ចិន​សង្ឃឹម​ស្ដារ​ទំនាក់​ទំនង​ជាមួយ​​ហ្វីលីពីន​ឡើង​វិញ បន្ទាប់​ពី​​លោក Duterte ឡើង​កាន់​អំណាច

ប្រធានាធិបតី​ចិន លោក ស៊ី ជិនពីង (រូបភាពពី Reuters)

ប្រធានាធិបតីចិន លោក ស៊ី ជិនពីង បានប្រាប់ទៅប្រធានាធិបតីថ្មីរបស់ហ្វីលីពីនថាប្រទេសចិនសង្ឃឹមស្ដារទំនាក់ទំនងជាមួយប្រទេសហ្វីលីពីនឲ្យត្រឡប់ទៅរកភាពប្រក្រតីឡើងវិញ បន្ទាប់ពីទំនាក់ទំនងរវាងប្រទេសទាំងពីរជួបភាពរកាំរកូសជុំវិញជម្លោះដែនទឹកនៅសមុទ្រចិនខាងត្បូង។

ទីភ្នាក់ងារព័ត៌មាន Reuters បានរាយការណ៍ថា លោក ស៊ី បានបញ្ជូនសារទៅលោក Duterte កាលពីល្ងាចថ្ងៃចន្ទម្សិលមិញដោយបានអបអរសាទរជ័យជម្នះរបស់លោកក្នុងការបោះឆ្នោតកន្លងមក ហើយនិយាយថា ប្រទេសទាំងពីរមានប្រវត្តិសាស្ត្រជាមិត្តនឹងគ្នាយូរអង្វែងមកហើយ។

លោក ស៊ី បាននិយាយនៅក្នុងសេចក្ដីថ្លែងការណ៍នោះថា ការវិវត្តនៃទំនាក់ទំនងចិន-ហ្វីលីពីនប្រកបដោយមិត្តភាពនិងស្ថេរភាព កើតឡើងដោយផ្អែកតាមផលប្រយោជន៍នៃប្រទេសនិងប្រជាជនទាំងពីរ។ លោកបន្តថា ប្រទេសទាំងពីរមានការទទួលខុសត្រូវចំពោះកិច្ចសហប្រតិបត្តិការដ៏ស៊ីជម្រៅ។

ទំនាក់ទំនងចិននិងហ្វីលីពីនបានជាប់នៅក្នុងជម្លោះដែនដីនៅសមុទ្រចិនខាងត្បូងដែលជាផ្លូវទឹកយុទ្ធសាស្ត្រដ៏សំខាន់ដែលមានការដឹកជញ្ជូនទំនិញតម្លៃ៥ពាន់ពាន់លានដុល្លារឆ្លងកាត់ទីនោះជារៀងរាល់ឆ្នាំ។ ប្រទេសប៊្រុយណេ ម៉ាឡេស៊ី តៃវ៉ាន់ និងវៀតណាមក៏អះអាងជាម្ចាស់លើដែនដីនោះផងដែរ។

ភាពតានតឹងរវាងចិននិងហ្វីលីពីនបានកើនឡើង ខណៈដែលតុលាការអន្តរជាតិនៅទីក្រុងឡាអេកំពុងត្រៀមចេញសាលដីកាមួយនៅពីរបីខែខាងមុខនេះនៅក្នុងករណីមួយដែលប្ដឹងដោយប្រទេសហ្វីលីពីនកាលពីឆ្នាំ២០១៣។

ហ្វីពីលីនកំពុងស្វែងរកការបញ្ជាក់ពីច្បាប់សមុទ្ររបស់អង្គការសហប្រជាជាតិដែលអាចនឹងបំផ្លាញដល់ការអះអាងជាម្ចាស់លើផ្ទៃទឹក៩០ភាគរយនៃសមុទ្រចិនខាងត្បូង។ ចិនបានច្រានចោលអំណាចតុលការនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ