លទ្ធផលដែលគណៈកម្មាធិការជាតិរៀបចំការបោះឆ្នោតបានប្រកាសពីចំនួនអ្នកចុះឈ្មោះបោះឆ្នោតគិតត្រឹមថ្ងៃទី១៦ ខែវិច្ឆិកា ឆ្នាំ២០១៦ គឺពលរដ្ឋនៅក្នុងខេត្តបាត់ដំបងនិងខេត្តបន្ទាយមានជ័យ បានទៅចុះឈ្មោះបានតិចជាងគេ។
លទ្ធផលគិតត្រឹមថ្ងៃទី១៦ ខែវិច្ឆិកាបង្ហាញថា នៅខេត្តបាត់ដំបង មានប្រជាពលរដ្ឋគ្រប់អាយុត្រូវចុះឈ្មោះបោះឆ្នោតជាង ៧៦០ ០០០នាក់ ប៉ុន្តែអ្នកដែលទៅចុះឈ្មោះទើបបានជាង ៤៨០ ០០០នាក់ ស្មើនឹងចំនួន៦៣,៦៣ភាគរយ ចំណែកខេត្តបន្ទាយមានជ័យ ពលរដ្ឋគ្រប់អាយុមានចំនួនជាង ៤៦០ ០០០នាក់ ប៉ុន្តែចំនួនអ្នកទៅចុះឈ្មោះជាក់ស្តែងទើបបានជាង ២៩០ ០០០នាក់ ស្នើនឹង៦៣,៧១ភាគរយ។
របាយការណ៍របស់គណៈកម្មាធិការជាតិរៀបចំការបោះឆ្នោតឲ្យដឹងទៀតថា ខេត្តដែលចុះឈ្មោះបោះឆ្នោតបានច្រើនជាងគេ មានខេត្តប៉ៃលិន ចុះបាន៨៦ភាគរយ ខេត្តកែប ៨៥ភាគរយ និង ខេត្តកំពង់ស្ពឺ ៨៥ភាគរយ។
តាមកាលបរិច្ឆេទ គ.ជ.ប កំណត់ពេលចុះឈ្មោះបោះឆ្នោតរយៈពេល៩០ថ្ងៃ គឺចាប់ពីថ្ងៃទី១ ខែកញ្ញា រហូតដល់ថ្ងៃទី២៩ ខែវិច្ចិកា ឆ្នាំ២០១៦។ បើគិតត្រឹមថ្ងៃទី១៨ ខែវិច្ឆិកានេះ គឺនៅសល់តែ១២ថ្ងៃទៀតប៉ុណ្ណោះ នឹងផុតកំណត់នៃការចុះឈ្មោះបោះឆ្នោត៕