យោងតាមគេហទំព័របស់អគ្គស្នងការនគរបាលជាតិនៅថ្ងៃទី១៩ខែកក្កដានេះបានសរសេរថា សមត្ថកិច្ចកំពុងធ្វើការស្វែងរកចាប់ខ្លួនជនសង្ស័យនិងបក្ខពួកដែលបានប្រកាសអំពីការប្រើប្រាស់កម្លាំងក្នុងការផ្តួលរំលំរដ្ឋាភិបាលនៅតាមបណ្តាញសង្គមហ្វេសប៊ុក (Facebook)។
គេហទំព័របស់អគ្គស្នងការនគរបាលជាតិបានសរសេរបញ្ជាក់ថាបុរសម្នាក់បានថ្លែងជារូបភាពវីដេអូក្នុងបណ្តាញសង្គមហ្វេសប៊ុកជាសេចក្តីប្រកាសព័ត៌មានថ្ងៃទី១៧ ខែកក្កដា ឆ្នាំ២០១៦ នេះដោយចោទប្រកាន់រដ្ឋាភិបាលនូវពាក្យសម្តីធ្ងន់ៗនិងប្រទេសវៀតណាមផងដែរថាបានរំលោភបំពានសិទ្ធិពលរដ្ឋ ផ្តាច់ការ និងធ្វើឲ្យប្រទេសជាតិជួបប្រទះការលំបាក។
អ្នកនាំពាក្យអគ្គស្នងការដ្ឋាននគរបាលជាតិលោក គៀត ច័ន្ទថារិទ្ធ មានប្រសាសន៍តាមសម្រង់សម្តីដើម ដែលបានចុះផ្សាយនៅលើគេហំព័រអគ្គស្នងការនគរបាលជាតិថា “ក្រោយពេលដែលមានការផ្សព្វផ្សាយតាមរយៈបណ្តាញសង្គមហ្វេសប៊ុករបស់បុរសម្នាក់ដែលបានដាក់ឈ្មោះខ្លួនឯងថា វ៉េប៉េ៩ (VP9) នៅអង្គភាពភូមិភាគនីរតី បានអំពាវនាវដល់មហាជននិងកងកម្លាំងប្រឆាំងនឹងរដ្ឋាភិបាល ដោយបានអំពាវនាវដល់មហាជន ក្រសួងមន្ទីនានា និងកងកម្លាំងទាំងអស់ត្រៀមខ្លួនប្រឆាំងនឹងរដ្ឋាភិបាលដើម្បីរំដោះជាតិ”។
លោក គៀត ច័ន្ទថារិទ្ធ បានមានប្រសាសន៍បន្តថា “ការប្រកាសនោះ គឺមានលក្ខណៈញុះញ៉ុងនិងមានចរិតជាលក្ខណៈកុប្បកម្ម បះបោដោយហិង្សាប្រឆាំងនឹងរដ្ឋាភិបាលស្របច្បាប់” ដោយលោកបានអំពាវនាវដល់មហាជនទូទៅសូមកុំឲ្យជឿនិងចូលរួមតាមការអំពាវនាវនេះ ដែលវាជាសកម្មភាពខុសច្បាប់។ នេះបើយោងតាមការចុះផ្សាយរបស់គេហទំព័រអគ្គស្នងការនគរបាលជាតិ។
លោក គៀត ច័ន្ទថារិទ្ធ ក៏បានអំពាវនាវដល់អ្នកប្រើប្រើប្រាស់បណ្តាញសង្គមទាំងអស់ត្រូវមានការប្រុងប្រយ័ត្ន ដោយលោកថារាល់ការចែកចាយបន្តសេចក្តីប្រកាសព័ត៌មានផ្តួលរំលំរដ្ឋាភិបាល គឺមានន័យស្មើនឹងចូលរួមគាំទ្រសកម្មភាពនេះផងដែរ៕
