ក្រសួងអប់រំអំពាវនាវឲ្យគ្រឹះស្ថានអប់រំទប់ស្កាត់កុំឲ្យសិស្សានុសិស្សបោះបង់ការសិក្សានៅថ្ងៃបុណ្យនៃក្តីស្រលាញ់ដោយក្រសួងកត់សំគាល់ថានៅថ្ងៃទី១៤កុម្ភៈកន្លងមកសិស្សខ្លះបានណាត់ជូបគូស្នេហ៍ធ្វើឲ្យប៉ះពាល់ដល់វប្បធម៌ប្រពៃណីជាតិខ្មែរ។
តាមសេចក្តីណែនាំរបស់ក្រសួងអប់រំ យុវជន និងកីឡាចុះផ្សាយកាលពីថ្ងៃទី៩ខែកុម្ភៈឲ្យដឹងថាប៉ុន្មានឆ្នាំចុងក្រោយនេះ សិស្សានុសិស្សមួយចំនួននៅតែយល់ច្រឡំថាថ្ងៃទី១៤ខែកុម្ភៈជាថ្ងៃបុណ្យសង្សារឬជាថ្ងៃណាត់ជូបគ្នារវាងគូស្នេហ៍។ សេចក្តីណែនាំបន្តថាទិវានេះធ្វើឲ្យយុវវ័យភ្លើតភ្លើន ភ្លេចការសិក្សា បាត់បង់កិត្តិយស សេចក្តីថ្លៃថ្នូររបស់ខ្លួន និងក្រុមគ្រួសារ រួមទំាងប្រាសចាកវប្បធម៌ និងប្រពៃណីយជាតិខ្មែរផងដែរ។
សេចក្តីណែនាំដដែលក៏បានអំពាវនាវឲ្យគ្រឹះស្ថានសិក្សាសាធារណៈនិងឯកជនជួយទប់ស្កាត់សកម្មភាពមិនប្រក្រតីដល់សិស្សានុសិស្សក្នុងទិវាបុណ្យនៃក្តីស្រលាញ់នេះដោយផ្សព្វផ្សាយព័ត៌មានដល់ពួកគេនៅពេលប្រជុំ ពេលគោរពទង់ជាតិ ពង្រឹងការអនុវត្តបទបញ្ជាផ្ទៃក្នុងរបស់សាលា អនុវត្តសកម្មភាព “មិត្តអប់រំមិត្ត” និងធ្វើការទំនាក់ទំនងជិតស្និតទៅមាតាបិតា អ្នកអាណាព្យាបាលសិស្សជាប្រចំា ដើម្បីផ្តល់ព័ត៌មានមិនប្រក្រតីនានាដែលប្រព្រឹត្តដោយសិស្សដើម្បីកែលម្អ។
ប្រធានមជ្ឈមណ្ឌលវប្បធម៌ជាតិនិងសីលធម៌សង្គមលោក ប៉ូ សំណាង យល់ថាជំរើសល្អក្រសួងអប់រំត្រូវផលិតកម្មវិធីទាក់ទងនឹងវប្បធម៌ខ្មែរផ្សាយតាមប្រព័ន្ធផ្សព្វផ្សាយអប់រំឲ្យសិស្សានុសិស្សឲ្យយល់ដឹងពីគុណរបស់ឪពុកម្តាយរបស់ពួកគេទើបទទួលបានផលវិជ្ជមានច្រើនជាងការចេញសេចក្តីណែនាំនេះ។ លោកបន្ថែមថា៖ “យុវជននិងកីឡាគួរតែមានវិធីល្អៗដូចជាការប្រគុំតន្ត្រីអប់រំផ្សព្វផ្សាយអំពីបញ្ហាអ្វីទាក់ទងសុជីវធម៌ សេចក្តីគោរពរវាងឪពុកម្តាយ ស្រលាញ់កូន ក្មេងៗឆាប់បញ្ជូលសឹងអី ប៉ុន្តែណាស់តែយើងមិនធ្វើយើងថាទិវានៃសេចក្តីស្រលាញ់យើងអត់ធ្វើយើងនៅស្ងៀមគេយកអស់ហើយធម្មតាហាងគុយទាវក៏អញ្ចឹងដែរតែគុយទាវណាឆ្ងាញ់គេចូលហាងហ្នឹងហើយ”។
អ្នកស្រាវជ្រាវពីបញ្ហាសង្គមលោក តុង សុប្រាជ្ញ ឲ្យដឹងថាក្រោយពីលោកសិក្សាស្រាវជ្រាវ៥ឆ្នំាកន្លងទៅនេះចំនួនយុវវ័យដែលចាប់អារម្មណ៍នឹងថ្ងៃបុណ្យសង្សារមានការថយចុះពីមួយឆ្នំាទៅមួយឆ្នាំដោយសារការយល់ដឹងរបស់យុវវ័យ។ ដោយឡែកលោកថាការរួមភេទនៅថ្ងៃបុណ្យនេះមានការថយចុះតិចតួច។ លោកបន្តថា៖ “តួនាទីរបស់រដ្ឋាភិបាលត្រូវមានការផ្តល់ឱវាទតាមរយៈគិតគូបញ្ហាផ្លូវភេទ ការយល់ដឹងពីបញ្ហាសុខភាព ការយល់ដឹងពីបញ្ហាសុខភាពបន្តពូជ យល់ដឹងពីជំងឺអេដស៍ ជំងឺឆ្លងផ្សេងៗ កន្លែងហ្នឹងដែលគាត់ផ្ញើសារហើយត្រូវឱកាសដែលគាត់អាចធ្វើបាន”។
លោក តុង សុប្រាជ្ញ ឲ្យដឹងទៀតថាចាប់ពីឆ្នាំ២០០៩ដល់២០១៤ចំនួនយុវវ័យដែលចាប់អារម្មណ៍ថ្ងៃបុណ្យសង្សារមានចំនួន៦១%ថយមកត្រឹម៤៦% អ្នកដែលទិញផ្កាមានចំនួន៥៦%ថយមកត្រឹម៣៤% រីឯអ្នករួមភេទមានចំនួន១២%ថយមកត្រឹម១១%។ នេះជារបាយការណ៍សិក្សាក្នុងចំណោម៧១៥នាក់៕