គណបក្សសង្គ្រោះជាតិបានអំពាវនាវឲ្យអាជ្ញាធរដោះលែងតំណាងរាស្រ្តមណ្ឌលសៀមរាប លោក អ៊ុំ សំអាន ដោយបានថ្កោលទោសនិងចាត់ទុកការចាប់ខ្លួននេះបំពាន“យ៉ាងធ្ងន់ធ្ងរ”លើអភ័យឯកសិទ្ធិអ្នកតំណាងរាស្ត្រ។
នៅក្នុងសេចក្តីថ្លែងការណ៍មួយចេញផ្សាយនៅព្រឹកថ្ងៃចន្ទនេះ គណបក្សប្រឆាំងបានថ្កោលទោស“យ៉ាងដាច់អហង្កា” ចំពោះការចាប់ខ្លួនលោក អ៊ុំ សំអាន កាលពីយប់រំលងអាធ្រាត្រឈានចូលថ្ងៃទី១១ ខែមេសា ឆ្នាំ២០១៦។ ក្នុងសេចក្តីថ្លែងការណ៍ដដែល គណបក្សប្រឆាំងមួយនេះបានលើកយកមាត្រា៨០នៃរដ្ឋធម្មនុញ្ញដែលចែងថាតំណាងរាស្ត្រមានអភ័យឯកសិទ្ធិ តំណាងរាស្រ្តមិនអាចត្រូវចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយសារការសម្តែងមតិឬបញ្ចេញមតិនោះឡើយ។
បើតាមសេចក្តីថ្លែងការណ៍នោះ គណបក្សសង្គ្រោះជាតិទាមទារឲ្យអាជ្ញាធរដោះលែង លោក អ៊ុំ សំអាន ជាបន្ទាន់។ គណបក្សប្រឆាំងសរសេរទៀតថា៖ “សូមរាជរដ្ឋាភិបាលនិងអាជ្ញាធររដ្ឋគ្រប់លំដាប់ថ្នាក់ អនុវត្តតួនាទី ភារកិច្ចរបស់ខ្លួនដោយអនុលោមតាមច្បាប់ និងរដ្ឋធម្មនុញ្ញ ចៀសវាងការប្រព្រឹត្តអំពើរំលោភបំពានដែលផ្ទុយពីគោលការណ៍នៃនីតិរដ្ឋ”។
អ្នកនាំពាក្យគណបក្សសង្រ្គោះជាតិ លោក យឹម សុវណ្ណ ចាត់ទុកការចាប់ខ្លួនលោក អ៊ុំ សំអាន ជាការព្រមានដល់សេរីភាពនៃការបញ្ចេញមតិលើបញ្ហាព្រំដែន។ លោកមានប្រសាសន៍ថា៖ “ខ្ញុំជឿថាទង្វើទាក់ទងនឹងរឿងទឹកដីនេះ គឺជាទង្វើស្នេហាជាតិ ជាឧត្តមគិតរបស់ប្រជាពលរដ្ឋខ្មែរម្នាក់ៗ គឺជាកាតព្វកិច្ចដែលអ្នកតំណាងរាស្រ្តត្រូវតែបញ្ចេញមតិ ខ្ញុំយល់ឃើញថាការចាប់ខ្លួននេះធ្វើឲ្យអ្នកដែលគិតគូរឿងបញ្ហាព្រំដែនមានការភ័យខ្លាច កាលណាតែប្រជាពលរដ្ឋមានការភ័យខ្លាច ប្រជាពលរដ្ឋនឹងមិនហ៊ានបញ្ចេញមតិ(ទាក់ទងនឹងបញ្ហាព្រំដែន)”។
ទោះយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថាការចាប់ខ្លួនលោក អ៊ុំ សំអាន នេះគឺផ្អែកទៅលើបទល្មើសជាក់ស្តែង។ លោកបន្ថែមថា៖ “ឯកឧត្តម អ៊ុំ សំអាន ប្រព្រឹត្តអំពើល្មើសចាក់ស្តែង ដូចឯកឧត្តម ហុង សុខហួរ(អតីតសមាជិកព្រឹទ្ធសភារបស់គណបក្ស សម រង្ស៊ី) អ៊ីចឹង អាហ្នឹងត្រូវមានវិធានការជាក់ស្តែងហើយ”។
អ្នកនាំពាក្យរដ្ឋសភា លោក ឡេង ប៉េងឡុង ប្រាប់វីអូឌីថាការចាប់ខ្លួនតំណាងរាស្រ្តបានលុះត្រាតែមានបទល្មើសជាក់ស្តែង។ លោកបានប្រៀបធៀបករណីលោក អ៊ុំ សំអាន ទៅនឹងករណីលោក ហុង សុខហួរ ដែលត្រូវបានរដ្ឋាភិបាលចាប់ខ្លួន ពាក់ព័ន្ធនឹងការចោទប្រកាន់រឿងប្រើប្រាស់ឯកសារក្លែងក្លាយ ទាក់ទងនឹងសន្ធិសញ្ញាព្រំដែនជាមួយវៀតណាម។ លោកបញ្ជាក់ថា៖ “អាហ្នឹងវាមានបទល្មើសជាក់ស្តែង ដូចលោក ហុង សុខហួរ អញ្ចឹង”។ លោកបន្ថែមថាអ្វីៗអាស្រ័យលើតុលាការ។
គួរបញ្ជាក់ថា លោក អ៊ុំ សំអាន បានវិលត្រឡប់ពីអាមេរិកមកកម្ពុជាវិញនៅព្រឹកថ្ងៃអាទិត្យ បន្ទាប់ពីលោកបានចាកចេញពីកម្ពុជាជាង៧ខែ។ លោកត្រូវបានសមត្ថកិច្ចចាប់ខ្លួននៅខេត្តសៀមរាបនិងបានបញ្ជូនខ្លួនមកសាកសួរនៅក្រសួងមហាផ្ទៃនៅព្រឹកនេះ ពាក់ព័ន្ធនឹងបទចោទថាបានប្រើប្រាស់ផែនទីក្លែងក្លាយ៕
