ចៅអធិការ​វត្តល្បីឈ្មោះមួយនៅថៃរងការចោទ​ថា​លាងលុយកខ្វក់​

ព្រះតេជគុណ Dhammachaiyo (រូបភាពពី Reuters)

ចៅអធិការព្រះវិហារពុទ្ធសាសនាល្បីឈ្មោះមួយនៅក្នុងប្រទេសថៃព្រះតេជគុណ Dhammachaiyo ប្រឈមមុខនឹងការចោទប្រកាន់ផ្លូវច្បាប់ថាជាប់ពាក់ព័ន្ធការលាងលុយកខ្វក់និងទទួលជំនួយខុសច្បាប់ប្រមាណ៣៤លានដុល្លារ។

បើតាមសារព័ត៌មាន Channel News Asia គឺព្រះតេជគុណ Dhammachaiyo ចៅធិការវត្ត Dhammakaya ដែលគេចោទថាបានប្រព្រឹត្តិអំពើខុសច្បាប់នោះ ព្រះអង្គបានទៅប៉ុស្តិ៍នគរបាលដោយខ្លួនព្រះអង្គផ្ទាល់កាលពីថ្ងៃព្រហស្បតិ៍ម្សិលមិញ។

នាយកដ្ឋានពិសេសខាងស៊ើបអង្កេត (DSI) បានចេញរបាយការណ៍ថាព្រះតេជគុណ Dhammachaiyo ជាប់ពាក់ព័ន្ធការលាងលុយកខ្វក់និងការទទួលអំណោយខុសច្បាប់៣៤លានដុល្លារ ហើយបានខកខានចូលខ្លួនតាមការកោះហៅរបស់សមត្ថកិច្ចជាច្រើនលើក។

នាយកដ្ឋានពិសេសខាងកិច្ចការស៊ើបអង្កេតកាលពីសប្តាហ៍មុនបានចេញដីកាឃាត់ព្រះកាយ ហើយនៅថ្ងៃព្រហស្បតិ៍ម្សិលមិញគឺជាថ្ងៃចុងក្រោយដែលទុកពេលឲ្យអ្នកនៅជុំវិញព្រះអង្គបានដឹងពីបទល្មើសនេះ។ DSI បញ្ជាក់ថាតាមច្បាប់ព្រហ្មទណ្ឌគឺព្រះតេជគុណ Dhammachaiyo ប្រឈមជាប់ពន្ធនាគារ២០ឆ្នាំ។

បច្ចុប្បន្នអ្នកពាក់ព័ន្ធកំពុងព្រួយបារម្ភថាស្ថានភាពការតវ៉ានិងអាចរាលដាលកើតមានឡើង នៅពេលដែលអាជ្ញាធរបង្ខំការអនុវត្តច្បាប់លើអ្នកធ្វើការនៅវត្តនោះ ហើយមានការឃាត់ព្រះកាយចៅអធិការ។ ព្រះសង្ឃរាប់ពាន់អង្គធ្វើដំណើរតាមព្រះតេជគុណ Dhammachaiyo ពេលធ្វើដំណើរទៅប៉ុស្តិ៍នគរបាលនៅក្នុងខេត្ត Pathum Thani ភាគខាងជើងនៃទីក្រុងបាងកក។

ទោះយ៉ាងណាមានការចោទថាចំណាត់ការរបស់សមត្ថកិច្ចនៅពេលនេះគឺធ្វើឡើងក្រោមហេតុផលនយោបាយព្រោះចៅអធិការវត្តនេះមានទំនាក់ទំនងស្និទជាមួយលោក ថាក់ស៊ីន អតីតនាយករដ្ឋមន្ត្រីដែលត្រូវបានគេធ្វើរដ្ឋប្រហារទម្លាក់ពីតំណែង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ