ក្រសួងសេដ្ឋកិច្ចនិងធនាគារជាតិកម្ពុជាអំពាវនាវឲ្យស្ថាប័នគ្រឹះស្ថានធនាគារនិងហិរញ្ញវត្ថុប្រើគោលនយោបាយទន់ភ្លន់ចំពោះកសិករ ខណៈកសិករកំពុងជួបប្រទះបញ្ហាកសិផលធ្លាក់ចុះតម្លៃ។
សេចក្តីថ្លែងការណ៍រួមរបស់ក្រសួងសេដ្ឋកិច្ចនិងហិរញ្ញវត្ថុនិងធនាគារជាតិកម្ពុជាចេញផ្សាយនៅថ្ងៃទី១៩ខែកញ្ញា បានលើកឡើងថា ២សប្តាហ៍ចុងក្រោយនេះ កសិផលរបស់កសិករបានធ្លាក់ចុះតម្លៃជាបន្តបន្ទាប់។ សេចក្តីថ្លែងការណ៍នេះក៏បានអំពាវនាវឲ្យគ្រឹះស្ថានធនាគារនិងហិរញ្ញវត្ថុអនុវត្តគោលនយោបាយទន់ភ្លន់និងអនុគ្រោះ ចំពោះកសិករជួបប្រទះបញ្ហាជាក់ស្តែងដែលមានកម្ចីដល់ការកំណត់សង។
ទោះយ៉ាងណាសេចក្តីថ្លែងការណ៍មិនបានបញ្ជាក់លម្អិតពីគោលនយោបាយទន់ភ្លន់នេះថាត្រូវធ្វើយ៉ាងម៉េចនោះទេ។
នៅប៉ុន្មានសប្តាហ៍ចុងក្រោយនេះកសិករបង្កបង្កើនផលស្រូវ ដំឡូង ល្ពៅនៅខេត្តមួយចំនួនរួមមានព្រះវិហារ បាត់ដំបង បន្ទាយមានជ័យ ឧត្តរមានជ័យជាដើម បានអំពាវនាវឲ្យរដ្ឋាភិបាលជួយអន្តរាគមន៍រកទីផ្សារលក់កសិផលរបស់ពួកគេ។ កសិករក៏បានស្នើអន្តរាគមន៍ឲ្យគ្រឹះស្ថានធនាគារនិងហិរញ្ញវត្ថុពន្យារពេលឲ្យពួកគាត់បង់សងលុយជំពាក់ដែរ ព្រោះកសិផលមិនមានទីផ្សារលក់ឬលក់កសិផលបានក្នុងតម្លៃទាបពេក៕
