នៅព្រឹកថ្ងៃនេះលោកនាយករដ្ឋមន្ត្រី ហ៊ុន សែន កំពុងធ្វើដំណើរកាន់បណ្ដាខេត្តភាគឦសាននៃប្រទេសកម្ពុជា ដែលជាផ្នែកមួយនៃដំណើរចុះមូលដ្ឋានរបស់លោក ដែលលោកថាដើម្បីពិនិត្យមើលនិងដោះស្រាយបញ្ហាប្រឈមមួយចំនួនដល់ប្រជាពលរដ្ឋ។
នៅលើទំព័រហ្វេសប៊ុកផ្លូវការរបស់លោកបង្ហោះនៅព្រឹកនេះ លោកនាយករដ្ឋមន្ត្រី ហ៊ុន សែន បានសរសេរថា លោកកំពុងធ្វើដំណើរទៅកាន់ខេត្តមណ្ឌលគិរីនិងរតនគិរី ដើម្បីពិនិត្យមើលសមិទ្ធផលជាតិនិងជួបសួរសុខទុក្ខមន្ត្រីរាជការនិងប្រជាពលរដ្ឋទូទៅ។
លោកនាយករដ្ឋមន្ត្រី ហ៊ុន សែន បានធ្វើដំណើរចុះទៅតាមបណ្ដាខេត្តនានាចាប់តាំងពីចុងខែកក្កដាកន្លងមក នៅក្នុងយុទ្ធនាការចុះមើលសមិទ្ធផលជាតិនៅទូទាំង២៥ខេត្តក្រុង។
ប៉ុន្តែកាលពីថ្ងៃទី២២ខែសីហាកន្លងមក លោកនាយករដ្ឋមន្ត្រីបានបញ្ជាក់ថា ដំណើរចុះតាមបណ្ដារបស់លោកគឺដើម្បីស្វែងរកការគាំទ្រពីប្រជាពលរដ្ឋនៅមុនការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧និងការបោះឆ្នោតជាតិនៅឆ្នាំ២០១៨ខាងមុខ បន្ទាប់ពីគណបក្សកាន់អំណាចរបស់លោកបានបាត់បង់ការគាំទ្រដល់ទៅ២២អាសនៈនៅក្នុងការបោះឆ្នោតជាតិកាលពីឆ្នាំ២០១៣កន្លងមក៕