នាយករដ្ឋមន្ត្រីកម្ពុជា​អរគុណវៀតណាម​ដែលឲ្យពលរដ្ឋខ្មែរទៅព្យាបាលជំងឺ

លោកស្រី ង្វៀន ធីគឹមងិន និងលោក ហ៊ុន សែន (រូបភាពពីហ្វេសប៊ុកលោក ហ៊ុន សែន)

លោកនាយករដ្ឋមន្ត្រី ហ៊ុន សែន ថ្លែងអរគុណនៅចំពោះមុខប្រធានរដ្ឋសភាវៀតណាម ដោយថាបានជួយសម្រួលដល់ប្រជាពលរដ្ឋខ្មែរបានទៅពិនិត្យនិងព្យាបាលជំងឺនៅក្នុងប្រទេសមួយនេះ។

កាលពីថ្ងៃទី២៧ ខែកញ្ញា លោកនាយករដ្ឋមន្ត្រី ហ៊ុន សែន បានជួបជាមួយប្រធានរដ្ឋសភាវៀតណាមនៅវិមានសន្តិភាព ដើម្បីជជែកពិភាក្សាលើចំណុចផ្សេងៗដែលពាក់ព័ន្ធនឹងទំនាក់ទំនងនៃប្រទេសទាំងពីរ។ ក្នុងការឱកាសនៃជំនួបនោះលោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណដល់ភាគីវៀតណាម ដែលបានឲ្យពលរដ្ឋខ្មែរបានទៅពិនិត្យនិងព្យាបាលជំងឺ។ នេះបើតាមហ្វេសប៊ុករបស់លោកនាយករដ្ឋមន្ត្រី ហ៊ុន សែន។

ហ្វេសប៊ុកនោះសរសេរថា៖ «ជូនចំពោះប្រជាជននិងរដ្ឋាភិបាលវៀតណាមដែលកន្លងមកជួយសម្រួលឲ្យប្រជាជនកម្ពុជាយើងបានឆ្លងទៅពិនិត្យនិងព្យាបាលជំងឺនៅក្នុងប្រទេសវៀតណាម ជាពិសេសប្រជាជនដែលកំពុងរស់នៅតាមព្រំប្រទល់»។

ប្រធានរដ្ឋសភាវៀតណាមលោកស្រី ង្វៀន ធីគឹមងិន មកបំពេញទស្សនកិច្ចនៅកម្ពុជាចំនួន២ថ្ងៃ គឺថ្ងៃទី២៧និង ២៨ខែកញ្ញា។ សេចក្តីប្រកាសព័ត៌មានរបស់រដ្ឋសភាកម្ពុជាបញ្ជាក់ថា ការមកបំពេញទស្សនកិច្ចនេះ ដើម្បីពង្រឹង ចំណងមិត្តភាពប្រទេសទាំងពីរ។

តាមរបាយការណ៍របស់ក្រសួងសុខាភិបាលគឺពលរដ្ឋខ្មែរទៅព្យាបាលជំងឺនៅក្រៅប្រទេសមាន១%។ ប៉ុន្តែអ្នកតាមដានការអភិវឌ្ឍសង្គមអះអាងថាចំនួនពលរដ្ឋខ្មែរទៅព្យាបាលជំងឺនៅក្រៅប្រទេសមានច្រើនលើសលប់ដោយសារមិនសូវទុកចិត្តសេវាសុខាភិបាលនៅកម្ពុជា ទើបពលរដ្ឋខ្មែរដែលមានជីវភាពធូរធាឬអ្នកមានអំណាចទៅព្យាបាលជំងឺនៅសិង្ហបុរី អ្នកមានទ្រព្យល្មមទៅថៃ ហើយអ្នកដែលមិនសូវមានទ្រព្យច្រើនទៅវៀតណាម។

អ្នកនាំអ្នកជំងឺទៅព្យាលនៅក្នុងប្រទេសថៃនៅតែក្នុងខេត្តមួយគឺខេត្តសុរិន្ទបានអះអាងថា ពលរដ្ឋខ្មែរបានទៅព្យាលបាលជំងឺនៅទីនោះជាមធ្យមក្នុង១ថ្ងៃមាន៥ទៅ៧០០នាក់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ