​ក្រសួង​មហាផ្ទៃ​ច្រានចោល​សំណើ​លោក​ញឹក ប៊ុនឆៃ​សុំ​លុបចោល​លទ្ធផល​សមាជ​គណបក្ស​ហ្វ៊ុន​ស៊ិនប៉ិច​

​ក្រសួង​មហាផ្ទៃ​ច្រានចោល​សំណើរ​របស់​លោក ញឹក ប៊ុនឆៃ អតីត​អនុប្រធាន​ទី​២ នៃ​គណបក្ស ហ្វ៊ុន​ស៊ិនប៉ិច ដែល​ស្នើ​សុំ​មោឃភាព​លទ្ធផល​សមា​ជគ​ណ​បក្ស​ហ្វ៊ុនស៊ិនប៉ិច​ កាលពី​ដើមឆ្នាំ​២០១៥ ដោយ​អះអាង​ថា សមាជ​នោះ​ធ្វើឡើង​ស្រប​តាម​ច្បាប់​។​

​ក្នុង​លិខិត​របស់​ក្រសួង​មហាផ្ទៃ​ចុះ​ថ្ងៃទី​១០ ខែ​មីនា ឆ្នាំ​២០១៦​លើកឡើងថា ខ្លឹមសារ​លក្ខន្តិ​កៈរបស់ គណបក្ស​ហ្វ៊ុនស៊ិនប៉ិច ដែល​មាន​តម្កល់ទុក​នៅ​ក្រសួងមហាផ្ទៃ កាលពី​ថ្ងៃ​ទី​២៩ ខែ​មេសា ឆ្នាំ​២០១៣ ក្នុង​ជំពូក​ទី​៤ ត្រង់​ប្រការ​១៥ ចែងថា សមាជ គឺជា​អង្គការ​កំពូល​របស់​គ​ណ​បក្ស ហើយ​សមាជិក​ចូលរួម​សមាជ​ទៅ​តាម​ការអញ្ជើញ​របស់​ប្រធាន​គណបក្ស​ឬ​ប្រធាន​គណបក្ស​ស្តីទី នៅពេល​ប្រធាន​បក្ស​អវត្តមាន​។ លិខិតបញ្ជាក់​ថា សមាជ​របស់​គនបក្ស​ហ៊ុនស៊ិនប៉ិច​កាលពី​ថ្ងៃ​ទី​១៩ ខែ​មករា ឆ្នាំ​២០១៥​នាពេលនោះ បាន​ប្រព្រឹត្តទៅ​ត្រឹមត្រូវ និង​ស្រប​តាម​ការកំណត់​។

​ម្យ៉ាងទៀត លិខិត​ដដែល​ឲ្យដឹងទៀតថា បច្ចុប្បន្ននេះ លោក ញឹម ប៊ុនឆៃ និង​សមាជិក​គណបក្ស​ហ្វ៊ុនស៊ិនប៉ិច​ចាស់​មួយចំនួន​បានរួម​គ្នា​បង្កើត​គណបក្ស​ថ្មី​មួយ​ឈ្មោះ គណបក្ស​ខ្មែរ​រួបរួម​ជាតិ ហើយ​ត្រូវបាន​ក្រសួង​មហាផ្ទៃ​ទទួលស្គាល់​ស្របតាម​ច្បាប់​ស្តីពី គណបក្សនយោបាយ​ផងដែរ​។​

​យ៉ាងណាក៏ដោយ វីអូឌី(VOD) មិនទាន់​សុំ​ការបំភ្លឺ​ជុំវិញ​ករណី​នេះ ពី​អតីត​អនុប្រធាន​ទី​២​នៃ​គណបក្ស​ហ្វ៊ុន​ស៊ិន លោក ញឹក ប៊ុនឆៃ បានទេ​។​

​គួរបញ្ជាក់​ថា ការបង្កើត​គណបក្ស​ថ្មី​របស់​លោក ញឹក ប៊ុនឆៃ កើតឡើង​ក្រោយ​ពេលដែល​វិវាទ​ផ្ទៃក្នុង គណបក្ស​ហ្វ៊ុនស៊ិនប៉ិច​បាន​ឡើង​កម្ដៅ​ជាថ្មី ក្រោយ​ការរួបរួម​គ្នា​ឡើងវិញ​។ កាលពី​ចុង​ខែ​មករា សម្ដេចក្រុមព្រះ​បាន​មាន​ព្រះបន្ទូល​រិះ គន់​ដោយ​មិន ចំឈ្មោះ ថា “​កុំ​ទទួល​ទានបាយ​ហើយ បោក​ឆ្នាំង​ចោល​” ដោយ​បន្ទូល​សម្តេច​ក្រុមព្រះ​ទំនង ជា​សំដៅ​ទៅលើ​លោក ញឹក ប៊ុនឆៃ ដែល​ជា​ដៃគូ​ជម្លោះ​ដ៏​ជូរ​ចត់​ពី​អតីតកាល​។ ចំណែក​លោក ញឹក ប៊ុនឆៃ ក៏​ធ្លាប់​រិះគន់ថា ក្រោម​ការដឹកនាំរបស់​ព្រះអង្គ​រយៈពេល​១​ឆ្នាំ គណបក្ស​ហ្វ៊ុនស៊ិនប៉ិច​​ មិន​មាន​ការរីកចម្រើន និង​នាំ​ឲ្យ​ប្រជាប្រិយភាពរបស់​បក្ស​ធ្លាក់ចុះ​។​

​លោក ញឹក ប៊ុនឆៃ ក៏​បាន​ស្នើ​ឲ្យ​សម្តេច​ក្រុមព្រះ​រៀបចំ​សិក្ខាសាលា​មួយ ដែល​មេដឹកនាំ​បក្ស​រូបនោះ​ថា ដើម្បី​បាន​ជម្រះ​មន្ទិល​ពី​ការចោទប្រកាន់​គ្នា​ទៅវិញទៅមក ទាក់ទិន​នឹង​ជម្លោះ​បែកបាក់​ផ្ទៃក្នុង​ពី​អតីតកាល តែ​សម្ដេច​ក្រុមព្រះ​បាន​បដិសេធ ដោយ​អះអាង​ថា របៀបវារៈ​ដែល​ស្នើ​ដោយ​លោក ញឹក ប៊ុនឆៃ គឺជា​បញ្ហា​ដែល​កើតឡើង​ពេល​ព្រះអង្គ​មិន​នៅក្នុង​ប្រទេស​៕​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ