មនុស្ស​៤៤២នាក់​បាន​ស្លាប់​ដោយសារគ្រោះថ្នាក់ចរាចរណ៍​ក្នុង​រយៈ​ពេល​៧​ថ្ងៃ​នៃ​សង្ក្រាន្ត​ឆ្នាំ​ថ្មី​នៅ​ថៃ

(រូបភាពពី BangkokPost)

គ្រោះថ្នាក់ចរាចរណ៍នៅក្នុងប្រទេសថៃរយៈពេល៧ថ្ងៃនៃការប្រារព្ធពិធីបុណ្យចូលឆ្នាំថ្មីបានសម្លាប់មនុស្សអស់៤៤២នាក់ ច្រើនជាងឆ្នាំមុន៧៨នាក់ ដោយការបើកបរក្នុងពេលស្រវឹងគឺជាមូលហេតុចម្បងដែលនាំឲ្យមានគ្រោះថ្នាក់។

កាសែតបាងកកប៉ុស្តិ៍បានចុះផ្សាយដោយដកស្រង់សម្ដីរដ្ឋមន្ត្រីក្រសួងមហាផ្ទៃនិងជាប្រធានមជ្ឈមណ្ឌលដឹកនាំសុវត្ថិភាពចរាចរណ៍ លោក អានុពង្ស ផៅចិន្តា ថាក្នុងរយៈពេល៧ថ្ងៃនៃការប្រារព្ធបុណ្យចូលឆ្នាំថ្មីឬដែលគេឲ្យឈ្មោះថា “៧ថ្ងៃដ៏គ្រោះថ្នាក់” ដែលទើបបញ្ចប់កាលពីថ្ងៃអាទិត្យ មានករណីគ្រោះថ្នាក់ចរាចរណ៍ចំនួន៣៤៤៧ករណី ដោយបណ្ដាលឲ្យមានមនុស្សរងរបួស៣៦៥៦នាក់។

ក្នុងថ្ងៃអាទិត្យតែមួយថ្ងៃដែលជាថ្ងៃចុងក្រោយមានគ្រោះថ្នាក់ចំនួន៣៤៣ករណីដោយបានសម្លាប់មនុស្សអស់៤៥នាក់និងរងរបួស៣៨៥នាក់។

ខេត្តឈៀងម៉ៃជាខេត្តដែលមានគ្រោះថ្នាក់ចរាចរណ៍ច្រើនជាងគេក្នុងរយៈពេល៧ថ្ងៃនោះ ដោយមានគ្រោះថ្នាក់ចំនួន១៦៨ករណីនិងមានចំនួនអ្នករងរបួសធ្ងន់ច្រើនជាងគេដោយមនុស្សចំនួន១៧៥នាក់ត្រូវបានបញ្ជូនទៅមន្ទីរពេទ្យ។ ចំណែកទីក្រុងបាងកកនិងខេត្តនគររាជសីម៉ាជាក្រុងនិងខេត្តដែលមានមនុស្សស្លាប់ច្រើនជាងគេគឺ១៩នាក់ក្នុងខេត្តនីមួយៗ។

គ្រោះថ្នាក់ចំនួន៣៤%បណ្ដាលមកពីការបើកបរក្នុងពេលស្រវឹង ខណៈគ្រោះថ្នាក់បង្កឡើងដោយការបើកបរក្នុងល្បឿនលឿនមាន៣៣%។

យោងតាមរបាយការណ៍កាលពីឆ្នាំមុន ក្នុងរយៈពេល៧ថ្ងៃដូចគ្នាមានគ្រោះថ្នាក់ចំនួន៣៣៧៣ករណី បណ្ដាលឲ្យមនុស្ស៣៦៤នាក់ស្លាប់ ៣៥៥៩នាក់រងរបួស ហើយការបើកបរក្នុងពេលស្រវឹងគឺជាកត្តាចម្បងដែលនាំឲ្យមានគ្រោះថ្នាក់ដូចគ្នា៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ