គណៈកម្មការអឺរ៉ុបបានចុះបញ្ជីម្រេចកំពតរបស់ខ្មែរនៅក្នុងទីផ្សារសហភាពអឺរ៉ុបថាជាទំនិញសម្គាល់ភូមិសាស្ត្រដែលផ្ដល់នូវកិច្ចការពារស្របច្បាប់នៅក្នុងសហភាពអឺរ៉ុប។
ក្នុងសេចក្ដីប្រកាសព័ត៌មានចេញផ្សាយនៅថ្ងៃទី២៩ ខែកុម្ភៈ សហភាពអឺរ៉ុបបានបញ្ជាក់ថាកាលពីថ្ងៃទី១៨ ខែកុម្ភៈឆ្នាំ២០១៦ ម្រេចកំពតត្រូវបានចុះឈ្មោះនៅក្នុងទីផ្សារសហភាពអឺរ៉ុប ដែលត្រូវបានការពារដោយស្របច្បាប់នៅក្នុងសហភាពអឺរ៉ុប។ សេចក្ដីប្រកាសព័ត៌មានបន្តថាការចុះបញ្ជីម្រេចកំពតនៅក្នុងទីផ្សារសហភាពអឺរ៉ុប គឺក្រោយពីគណៈកម្មការរអឺរ៉ុបបានធ្វើសូចនាករភូមិសាស្ត្រ(Gls)។
សូចនាករភូមិសាស្រ្ត(GIs)គឺជាប្រភេទកម្មសិទ្ធិបញ្ញាមួយដែលកំណត់នូវអត្តសញ្ញាណរបស់ផលិតផលមួយដែលមានប្រភពមកពីតំបន់ឬប្រទេសមួយជាក់លាក់ ក៏ដូចជាទទួលបានតាមរយៈវិធីសាស្រ្តផលិតកម្មមួយច្បាស់លាស់ផងដែរ។ នេះបើតាមសេចក្តីប្រកាសព័ត៌មាន។
សេចក្ដីប្រកាសព័ត៌មានឲ្យដឹងទៀតថាការចុះបញ្ជីផលិតផលសម្គាល់ភូមិសាស្ត្រនេះ គឺផ្តល់នូវតម្លៃបន្ថែមលើកេរ្តិ៍ឈ្មោះម្រេចនិងទទួលបានអត្ថប្រយោជន៍កាន់តែខ្លាំង មានការការពារកម្រិតខ្ពស់បំផុតនៅលើទីផ្សារអឺរ៉ុប ជាពិសេសប្រឆាំងទៅនឹងការចម្លងនិងកែច្នៃជៀសវាងមិនឲ្យមានការក្លែងបន្លំដែលអាចនឹងបណ្ដាលឲ្យមានការរំលោភបំពានកេរ្តិ៍ឈ្មោះរបស់ម្រេចកំពត។ សេចក្តីប្រកាសបន្តថាការចុះបញ្ជីនេះនឹងជួយបង្កើនភាពលេចធ្លោរលើទីផ្សារនៅក្នុងសហភាពអឺរ៉ុប ក៏ដូចជាប្រទេសកម្ពុជា ដោយសារតែផលិតផលនេះមានបិទស្លាកសញ្ញាដែលបញ្ជាក់ពីគុណភាពភីជីអាយ(PGI)។
សេចក្ដីប្រកាសព័ត៌មានដដែលឲ្យដឹងទៀតថាការចុះបញ្ជីផលិតផលសម្គាល់ភូមិសាស្ត្រសម្រាប់ផលិតផលរបស់ប្រទេសកម្ពុជានៅលើទីផ្សារសហភាពអឺរ៉ុបគឺធ្វើឡើងដោយប្រទេសចំនួន២៨ ដែលមានទីផ្សារតែមួយសម្រាប់អ្នកប្រើប្រាស់ម្រេចច្រើនជាង៥០០លាននាក់។
សេចក្ដីប្រកាសព័ត៌មានបញ្ជាក់ថាការធ្វើសូចនាករភូមិសាស្រ្ត(GIs)មានសារៈសំខាន់សម្រាប់ប្រទេសកំពុងអភិវឌ្ឍន៍ដែលអាចទទួលបានការពារនិងអភិរក្សនូវកម្មសិទ្ធិបញ្ញា៕