អង្គការមួយប្រកាសថា នឹងមិនចូលរួមឃ្លាំមើលការបោះឆ្នោតខែកក្កដាខាងមុខនេះទេ ខណៈ អ្នកនាំពាក្យ គ.ជ.ប ចាត់ទុកការប្រកាសបែបនេះ ថា ជារឿងធម្មតា។
តាមរយៈសេចក្ដីប្រកាសព័ត៌មានមួយនៅថ្ងៃនេះ អង្គការតម្លាភាពកម្ពុជាបានប្រកាសមិនចូលរួមឃ្លាំមើលការបោះឆ្នោតថ្នាក់ជាតិនាថ្ងៃទី២៩ខែកក្កដាឆ្នាំ២០១៨ខាងមុខទេ ដោយអង្គការនេះបន្ទោសលើបរិយាកាសនយោបាយ ថា ធ្វើឲ្យខ្លួនមិនអាចប្រមូលធនធានគ្រប់គ្រាន់ ដើម្បីធ្វើការសង្កេតការណ៍ និងជួយជំរុញដល់ដំណើការបោះឆ្នោត។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ទាត់ចោលកង្វល់ទាំងនេះថា មិនឆ្លុះការពិតទាំងស្រុង និងថា ការប្រកាសមិនចូលរួមឃ្លាំមើលរបស់អង្គការសង្គមស៊ីវិល គឺមិនប៉ះពាល់ដល់ដំណើរការបោះឆ្នោតនោះឡើយ។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា អង្គការសង្គមស៊ីវិលដទៃទៀត ក៏រងការគំរាមកំហែង បំភិតបំភ័យ និងចោទប្រកាន់ជាបន្ដបន្ទាប់ដូចគ្នាដែរ ជាហេតុធ្វើឲ្យប្រជាពលរដ្ឋនៅថ្នាក់មូលដ្ឋាន មានការខ្លាចរអា និងមិនហ៊ានចូលរួមជាមួយពួកគេ។
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
បើតាមសេចក្ដីប្រកាសព័ត៌មាន អង្គការតម្លាភាពកម្ពុជាអះអាងថា កន្លងមក ខ្លួនធ្លាប់បានចូលរួមសង្កេតការណ៍បោះឆ្នោតពីរលើកមកហើយ គឺការបោះឆ្នោតជាតិឆ្នាំ២០១៣ និងការបោះឆ្នោតក្រុមប្រឹក្សាឃុំ-សង្កាត់ឆ្នាំ២០១៧៕
