ភូមា​ដុត​បំផ្លាញ​គ្រឿង​ញៀន​មាន​តម្លៃ​ជិត៦០​លាន​ដុល្លារ

(រូបភាពពី AFP)

នគរបាលភូមាកាលពីថ្ងៃម្សិលមិញបានដុតបំផ្លាញគ្រឿងញៀនមានតម្លៃជិត៦០លានដុល្លារ ខណៈដែលអាជ្ញាធរប្រទេសនេះព្យាយាមដាក់ទោសទណ្ឌធ្ងន់ធ្ងរទៅលើការដាំដុះអាភៀននិងលុបបំបាត់ទីតាំងផលិតថ្នាំញៀននៅតាមតំបន់ព្រំដែន។

យោងតាមអង្គការសហប្រជាជាតិបានឲ្យដឹងថាប្រទេសក្រីក្រមួយនេះនៅតែជាអ្នកដាំអាភៀនធំលំដាប់ទី២នៅលើពិភពលោក។ សារធាតុហេរ៉ូអ៊ីនឬសារធាតុញៀនត្រូវបានគេចម្រាញ់ពីអាភៀន។

របបគ្រប់គ្រងយោធាដ៏ពុករលួយនិងសង្គ្រាមស៊ីវិលដ៏រ៉ាំរ៉ៃរាប់ទសវត្សរ៍ជាមួយក្រុមបះបោរជនជាតិភាគតិចគឺជាដើមហេតុនៃការបញ្ឆេះឲ្យមានជំនួញគ្រឿងញៀន។

ដើម្បីអបអរទិវាប្រឆាំងគ្រឿងញៀនប្រចាំឆ្នាំ ថ្នាំញៀន និងសារធាតុគីមីដែលរឹបអូសបានត្រូវបានគេដុតបំផ្លាញនៅទីតាំងបីកន្លែងនៅក្នុងប្រទេសភូមា។

ទីភ្នាក់ងារព័ត៌មាន AFP បានរាយការណ៍ថាអាភៀនជាងកន្លះតោននិងសារធាតុហេរ៉ូអ៊ីន៨០គីឡូក្រាមត្រូវបានគេដុតបំផ្លាញចោលរួមគ្នាជាមួយថ្នាំមេតំហ្វេតាមីននិងគ្រាប់ថ្នាំញៀន១០លានគ្រាប់ទៀត។ គ្រឿងញៀនដែលដុតបំផ្លាញចោលនោះមានតម្លៃខ្ទង់៥៧លានដុល្លារ។

រដ្ឋាភិបាលថ្មីរបស់ភូមាដែលដឹកនាំដោយលោកស្រី អ៊ុង សានស៊ូជី បានឡើងដឹកនាំប្រទេសនេះក្រោយទទួលបានជោគជ័យយ៉ាងធំធេងនៅក្នុងការបោះឆ្នោតកាលពីចុងឆ្នាំមុន។ លោកស្រី ស៊ូជី បានសន្យាប្រឹងប្រែងបញ្ចប់ការបះបោរនានារបស់ក្រុមជនជាតិភាគតិច៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ