តុលាការបានផ្តន្ទាទោសសមាជិកព្រឹទ្ធសភាគណបក្សសម រង្ស៊ី លោក ស្រី ថាក់ ឡានី ឲ្យជាប់ពន្ធនាគារ១ឆ្នាំ៦ខែ និងពិន័យជាប្រាក់៨លានរៀល ព្រមទាំងបង់សង់ ជំងឺចិត្តដល់លោក ហ៊ុន សែន ១០០រៀល ផងដែរ។
សាលាដំបូងរាជធានីភ្នំពេញនៅរសៀលថ្ងៃទី១៧វិច្ឆិកាឆ្នាំ២០១៦នេះបានប្រកាសសាលក្រមលោកស្រី ថាក់ ឡានី ពាក់ព័ន្ធសំនុំរឿង បទបរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវិកវរធ្ងន់ធ្ងរដល់សន្តិសុខសង្គម។
សាលក្រមនេះក៍បង្គាប់ឲ្យសមត្ថកិច្ចចាប់ខ្លួន និងឃុំខ្លួនសមាជិកព្រឹទ្ធសភារូបនោះផងដែរ។
មេធាវីការពារក្តីឲ្យលោកស្រី ថាក់ ឡានី គឺលោក សំ សុគង់ យល់ថាការសម្រេចរបស់តុលា ការនេះមិនមានយុត្តិធម៌ចំពោះកូនក្តីរបស់លោកនោះទេ ។
លោកថាក្រុមមេធាវីការពារក្តីនឹងពិភាក្សារជាមួយលោកស្រ្តី ថាក់ ឡានី ដើម្បីតុលាការ ឧទ្ធរណ៍ជំទាស់នឹងការសម្រេចរបស់តុលាការដំបូងរាជធានីភ្នំពេញនេះ។
កាលពីថ្ងៃទី១ខែសីហា លោកនាយករដ្ឋមន្ត្រី ហ៊ុន សែន បានប្តឹងលោកស្រី ថាក់ ឡានី ដោយចោទថាសមាជិកព្រឹទ្ធសភាបក្សប្រឆាំងរូបនោះបានមូលបង្កាច់រូបលោកថា នៅពីក្រោយការសម្លាប់លោកកែម ឡី។ ប៉ុន្តែលោកស្រី ថាក់ ឡានី ធ្លាប់បានបកស្រាយថា លោកស្រីមិនបានចោទលោក ហ៊ុន សែន ដូចការលើកឡើងនោះទេ។