ចំនួនអ្នកស្លាប់ដោយសារគ្រោះរញ្ជូយដីនៅប្រទេសអេក្វាទ័រឡើងដល់៤១៣នាក់ ចំណែកការខូចខាតក្នុងគ្រោះធម្មជាតិនេះត្រូវគេប៉ាន់ប្រមាណថាខ្ទង់រាប់ពាន់លានដុល្លារ។
កាលពីល្ងាចថ្ងៃសៅរ៍ ប្រទេសអេក្វាទ័របានរងគ្រោះរញ្ជួយដីមួយកម្រិត៧,៨ រ៉ិចទ័រ ដែលនេះជាគ្រោះរញ្ជួយដីដែលអាក្រក់បំផុតសម្រាប់ប្រទេសនេះចាប់តាំងពីឆ្នាំ១៩៧៩មក។
បណ្ដាញផ្សាយព័ត៌មាន BBC បាយរាយការណ៍ថា ប្រធានាធិបតីអេក្វាទ័រលោក Rafael Correa បានថ្លែងពេលលោកទៅមើលតំបន់ដែលរងគ្រោះខ្លាំងបំផុតថា ការចំណាយសម្រាប់ការសាងសង់ឡើងវិញគឺទំនងជានៅក្នុងខ្ទង់រាប់ពាន់លានដុល្លារ។ លោកថា វាជាសោកនាដកម្មធំបំផុតដែលបានវាយប្រហារទៅលើប្រទេសអេក្វាឌ័រក្នុងរយៈពេល៧ទសវត្សរ៍មកនេះ។ មនុស្សប្រមាណ២៥០០នាក់បានរងរបួសនៅក្នុងគ្រោះធម្មជាតិនេះ។
បណ្ដាប្រទេសនានាដូចជាម៉ិចស៊ីកូ អេស្បាញ កូឡំប៊ី ឈីលី វេណេស៊ូអេឡា និងប៉េរូ បានបញ្ជូនក្រុមអ្នកជួយសង្គ្រោះនិងជំនួយ។ ចំណែកសហភាពអឺរ៉ុបបានប្រកាសកាលពីថ្ងៃចន្ទថា ខ្លួនផ្តល់ប្រាក់១លានអ៉ឺរ៉ូ (ប្រហែល១,១៣លានដុល្លារអាមេរិក) ជាជំនួយមនុស្សធម៌សម្រាប់ជួយជនរងគ្រោះ៕