អគ្គស្នងការនគរបាលជាតិបានបង្កើតក្រុមការងារទទួលខុសត្រូវផ្នែកសន្តិសុខនៅពេលបោះឆ្នោតខាងមុខ ដោយក្នុងនោះ កូនប្រសាលោកនាយករដ្ឋមន្រ្តី ហ៊ុន សែន គឺជាអនុប្រធានម្នាក់ក្នុងគណៈកម្មការនេះ។
យោងតាមសេចក្តីសម្រេចកាលពីថ្ងៃទី១៧ ខែសីហា ឆ្នាំ២០១៦ ដែលចុះហត្ថលេខាដោយនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានចាត់តាំងក្រុមការងារបញ្ជាការសន្តិសុខអចិន្រ្តៃយ៍សម្រាប់ការចុះឈ្មោះបោះឆ្នោត រហូតដល់ពេលបោះឆ្នោត ទាំងថ្នាក់ឃុំ-សង្កាត់និងថ្នាក់ជាតិឆ្នាំ២០១៨នោះ ដោយមាននាយឧត្តសេនីយ៍ គៀត ច័ន្ទថារិទ្ធិ អគ្គស្នងការរងនគរបាលជាតិជាប្រធាននិងមានអនុប្រធាន៥រូបទៀត ក្នុងក៏មានឧត្តមសេនីយ៍ឯក ឌី វិជ្ជា កូនប្រសារ លោក ហ៊ុន សែន ផងដែរ។
បន្ថែមពីនេះ វរសេនីយ៍ឯក អាត់ បូនី ដែលជាអតីតបុគ្គលិកវិទ្យុអាស៊ីសេរីដែលប្រើឈ្មោះថា ផាន សុផាត នោះក៏ត្រូវបានចាត់តាំងជាសមាជិកក្រុមការងារសន្តិសុខពេលបោះឆ្នោតនេះក្នុងចំណោមសមាជិក២៤រូប។
ការចុះឈ្មោះក្នងបញ្ជីបោះឆ្នោតថ្មី នឹងប្រព្រឹត្តទៅរយៈពេល៩០ថ្ងៃដោយចាប់ពីថ្ងៃទី១ខែកញ្ញាដល់ថ្ងៃទី២៩ ខែវិច្ឆិកាឆ្នាំ២០១៦នេះ។ ចំណែការបោះឆ្នោតនឹងប្រព្រឹត្តទៅនៅថ្ងៃទី៤ខែមិថុនាឆ្នាំ២០១៧។
ដោយឡែកការបោះឆ្នោតថ្នាក់ជាតិគ្រោងធ្វើនៅខែកក្កដាឆ្នាំ២០១៨៕