ប្រមុខរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន នៅព្រឹកថ្ងៃពុធនេះ បានទទួលពានរង្វាន់អន្តរជាតិ“កម្ពុជាជាគោលដៅទេសចរណ៍ល្អបំផុតលើពិភពលោក ឆ្នាំ២០១៦”ដែលប្រគល់ដោយក្រុមប្រឹក្សាភិបាលទេសចរណ៍និងពាណិជ្ជកម្មសហភាពអឺរ៉ុប។
ពិធីប្រគល់រង្វាន់នោះធ្វើឡើងនៅវិមានសន្តិភាព ស្របពេលដែលមានពិធីប្រកាសចលនាប្រឡងប្រណាំង “បដិសណ្ឋារកិច្ចល្អ” លើកទី១។
លោក ហ៊ុន សែន បានសរសេរនៅលើហ្វេសប៊ុកនៅព្រឹកថ្ងៃពុធនេះថា៖ “ច្បាស់ណាស់ទេសចរណ៌គឺបានផ្តល់ការងារ មុខរបរនិងប្រាក់ចំណូលសមរម្យដល់ប្រជាពលករដ្ឋ ជាពិសេសយុវជនយុវនារីយើង។ មិនត្រឹមតែចំណូលក្នុងការពង្រឹងសេដ្ឋកិច្ចគ្រួសារនិងសេដ្ឋកិច្ចជាតិប៉ុណ្ណោះទេ ប៉ុន្តែបានធ្វើអោយអន្តរជាតិបានស្គាល់ប្រទេសកម្ពុជាយើងកាន់តែច្បាស់”។ លោកបន្ថែមថា៖ “ប្រទេសយើងជាប្រទេសដែលមានអារ្យធម៌រុងរឿងជាមួយវប្បធម៌ ធនធានធម្មជាតិ និងប្រវត្តិសាស្រ្តដ៏សម្បូរបែបដែលយើងអាចចែករំលែក និងផ្សព្វផ្សាយអោយពិភពលោកបានយល់ដឹងនិងស្គាល់កម្ពុជា ព្រះរាជាណាចក្រអច្ឆរិយៈតាមរយៈទេសចរណ៌”។
លោក ហ៊ុន សែន ក៏បានស្នើឲ្យមានការគិតគូពីគុណភាពនៃការផ្តល់សេវាកម្មទេសចរណ៍និងការរក្សាភាពបៃតងនៅក្នុងប្រទេស។
បើតាមនាយករដ្ឋមន្រ្តី នៅឆ្នាំ២០១៧ កម្ពុជារំពឹងថានឹងទាក់ទាញទេសចរប្រមាណ៧លាននាក់ ហើយនៅឆ្នាំ២០២៣ កម្ពុជារំពឹងថានឹងទាក់ទាញ”ភ្ញៀវទេសចរអន្តរជាតិដ៏សម្បើម” ស្របពេលមានប្រកួតស៊ីហ្គេម(SeaGames)។
នៅថ្ងៃនេះផងដែរ លោក ហ៊ុន សែន បានប្រកាសថាលោកទទួលតួនាទីជាសមាជិកកិត្តិយសនៃបណ្ឌិតសភាទេសចរណ៌អឺរ៉ុបដើម្បីជំរុញវិស័យទេសចរណ៌កម្ពុជាឲ្យកាន់តែរីកលូតលាស់ខ្លាំងឡើងថែមទៀតនៅលើឆាកអន្តរជាតិ៕
