សារព័ត៌មានថៃ បានផ្សាយថា ប្រទេសថៃ និងម៉ាឡេស៊ី បានបញ្ជាក់ពីការប្ដេជ្ញាចិត្តរួមមួយ ដើម្បីបញ្ចប់អំពើហិង្សា និងការគំរាមកំហែងសន្តិសុខ ដល់ប្រទេសទាំងពីរ នៅតំបន់ភាគខាងត្បូងប្រទេសថៃ។
កិច្ចសហប្រតិបត្តិការប្រឆាំងពួកជ្រុលនិយមនៅភាគខាងត្បូងថៃ និងតំបន់ព្រំដែនថៃ-ម៉ាឡេស៊ី ត្រូវបានប្រកាសដោយនាយករដ្ឋមន្ត្រីថៃ លោក ប្រាយុទ្ធ ចាន់អូចា និងនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ អំឡុងសន្និសីទសារព័ត៌មាន ក្រោយជំនួបប្រចាំឆ្នាំនៃកិច្ចសហប្រតិបត្តិការថៃ-ម៉ាឡេស៊ី នៅឯទីក្រុងបាងកក កាលពីថ្ងៃម្សិលមិញ។
កាសែតបាងកកប៉ុស្តិ៍ បានដកស្រង់សម្ដីលោក ណាជីប ចុះផ្សាយថា៖ “វាសំខាន់ណាស់សម្រាប់យើងធ្វើការលើវិធានការកសាងទំនុកចិត្ត នៅភាគខាងត្បូង”។ លោកបន្ថែមថា ដំណើរការជជែកគ្នា គឺជាដំណាក់កាលដំបូងនៃការបង្កើតជំនឿ និងទំនុកចិត្តទៅវិញទៅមក។
លោក ណាជីប បន្តថា៖ “យើងនឹងបន្តធ្វើការជិតស្និទ្ធនឹងគ្នាដើម្បីប្រយុទ្ធនឹងការគំរាមកំហែងពីភេរវកម្មអន្តរជាតិ ការជួញដូរមនុស្ស និងបទល្មើសឆ្លងប្រទេស ក្នុងនោះមានក្រុមជ្រុលនិយមហិង្សាផងដែរ”។
មនុស្សជាង ៦៥០០នាក់ហើយ ត្រូវបានគេសម្លាប់ នៅក្នុងអំពើហិង្សានៅខេត្តយ៉ាឡា ណារ៉ាធីវ៉ាត់ និងផាត់តានី ដែលជាខេត្តសម្បូរទៅដោយជនមូស្លីម៕