ក្រុមអង្គការសង្គមស៊ីវិលជាង១០ស្ថាប័នថ្កោលទោសការចាប់ខ្លួនតំណាងរាស្ត្រគណបក្សសង្គ្រោះជាតិលោក អ៊ុំ សំអាន ដោយសង្គមស៊ីវិលចាត់ទុកថាការចាប់ខ្លួននេះផ្ទុយនឹងរដ្ឋធម្មនុញ្ញ និងបង្ហាញពីការរួមតូចនៃលំហប្រជាធិបតេយ្យ ព្រមទាំងការមិនទទួលយកនូវនយោបាយបែបពហុបក្សនៅកម្ពុជា។
លោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានចាប់ខ្លួននៅយប់រំលងអធ្រាត្រថ្ងៃអាទិត្យ ក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ។
ក្នុងសេចក្ដីថ្លែងការណ៍រួមចេញផ្សាយនៅថ្ងៃនេះ អង្គការសមាគមចំនួន១៣ស្ថាប័នផ្សេងគ្នាបានលើកឡើងថា ការចាប់ខ្លួនលោក អ៊ុំ សំអាន គឺជា “ការបំពានយ៉ាងច្បាស់” ទៅលើអភ័យឯកសិទ្ធិរបស់តំណាងរាស្ត្រដែលធានាដោយរដ្ឋធម្មនុញ្ញត្រង់មាត្រា៨០។ សេចក្ដីថ្លែងការណ៍បន្តថា លទ្ធិប្រជាធិបតេយ្យល្អទាមទារឲ្យមានការការពារដ៏រឹងមាំដល់មតិយោបល់នានា ហើយទស្សនៈនយោបាយនានាត្រូវបានស្ដាប់ និងទទួលយក។
សេចក្ដីប្រកាសព័ត៌មានបន្ថែមថា ការចាប់ខ្លួនលោក អ៊ុំ សំអាន ជាឧទាហរណ៍មួយទៀតជុំវិញឥទ្ធិពលនៃការបង្ក្រាបជាប្រព័ន្ធទៅលើគណបក្សជំទាស់នៅកម្ពុជា។ ក្នុងសេចក្ដីប្រកាសព័ត៌មានដដែល សង្គមស៊ីវិលក៏បានលើកឡើងពីករណីចាប់ខ្លួនសមាជិកព្រឹទ្ធសាភគណបក្ស សម រង្ស៊ី គឺលោក ហុង សុខហួរ កាលពីខែសីហា ឆ្នាំ២០១៥ និងការចោទប្រកាន់លើប្រធានគណបក្សប្រឆាំង លោក សម រង្ស៊ី ជាច្រើនបទល្មើសដូចជា បទបរិហារកេរ្តិ៍ បទញុះញង់ និងជាអ្នកសមគំនិតក្នុងការក្លែងបន្លំឯកសារ ដោយសង្គមស៊ីវិលចាត់ទុកថា ការចោទប្រកាន់ទាំងនោះជាការចោទប្រកាន់គ្មានមូលដ្ឋាន។
សេចក្ដីប្រកាសព័ត៌មានបន្តថា៖ “ការធ្វើទុក្ខបុកម្នេញដោយគ្មានការអត់ឱនទៅលើគណបក្សជំទាស់កើតឡើងនាប៉ុន្មានខែថ្មីៗនេះ និងការរួមតូចនៃលំហប្រជាធិបតេយ្យនៅក្នុងប្រទេសកម្ពុជាគឺជាសញ្ញាគួរឲ្យព្រួយបារម្ភជាងខ្លាំង ជាពិសេសសម្រាប់ការបោះឆ្នោតឃុំ សង្កាត់ឆ្នាំ២០១៧ និងការបោះឆ្នោតសកលឆ្នាំ២០១៨នាពេលខាងមុខនេះ”។
អង្គការសមាគមដែលបានចេញសេចក្ដីថ្លែងការណ៍រួមនោះមានដូចជា សម្ព័ន្ធសហជីពកម្ពុជា មជ្ឈមណ្ឌលសិទ្ធិមនុស្សកម្ពុជា (CCHR) សម្ព័ន្ធភាពការពារសិទ្ធិមនុស្សកម្ពុជា (CHRAC) សមាគមនអាដហុក មជ្ឈមណ្ឌលអប់រំច្បាប់សម្រាប់សហគមន៍ (CLEC) និងអង្គការខុមហ្វ្រែល ព្រមទាំងអង្គការសមាគមមួយចំនួនទៀត។
គួរបញ្ជាក់ថា នៅថ្ងៃអង្គារនេះ ព្រះរាជអាជ្ញានៅសាលាដំបូងរាជធានីភ្នំពេញបានចោទប្រកាន់លោក អ៊ុំ សំអាន ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍(បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម)និងបទញុះញង់ឲ្យមានការរើសអើងតាមមាត្រា៤៩៥និង៤៩៦នៃក្រមព្រហ្មទណ្ឌ ដែលប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៥និងរហូតដល់ថ្ងៃទី១០ខែមេសា ឆ្នាំ២០១៦។ លោក អ៊ុំ សំអាន ត្រូវបានចៅក្រមស៊ើបសួរសម្រេចឃុំខ្លួនបណ្ដោះអាសន្ននៅពន្ធនាគារ ដោយស្ថិតនៅក្រោមការពិនិត្យលើបទចោទទាំងពីរ។
គណបក្សសង្រ្គោះជាតិចាត់ទុកការចាប់ខ្លួនលោក អ៊ុំ សំអាន ថាជាការរំលោភលើរដ្ឋធម្មនុញ្ញ ដោយគណបក្សបក្សប្រឆាំងអំពាវនាវឲ្យមានការដោះលែងតំណាងរាស្ត្ររបស់ខ្លួន។
ទោះយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន និងអ្នកនាំពាក្យរដ្ឋសភា លោក ឡេង ប៉េងឡុង មានប្រសាសន៍ថា ការចាប់ខ្លួនលោក អ៊ុំ សំអាន នេះគឺផ្អែកទៅលើបទល្មើសជាក់ស្តែង។
ចំណែក ស្ថានទូតអាមេរិកប្រចាំប្រទេសកម្ពុជាបានអំពាវនាវឲ្យរដ្ឋាភិបាលកម្ពុជាពន្យល់ពីមូលហេតុនៃការចាប់ខ្លួនលោក អ៊ុំ សំអាន ដោយសារលោកក៏មានសញ្ជាតិអាមេរិកផងដែរ៕