កម្ពុជា-ថៃ នឹងប្រើពេល៤ថ្ងៃ សម្រាប់បើកកិច្ចប្រជុំមន្ត្រីថ្នាក់កំពូលនៃក្រសួងការពារជាតិ លើយន្តការពង្រឹងសន្តិសុខ និងទំនាក់ទំនងពីការអភិវឌ្ឍតាមខ្សែបន្ទាត់ព្រំដែននៃប្រទេសទាំងពីរ។
នៅថ្ងៃទី១៩ ខែមីនា ក្រសួងការពារជាតិ បានចេញសេចក្ដីប្រកាសព័ត៌មានមួយ បញ្ជាក់ថា គណៈកម្មាធិការព្រំដែនទូទៅរបស់កម្ពុជា និង ថៃនឹងបើកកិច្ចប្រជុំមួយ នៅទីក្រុងបាងកកប្រទេសថៃ ប្រើរយៈពេល៤ថ្ងៃ គឺចាប់ពីថ្ងៃទី២១ ដល់ថ្ងៃទី២៤ ខែ មីនា សប្តាហ៍ក្រោយនេះ។
ក្នុងសេចក្តីប្រកាសឲ្យដឹងទៀតថា កិច្ចប្រជុំនោះ ភាគីកម្ពុជា នឹងលើកឡើងពីបញ្ហា ការងារ សន្តិសុខ ទំនាក់ទំនង និងកិច្ចសហប្រតិបត្តការ ព្រមទាំងការកសាង និង អភិវឌ្ឍនៅតាមបណ្ដោយព្រំដែនប្រទេសជិតខាងទាំងពីរ។
ក្រសួងការពារជាតិឲ្យដឹងទៀតថា កិច្ចប្រជុំនោះ ភាគីកម្ពុជាដឹកនាំដោយ រដ្ឋមន្ត្រីក្រសួងការពារជាតិ លោក ទៀ បាញ់ ចំណែកភាគីថៃ ក្រសួងថា ដឹកនាំដោយ រដ្ឋមន្ត្រីក្រសួងការពារជាតិប្រទេសថៃ គឺ លោក ប្រាវិត វង្សសាវ៉ាន់ ។
គួរបញ្ជាក់ថា កិច្ចប្រជុំគណៈកម្មាធិការព្រំដែនទូទៅកម្ពុជា ថៃនេះកាលពីឆ្នាំ២០១៥ ធ្វើឡើងនៅប្រទេសកម្ពុជា មានន័យថាប្រទេសទាំង២ប្ដូរវេនគ្នាមួយឆ្នាំម្ដង ដើម្បីធ្វើជាម្ចាស់ផ្ទះសម្រាប់កិច្ចប្រជុំ៕
