ប្រធានស្តីទីគណបក្សសង្រ្គោះជាតិ លោក កឹម សុខា ដែលកំពុងរងការចោទប្រកាន់រឿងអាស្រូវស្នេហា នៅថ្ងៃអង្គារអំពាវនាវឲ្យ”បញ្ឈប់ហែកហួរគ្នា” ស្របពេលរដ្ឋាភិបាលបានចាប់ខ្លួនតំណាងរាស្រ្តបក្សប្រឆាំង លោក អ៊ុំ សំអាន។
លោក កឹម សុខា បានសរសេរនៅលើហ្វេសប៊ុករបស់លោកនៅព្រឹកថ្ងៃអង្គារនេះថា៖ “ឆ្នាំថ្មី ខ្ញុំសូមអំពាវនាវដល់ខ្មែរគ្រប់និន្នាការ បញ្ឈប់ការហែកហួរគ្នា បែកបាក់គ្នាពីពេលនេះតទៅ ដោយចាប់យកការផ្សះផ្សាជាតិ បង្រួបបង្រួមជាតិខ្មែរពិតប្រាកដវិញ”។
ការថ្លែងរបស់លោក កឹម សុខា ធ្វើឡើងបន្ទាប់ពីលោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានចាប់ខ្លួននៅយប់រំលងអធ្រាត្រថ្ងៃអាទិត្យ ក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ។ គណបក្សសង្រ្គោះជាតិបានថ្កោលទោសការចាប់ខ្លួននេះ និងអំពាវនាវឲ្យដោះលែង លោក អ៊ុំ សំអាន។
ស្ថានភាពនយោបាយចាប់ផ្តើមឡើងកម្តៅឡើងវិញមួយរយៈពេលចុងក្រោយនេះ ស្របពេលមានការចាប់ខ្លួនតំណាងរាស្រ្ត និងលោក កឹម សុខា កំពុងប្រឈមនឹងការចោទប្រកាន់រឿងអាស្រូវស្នេហាហើយអង្គភាពប្រឆាំងអំពើពុករលួយកំពុងស៊ើបអង្កេតករណីនេះ។
គួរបញ្ជាក់ថាលោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានចាប់ខ្លួននៅយប់រំលងអធ្រាត្រថ្ងៃអាទិត្យ ក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ។ លោកបានចាកចេញពីប្រទេសអស់រយៈពេលជាង៧ខែ ហើយបានវិលត្រឡប់មកប្រទេសកម្ពុជាវិញកាលពីព្រឹកថ្ងៃអាទិត្យ៕