ក្រសួងសុខាភិបាលជំរុញឲ្យប្រជាពលរដ្ឋរាយការណ៍ទៅកាន់អាជ្ញាធរនៅពេលឃើញអ្នកជក់បារីនៅកន្លែងហាមឃាត់ដោយអះអាងថាដើម្បីចាត់វិធានការតាមផ្លូវច្បាប់និងកាត់បន្ថយការប្រើប្រាស់ផលិតផលថ្នាំជក់។
កន្លែងសាធារណៈដែលត្រូវហាមការជក់បារីមានដូចជាគ្រឹះស្ថានឧត្តមសិក្សា កន្លែងសាធារណៈ គ្រឹះស្ថានសាសនា សួនកុមារ សារមន្ទីរ និងរមណីយដ្ឋានវប្បធម៌ប្រវត្តិសាស្ត្រជាដើម។
ប្រធានមជ្ឈមណ្ឌលជាតិលើកកម្ពស់សុខភាពនៃក្រសួងសុខាភិបាលលោកស្រី ឈា ឆដាភា ថ្លែងប្រាប់អ្នកសារព័ត៌មានក្រោយពីកិច្ចប្រជុំជាមួយភាគីពាក់ព័ន្ធដើម្បីបង្កើនការយល់ដឹងអំពីគោលនយោបាយហាមឃាត់ការផ្សព្វផ្សាយពាណិជ្ជកម្មថ្នាំជក់នៅថ្ងៃចន្ទនេះថាមន្ត្រីអធិការកិច្ចផលិតផលថ្នាំជក់នឹងចុះតាមដានត្រួតពិនិត្យការអនុវត្តច្បាប់នេះនិងប្រាប់ទៅប្រជាពលរដ្ឋឲ្យសហការជាមួយអាជ្ញាធរពាក់ព័ន្ធហើយរាយការណ៍ព័ត៌មានជុំវិញការប្រើប្រាស់ថ្នាំជក់នោះដើម្បីកាត់បន្ថយការប្រើប្រាស់ឲ្យមានប្រសិទ្ធិភាព។ លោកស្រីបន្តថា៖ ”យើងមានសុដិ្ឋនិយមក្នុងការអនុវត្តមានន័យថាជំរុញការចូលរួមគ្រប់គ្នាព្រោះការជក់បារីនៅទីសាធារណៈគឺពេលឃើញគាត់ទូរស័ព្ទទៅរកអាជ្ញាធរពាក់ព័ន្ធដើម្បីចុះមកចាត់វិធានការហើយការងារនេះត្រូវជាឃើញថាការជក់បារីនៅជិតមនុស្សម្នាក់ទៀតគឺជាអំពើមិនសមរម្យគឺជាការមិនគោរពសិទ្ធិគេគឺជាការគេហៅថាមិនមានសុជីវធម៌មានតែធ្វើបែបហ្នឹងទេដែលយើងអាចផ្លាស់ប្តូរទំលាប់សង្គមយើងទំាងមូល”។
បើតាមអនុក្រឹត្យរបស់រដ្ឋាភិបាលអ្នកជក់បារីនៅកន្លែងហាមឃាត់នឹងត្រូវផាកពិន័យចំនួន២ម៉ឺនរៀល។ ដោយឡែកម្ចាស់ហាងនានាដែលមិនព្រមបិទសញ្ញាហាមជក់បារីឬនៅតែបន្តដាក់បង្ហាញចានគោះបារីក៏ត្រូវផាកពិន័យជាប្រាក់៥ម៉ឺនរៀលផងដែរ។
នាយកប្រតិបត្តិនៃអង្គការចលនាដើម្បីសុខភាពកម្ពុជាលោក មុំ គង់ យល់ថាបើអាជ្ញាធរនិងប្រជាពលរដ្ឋទំាងអស់មានការសហការគ្នាដើម្បីរាយការណ៍ជុំវិញប្រើប្រាស់ថ្នាំជក់នោះលោកថាអាចនឹងមានប្រសិទ្ធិភាពច្រើន។ យ៉ាងណាក៏ដោយលោកថាជំរើសល្អជាងនេះទៀតស្ថាប័នពាក់ព័ន្ធត្រូវសហការគ្នាដោយភាពស្មោះត្រង់នឹងធ្វើយ៉ាងណាកុំឲ្យមានការជ្រៀតជ្រែកពីម្ចាស់ក្រុមហ៊ុនថ្នាំជក់ទើបទទួលបានផលវិជ្ជមានច្រើនជាង។ លោកបន្ថែមថា៖ ”ដើម្បីឲ្យការអនុវត្តទៅបានល្អលុះត្រាតែមានការចូលរួមពីសមត្ថកិច្ចពាក់ព័ន្ធសហការគ្នារវាងក្រសួងសុខាភិបាល ពីអាជ្ញាធរមូលដ្ឋាន ហើយប្រជាពលរដ្ឋផង ជាពិសេសធ្វើយ៉ាងណាកុំឲ្យមានការជ្រៀតជ្រែកពីក្រុមហ៊ុនថ្នាំជក់ទៅក្នុងហ្នឹងពីព្រោះថាបើមានការជ្រៀតជ្រែកហើយការអនុវត្តហ្នឹងនឹងធូរលុងបាទ”។
របាយការណ៍របស់ក្រសួងផែនការឆ្នាំ២០១៤បង្ហាញថាអ្នកមិនជក់បារី៦០ភាគរយកំពុងស្រូបផ្សែងបារីពីគេ។ ទីកន្លែងដែលប្រជាពលរដ្ឋកម្ពុជាស្រូបផ្សែងបារីពីគេខ្ពស់ជាងគេគឺនៅភោជនីយដ្ឋាន/អាហារដ្ឋាន(៧៦ភាគរយ) នៅក្នុងអគារធ្វើការរបស់រដ្ឋ(៤៩ភាគរយ) និងនៅពេលធ្វើដំណើរការតាមមធ្យោបាយធ្វើដំណើរសាធារណៈ(៣៤ភាគរយ)៕