តុលាការរាជធានីភ្នំពេញនៅមិនទាន់ធ្វើការចោទប្រកាន់លើតំណាងរាស្ត្រគណបក្សសង្គ្រោះជាតិលោក អ៊ុំ សំអាន នៅឡើយទេ ដោយតុលាការនឹងបន្តធ្វើការសាកសួរទៀតនៅព្រឹកថ្ងៃស្អែក។
មេធាវីការពារក្ដីឲ្យលោក អ៊ុំ សំអាន គឺលោក ជូង ជូងី បានថ្លែងប្រាប់អ្នកសារព័ត៌មានពេលចេញពីសាលាដំបូងរាជធានីភ្នំពេញនៅយប់ថ្ងៃចន្ទនេះថា បន្ទាប់ពីការសាកសួរអស់រយៈពេលជាង៣ម៉ោង តុលាការមិនទាន់សម្រេចចោទប្រកាន់លើលោក អ៊ុំ សំអាន នោះទេ ដោយលោកថា តុលាការនឹងធ្វើ ការសាកសួរបន្តទៀតនៅថ្ងៃអង្គារស្អែកវេលាម៉ោង៧ព្រឹក។
បើតាមប្រធាននាយកដ្ឋានប្រឆាំងភេរវកម្មនៃក្រសួងមហាផ្ទៃ លោក អ៊ី សុខឃី បានឲ្យដឹងថា លោក អ៊ុំ សំអាន នឹងត្រូវឃុំខ្លួនបណ្ដោះអាសន្ននៅក្រសួងមហាផ្ទៃ។
លោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានសមត្ថកិច្ចចាប់ខ្លួននៅយប់រំលងអធ្រាត្រថ្ងៃអាទិត្យ ក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ។ លោកបានចាកចេញពីប្រទេសអស់រយៈពេលជាង៧ខែ ហើយបានវិលត្រឡប់មកប្រទេសកម្ពុជាវិញកាលពីព្រឹកថ្ងៃអាទិត្យ។
នៅថ្ងៃចន្ទនេះ នាយកដ្ឋានប្រឆាំងភេរវកម្មនៃក្រសួងមហាផ្ទៃបានធ្វើការសាកសួរលោក អ៊ុំ សំអាន អស់រយៈពេលជាង៧ម៉ោង ដោយបានសម្រេចចោទប្រកាន់លោកថាបានញុះញង់ឲ្យមានចលាចលក្នុងសង្គម រួចបញ្ជូនករណីនេះទៅតុលាការ។
លោក អ៊ុំ សំអាន បានប្រាប់អ្នកសារព័ត៌មានក្រោយពេលបញ្ចប់ការសាកសួរនៅក្រសួងមហាផ្ទៃថា នេះជារឿងអយុត្តិធម៌សម្រាប់រូបលោក។ លោកបន្តថាលោកមិនស្តាយក្រោយនោះទេ ដែលមកកម្ពុជា ហើយត្រូវបានចាប់ខ្លួន។
មុនពេលចាប់ខ្លួន លោក អ៊ុំ សំអាន ប្រាប់វីអូឌីថាលោកមិនភ័យខ្លាចនឹងការចាប់ខ្លួននោះទេ។ កន្លងទៅ រដ្ឋាភិបាលព្រមានចាត់វិធានការផ្លូវច្បាប់ប្រឆាំងនឹងនិយាយថារដ្ឋាភិបាលប្រើប្រាស់ផែនទីក្លែងក្លាយ។ លោក អ៊ុំ សំអាន ត្រូវបានលើកឡើងថាជាមនុស្សម្នាក់អាចរដ្ឋាភិបាលចាត់វិធានការ។
អ្នកនាំពាក្យគណបក្សសង្រ្គោះជាតិ លោក យឹម សុវណ្ណ ចាត់ទុកការចាប់ខ្លួនតំណាងរាស្រ្តបក្សប្រឆាំងនេះជាការរំលោភទៅនឹងរដ្ឋធម្មនុញ្ញ។ លោកមានប្រសាសន៍ថា៖ “គាត់មានអភ័យឯកសិទ្ធិ គាត់នៅជាតំណាងរាស្រ្តគណបក្សសង្រ្គោះជាតិខេត្តសៀមរាប ហើយឥឡូវគណបក្សកាន់អំណាច គេចាប់ខ្លួនគាត់ អាហ្នឹងជាទង្វើផ្ទុយនឹងរដ្ឋធម្មនុញ្ញ ហើយរំលោភអភ័យឯកសិទ្ធិអ្នកតំណាងរាស្រ្ត”។
លោកចាត់ទុកការចាប់ខ្លួនលោក អ៊ុំ សំអាន ជាការព្រមានដល់សេរីភាពនៃការបញ្ចេញមតិលើបញ្ហាព្រំដែន។
យ៉ាងណាក៏ដោយ អ្នកនាំពាក្យរដ្ឋសភា លោក ឡេង ប៉េងឡុង បានប្រាប់វីអូឌីថា ការចាប់ខ្លួនតំណាងរាស្រ្តបានលុះត្រាតែមានបទល្មើសជាក់ស្តែង។ លោកបានប្រៀបធៀបករណីលោក អ៊ុំ សំអាន ទៅនឹងករណីលោក ហុង សុខហួរ ដែលត្រូវបានរដ្ឋាភិបាលចាប់ខ្លួន ពាក់ព័ន្ធនឹងការចោទប្រកាន់រឿងប្រើប្រាស់ឯកសារក្លែងក្លាយ ទាក់ទងនឹងសន្ធិសញ្ញាព្រំដែនជាមួយវៀតណាម។ លោកបញ្ជាក់ថា៖ “អាហ្នឹងវាមានបទល្មើសជាក់ស្តែង ដូចលោក ហុង សុខហួរ អញ្ចឹង”។
ចំណែកស្ថានទូតអាមេរិកប្រចាំប្រទេសកម្ពុជាបានអំពាវនាវឲ្យរដ្ឋាភិបាលកម្ពុជាពន្យល់ពីមូលហេតុនៃការចាប់ខ្លួនលោក អ៊ុំ សំអាន ដោយសារលោកក៏មានសញ្ជាតិអាមេរិកផងដែរ។
អ្នកនាំពាក្យរងរបស់ស្ថានទូតអាមេរិកប្រចាំកម្ពុជា លោក Woods Courtney ប្រាប់វីអូឌីតាមរយៈអ៊ីម៉េលថា ក្រសួងការបរទសអាមេរិកមានកាតព្វកិច្ចផ្តល់ជំនួយដល់ប្រជាពលរដ្ឋសញ្ជាតិអាមេរិកនៅក្រៅប្រទេសយ៉ាងយកចិត្តទុកដាក់។ លោកមានប្រសាសន៍ថា៖ “យើងអំពាវនាវដល់រដ្ឋាភិបាលកម្ពុជាឲ្យពន្យល់ពីការចោទប្រកាន់ប្រឆាំងលោក អ៊ុំ សំអាន។ ក្រសួងការបរទេសអាមេរិកមានតួនាទីជួយដល់ប្រជាពលរដ្ឋសញ្ជាតិអាមេរិកនៅក្រៅប្រទេសយ៉ាងយកចិត្តទុកដាក់។ យើងត្រៀមខ្លួនរួចរាល់ហើយក្នុងការផ្តល់សេវាផ្នែកកុងស៊ុលគ្រប់កាលៈទេសៈ”។
គួរបញ្ជាក់ថាក្នុងឆ្នាំ២០០៤ លោក អ៊ុំ សំអាន បានសុំសិទ្ធិជ្រកកោនផ្នែកនយោបាយនៅសហរដ្ឋអាមេរិកដែលជាកន្លែងលោកបានបន្តការសិក្សាថ្នាក់អនុបណ្ឌិតផ្នែកគ្រប់គ្រងនិងបណ្ឌិតផ្នែករដ្ឋបាលសាធារណៈ តាមរយៈការផ្តល់ជំនួយដោយរដ្ឋាភិបាលអាមេរិក នៅពេលដែលស្ថានភាពនយោបាយក្នុងប្រទេសកម្ពុជាមិនសូវល្អ។ រស់នៅសហរដ្ឋអាមេរិកអស់រយៈពេលជាង៨ឆ្នាំ លោក អ៊ុំ សំអាន ទើបតែទទួលបានសញ្ជាតិអាមេរិក កាលពីចុងឆ្នាំ២០១២។ បន្ទាប់ពីរស់នៅសហរដ្ឋអាមេរិកអស់រយៈពេលជាច្រើនឆ្នាំ លោក អ៊ុំ សំអាន បានត្រឡប់ចូលមកប្រទេសកម្ពុជាវិញ ហើយក្នុងឆ្នាំ២០១៣ លោកបានឈរឈ្មោះជាតំណាងរាស្រ្តមណ្ឌលខេត្តសៀមរាបហើយលោកក៏មានឱកាសជាប់ជាតំណាងរាស្រ្តមួយរូប៕