អភិបាលកិច្ច

រដ្ឋាភិបាលសម្រេចដំឡើងប្រាក់បំណាច់មុខងារដល់យោធិននៃកងយោធពលខេរភូមិន្ទ

កញ្ញា ខាន់ លក្ខិណា
| ១១ មីនា ២០១៦
ម៉ោង ១៤:៤៩

រដ្ឋាភិបាលបានសម្រេចដំឡើងប្រាក់បំណាច់មុខងារដល់យោធិននៃកងយោធពលខេរភូមិន្ទ ដោយអះអាងថាដើម្បីធានាបាននូវប្រសិទ្ធភាពនិងបង្កើនផលិតភាពការងារ ដែលការដំឡើងនេះនឹងអនុវត្តចាប់ថ្ងៃទី១ ខែមេសា ឆ្នាំ២០១៦។ នេះបើយោងតាមអនុក្រឹត្យ ចុះថ្ងៃទី៩ ខែមិនា ឆ្នាំ២០១៦ ដោយលោកនាយករដ្ឋមន្ត្រី ហ៊ុន សែន រដ្ឋមន្រ្តីក្រសួងការពារជាតិ ក្រសួងសេដ្ឋកិច្ច និងក្រសួងមុខងារសាធារណៈ។

បើតាមអនុក្រឹត្យនោះ អគ្គមេបញ្ជាការទទួលបានប្រាក់បំណាច់១៧៥០០០០រៀល អគ្គមេបញ្ជាការរងទទួលបានប្រាក់បំណាច់១៥០០០០០រៀល មេបញ្ជាការយោធភូមិភាគទទួលបានប្រាក់បំណាច់១៣០០០០០រៀល មេបញ្ជាការកងពលធំ(ឬរងយោធភូមិភាគ)ទទួលបានប្រាក់បំណាច់៧០០០០០រៀល មេបញ្ជាការកងពលតូច(ឬរងកងពលធំ)ទទួលបានប្រាក់បំណាច់៦០០០០០រៀល។

ចំណែកមេបញ្ជាការកងវរសនាធំ(ឬរងកងពលតូច) ទទួលបានប្រាក់បំណាច់៤២០០០០រៀល មេបញ្ជាការកងវរសនាតូច(ឬរងកងពលធំ)ទទួលបានប្រាក់បំណាច់៣១០០០០រៀល មេបញ្ជាការរងកងវរសេនាតូចទទួលបានប្រាក់បំណាច់២៥០០០០រៀល មេបញ្ជាការកងអនុសេនាធំ២១០០០០រៀល មេបញ្ជាការរងកងអនុសេនាធំ ទទួលបានប្រាក់បំណាច់១៩០០០០រៀល និងមេបញ្ជាការកងអនុសេនាតូច១៨០០០០រៀល មេបញ្ជាការរងកងអនុសេនាតូច១៧០០០០រៀល។

បើតាមអនុក្រឹត្យ នាយក្រុមទទួលបានប្រាក់បំណាច់១៦៥០០០រៀល នាយរងក្រុមទទួលបានប្រាក់បំណាច់១៦០០០០រៀល នាយពួកទទួលបានប្រាក់បំណាច់១៥៥០០០រៀលនិងយុទ្ធជនទទួលបានប្រាក់បំណាច់១៥០០០០រៀល ។

អនុក្រឹត្យបញ្ជាក់ថាយោធិនដែលមានសិទ្ធិទទួលបានប្រាក់បំណាច់មុខងារត្រូវសិ្ថតនៅក្នុងលក្ខខណ្ឌដូចជាកំពុងបំពេញការងារក្នុងកងយោធពលខេមរភូមិន្ទ កំពុងផ្លាស់ប្ដូរកន្លែងធ្វើការនិងកំពុងធ្វើដំណើរទៅកាន់មុខតំណែងនៅក្នុងឬក្រៅប្រទេស កំពុងបំពេញការសិក្សាក្នុងឬក្រៅប្រទេសតាមតម្រូវការរបស់កងទ័ព យោធិនពលី មរណៈ ពិការ និវត្តជន បាត់បង់សមត្ថភាពការងារដែលមិនទាន់ផ្ទេរទៅឲ្យក្រសួងទទួលបន្ទុកអតីតជនគ្រប់គ្រងបន្ត និង យោធិនដែលទទួលការអនុញ្ញាតច្បាប់ក្នុងធុរៈផ្ទាល់ រយៈពេលសម្រាកព្យាបាលជំងឺនិងបាត់បង់ខ្លួនក្នុងបេសកកម្ម។

អ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថាប្រាក់បំណាច់មុខងារដែលទើបដំឡើងនេះ មិនលើសប្រាក់បំណាច់មុខងារចាស់ប៉ុន្មាននោះទេ។

គួរបញ្ជាក់ថាកាលពីថ្ងៃព្រហស្បតិ៍ រដ្ឋាភិបាលបានផ្សព្វផ្សាយអនុក្រឹត្យជាបន្តបន្ទាប់ស្តីពីការដំឡើងប្រាក់បំណាច់មុខងារដល់មន្រ្តីរាជការស៊ីវិល មន្រ្តីតុលាការគ្រប់លំដាប់ថ្នាក់និងប្រាក់ឧបត្ថម្ភសម្រាប់សមាជិកក្រុមប្រឹក្សាថ្នាក់ក្រោមជាតិជាដើម៕

កងយោធពលខេរភូមិន្ទ, ប្រាក់បំណាច់មុខងារ, រដ្ឋាភិបាល

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។