាធរជាតិអប្សរានោះ គួររកដំណោះស្រាយដល់ពលរដ្ឋឲ្យបានសមរម្យជៀសវាងជម្លោះកើតឡើង។លោកបន្ដថា ការរុះរើផ្ទះពួកគាត់ធ្វើឲ្យប៉ះពាល់ដល់ការរស់នៅនិងជំពាក់បំណុលគេកាត់តែច្រើន។
នៅក្នុងសន្នីសីទទេសចរណ៍អន្ដរជាតិជាមួយអង្គការ UNESCO និង UNWTO នៅខេត្ដសៀមរាប កាលពីថ្ងៃទី១៥ខែមិថុនាកន្លងមកនេះ រដ្ឋមន្ដ្រីក្រសួងវប្បធម៌ និងវិចិត្រសិល្បៈលោកស្រី ភឿង សកុណា ប្រាប់អ្នកសារព័ត៌មានថា អាជ្ញាធរមិនចង់ធ្វើការអភិរក្ស និងអភិវឌ្ឍឲ្យពលរដ្ឋលំបាកនោះទេ ប៉ុន្ដែពលរដ្ឋដែលសាងសង់លំនៅឋាននៅតំបន់បេតិកភណ្ឌ ត្រូវតែមានច្បាប់អនុញ្ញាត ដើម្បីកុំឲ្យប៉ះពាល់ដល់តំបន់ទេសចរណ៍បេតិកភណ្ឌពិភពលោក។ លោកស្រីបន្ដថា តំបន់បេតិកភណ្ឌមិនមែនតែអង្គរវត្ដនោះទេ ត្រូវការចាប់បាច់នូវបរិស្ថានស្អាតផងដែរ៕