ពលរដ្ឋមកពីខេត្តកោះកុងបាននាំគ្នាតវ៉ាដល់មុខរដ្ឋសភានៅព្រឹកថ្ងៃព្រហស្បតិ៍នេះ ដោយសុំឲ្យប្រធានរដ្ឋសភា ជួយអន្តរាគមន៍លើជម្លោះដីធ្លីដែលកើតឡើងប្រហែល១០ឆ្នាំមកហើយនោះ។
យោងតាមញត្តិបង្ហាញថា ពលរដ្ឋចំនួន១៤៧គ្រួសារនៅឃុំចំនួន៣ក្នុងស្រុកស្រែអំបិលនិងឃុំមួយទៀតក្នុងស្រុកបុទុមសាគរ ខេត្តកោះកុង បានបាត់បង់ដីជិត៨០០ហិកតា ដោយសារមានជម្លោះជាមួយក្រុមហ៊ុន កោះកុងស៊ូហ្គ័រនិងកោះកុងផ្លានថេសិន។
ក្នុងញត្តិដដែល ពលរដ្ឋបានស្នើឲ្យលោក ហេង សំរិន ជួយអន្តរាគមន៍ទៅលើក្រុមហ៊ុនឲ្យកាត់ឆ្វៀលដីទំហំ៧៨២,១៦ហិកតាប្រគល់ឲ្យពលរដ្ឋបានបង្កបង្កើតផលឡើងវិញ។
បើតាមពលរដ្ឋ ជម្លោះដីធ្លីនោះបានកើតឡើងតាំងឆ្នាំ២០០៦ ហើយថានៅពេលពលរដ្ឋចេញតវ៉ាច្រើនតែត្រូវបានក្រុមហ៊ុនគំរាមកំហែងនិងថាក្រុមហ៊ុនបានបាញ់សត្វគោក្របីរបស់អ្នកភូមិដែលទៅស៊ីស្មៅក្បែរចំការក្រុមហ៊ុន ព្រមទាំងបានឈូសបំផ្លាញដំណាំពលរដ្ឋទៀតផង។
VOD មិនអាចសុំការបំភ្លឺពីតំណាងក្រុមហ៊ុនកោះកុងស៊ូហ្គ័រនិងកោះកុងផ្លានថេសិនបាននៅឡើយ៕