អង្គភាពប្រឆាំងអំពើពុករលួយនឹងបើកប្រជុំមួយនៅថ្ងៃអង្គារស្អែកនេះ ដើម្បីវិភាគទៅលើពាក្យបណ្ដឹងរបស់យុវជនមួយក្រុមដែលបានប្ដឹងប្រធានស្តីទីគណបក្សសង្រ្គោះជាតិ លោក កឹម សុខា ដោយពួកគេចោទថាបានផ្ដល់លុយឲ្យនារីម្នាក់ទិញផ្ទះនិងដី។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ប្រាប់វីអូឌីនៅថ្ងៃចន្ទនេះថាលោកបានទទួលពាក្យបណ្តឹងរបស់ក្រុមយុវជនតាំងពីថ្ងៃសុក្រសប្ដាហ៍មុន។ លោកបន្តថាអង្គភាពប្រឆាំងអំពើពុករលួយនឹងបើកកិច្ចប្រជុំមួយនៅព្រឹកថ្ងៃអង្គារ ថាត្រូវចាត់ការឬយ៉ាងណា។ លោកមានប្រសាសន៍ថា៖ “ថ្ងៃអង្គារម៉ោង ៩ព្រឹក យើងនឹងប្រជុំដោះស្រាយ យើងនិងអញ្ចើញម្ចាស់ប្ដឹងមកស្ដាប់ការវិភាគរបស់យើង ហើយអ្នកសារព័ត៌មានក៏អាចចូលស្ដាប់បានដែរ”។
កាលពីថ្ងៃសុក្រសប្ដាហ៍មុន យុវជនមួយក្រុមមានគ្នាប្រមាណ៣០នាក់ដែលអះអាងថាជានិស្សិតមកពីសាកលវិទ្យាល័យរដ្ឋនិងឯកជន បានដាក់ពាក្យបណ្ដឹងទៅអង្គភាពប្រឆាំងអំពើពុករលួយ ដោយក្រុមយុវជនអះអាងថាពួកគេសង្ស័យថា លោក កឹម សុខា បានផ្ដល់លុយឲ្យស្រីស្នេហ៍ទិញផ្ទះនិងដី ហើយអាចជាប់ពាក់ព័ន្ធអំពើពុករលួយ ។
តំណាងក្រុមយុវជនម្នាក់ លោក ស្រី ចំរើន បានឲ្យដឹងថាពួកគេចង់ឲ្យអង្គភាពប្រឆាំងអំពើពុករលួយស៊ើបអង្កេតលើសំឡេងខ្សែអាត់ដែលត្រូវគេអះអាងថាជាការសារសងរវាងលោក កឹម សុខា ជាមួយនារីកំណាន់ចិត្ត ដោយអត្ថន័យនៃខ្សែអាត់នោះក៏មានការលើកឡើងពីការទិញដីនិងផ្ទះឲ្យនារីនោះផងដែរ។
គួរបញ្ជាក់ថាកាលពីថ្ងៃទី១៤ ខែមីនា យុវជនក្រុមនេះក៏បាននាំគ្នាដាក់ញត្តិទៅរដ្ឋសភា ដើម្បីឲ្យស្ថាប័ននេះកោះហៅលោក កឹម សុខា ចេញមុខបកស្រាយរឿងខ្សែអាត់សំឡេងនោះផងដែរ។ ចំណែកកាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានអះអាងថាលោកមានរូបភាពអ្នកនយោបាយល្បីឈ្មោះម្នាក់នាំស្រីទៅចូលសណ្ឋាគារមួយនៅទីក្រុងបាងកកប្រទេសថៃ។ ថ្វីត្បិតតែលោក ហ៊ុន សែន មិនបានបញ្ចេញឈ្មោះអ្នកនយោបាយនោះក៏ដោយ តែមជ្ឈដ្ឋានជាច្រើនគិតថាលោកនាយករដ្ឋមន្រ្តីសំដៅដល់លោក កឹម សុខា ដែលកំពុងរងការចោទថាមានរឿងអាស្រូវស្នេហា៕