រដ្ឋាភិបាលថៃគ្រោងបញ្ចេញអង្ករទាំងអស់នៅក្នុងស្ដុករបស់ខ្លួនចំនួន១១,៤លានតោន លក់ឲ្យអស់ក្នុងរយៈពេលពីរខែក្នុងតម្លៃសរុបប្រមាណ១០០ពាន់លានបាត (ប្រហែល២៨៣៩លានដុល្លារ) ដោយចាប់ផ្តើមពីសប្ដាហ៍ក្រោយទៅ។
កាសែតបាងកកប៉ុស្តិ៍បានរាយការណ៍ថា ផែនការលក់អង្ករនេះត្រូវបានប្រកាសកាលពីថ្ងៃចន្ទម្សិលមិញ ហើយការដេញថ្លៃនឹងចាប់នៅសប្ដាហ៍ក្រោយដោយការដេញថ្លៃមួយលើកៗមានអង្ករចំនួន១លានតោន។
រដ្ឋលេខាធិការប្រចាំការរបស់ក្រសួងពាណិជ្ជកម្មថៃនិងជាលេខាធិការនៃក្រុមប្រឹក្សាភិបាលគ្រប់គ្រងអង្ករ លោកស្រី ជុធីតា ប៊ុនយ៉ាផ្រាផាស់សារ៉ា (Chutima Bunyapraphasara) បានមានប្រសាសន៍ថា “យើងមានបំណងដាក់លក់ដេញថ្លៃវា (អង្ករ) ទាំងអស់ក្នុងរយៈពេលពីរខែ”។ លោកស្រីបន្ថែមថាអង្ករដែលនៅសល់ក្នុងស្តុកមានតម្លៃជាង១០០ពាន់លានបាត។
ផែនការលក់អង្ករនេះមិនធ្លាប់មានពីមុនមកក្នុងប្រវត្តិសាស្រ្តនៃការនាំអង្ករចេញរបស់ថៃនោះទេ ដោយចំនួនអង្ករដែលគ្រោងលក់ក្នុងរយៈពេល២ខែនោះ មានចំនួនច្រើនជាងអង្ករដែលត្រូវបាននាំចេញជាធម្មតាក្នុងរយៈពេល១ឆ្នាំ។ ក្នុងរយៈពេលប៉ុន្មានទស្សវត្សរ៍កន្លងមកនេះ ប្រទេសថៃនាំអង្ករចេញជាមធ្យម១០លានតោនក្នុង១ឆ្នាំ។
រដ្ឋាភិបាលថៃដែលជាប្រទេសនាំចេញអង្ករធំជាងគេទីពីររបស់ពិភពលោកបន្ទាប់ពីប្រទេសឥណ្ឌា បានកំពុងកាត់បន្ថយចំនួនអង្ករនៅក្នុងស្តុករបស់ខ្លួនដែលសល់ពីគម្រោងទិញស្រូវអង្ករក្នុងសម័យលោកស្រី យីងឡាក់។ ចាប់តាំងពីខែឧសភាឆ្នាំ២០១៤មក របបយោធារបស់ថៃបានដាក់ដេញថ្លៃអង្ករអស់ចំនួន៥,០៥លានតោនរួចហើយក្នុងតម្លៃ១,៥៣លានដុល្លារ។
លោក ស៊ុផាឆៃ វររ៉ាភីនយ៉ាផន (Supachai Vorraapinyaporn) ប្រធានក្រុមហ៊ុន Tanasan Rice Group ដែលជាក្រុមហ៊ុននាំចេញអង្ករធំជាងគេទីបីរបស់ថៃបានឱ្យដឹងថាគោលដៅរបស់រដ្ឋាភិបាលក្នុងការលក់អង្ករឲ្យអស់ក្នុងរយៈពេលពីរខែគឺមិនអាចទៅរួចនោះទេ។
លោក Supachai បានថ្លែងថា៖ “១លានភាគរយមិនអាចទៅរួចនោះទេ ពិចារណាមើលទៅថាការដេញថ្លៃកាលពីកន្លងមកត្រូវបានគេធ្វើប្រចាំខែ ហើយអង្ករ (ដែលត្រូវបានលក់) ប្រហែល៤០០ ០០០តោនប៉ុណ្ណោះ”។ លោកបានបន្ថែមថា៖ “ប្រហែលជាពួកគេចង់មានន័យពីរឆ្នាំ មិនមែនពីរខែនោះទេ”។
កន្លងទៅរដ្ឋាភិបាលថៃបាននិយាយថាខ្លួនមានបំណងជម្រះអង្ករទាំងអស់ក្នុងស្តុករបស់ខ្លួននៅចុងឆ្នាំ២០១៧ ពោលគឺរយៈពេល២០ខែពីពេលនេះទៅ៕