រដ្ឋាភិបាលឥណ្ឌូនេស៊ីកំពុងរងចាំដំណឹងពីប្រទេសហ្វីលីពីនអំពីការសម្រេចថាតើអាចចូលរួមសហការក្នុងការជួយឲ្យដោះលែងនាវិករបស់ខ្លួន១០នាក់ដែលពួកក្រុមឧទ្ទាម Abu Sayyaf ចាប់ពង្រត់ឬទេ។
អគ្គស្នងការនគរបាលជាតិឥណ្ឌូនេស៊ីលោក Badrodin Haiti ថ្លែងកាលពីថ្ងៃពុធម្សិលមិញថាពេលនេះរដ្ឋាភិបាលកំពុងតែរងចាំដំណឹងពីសមភាគីហ្វីលីពីនក្នុងការសម្រេចសហការជាមួយរដ្ឋអំណាចចាការតាដែលជាផ្នែកមួយក្នុងការជួយសង្គ្រោះនាវិកឥណ្ឌូនេស៊ីចំនួន១០នាក់មកវិញដែលចាប់ពង្រត់ដោយក្រុមឧទ្ទាមឥស្លាម Abu Sayyaf នៅភាគខាងត្បូងនៃប្រទេសហ្វីលីពីន។ នេះបើតាមសារព័ត៌មាន Channel News Asia។
Abu Sayyaf គឺជាក្រុមឧទ្ទាមឥស្លាមនៅភាគនិរតីនៃប្រទេសហ្វីលីពីន នៅលើកោះសូឡូនិងកោះបាស៊ីឡេន។ ក្រុមនេះបានកើតឡើងជាង៤ទសវត្សរ៍មកហើយ។
នាវិកឥណ្ឌូនេស៊ីចំនួន១០នាក់ដែលបាត់ខ្លួនត្រូវបានគេសង្ស័យថាត្រូវពួកក្រុមឧទ្ទាម Abu Sayyaf ចាប់ខ្លួនកាលពីសប្តាហ៍មុននៅពេលដែលពួកគេធ្វើដំណើរពីកោះប័រណេអូទៅកោះបាតាងហ្គាសនៅភាគខាងត្បូងហ្វីលីពីន ដែលនាវារបស់ពួកគេមានដឹកទំនិញ៧០០០តោន៕