ប្រធានស្តីទីគណបក្សសង្រ្គោះជាតិ ថ្លែងរិះគន់គណបក្សផ្សេងៗដែលបង្រៀនយុវជនឲ្យចេះ វាយដំ និង ចេះជេរប្រមាថថា ជាការបណ្តុះខុសជាគំរូមិនល្អសម្រាប់សង្គម ហើយលោកអំពាវនាវឲ្យយុវជនគណបក្សរបស់លោកចេះសាមគ្គី និង យោគយល់គ្នា។
ថ្លែងក្នុងវេទិការនយោបាយនៅស្នាក់ការកណ្តាលគណបក្សសង្គ្រោះជាតិ នៅព្រឹកថ្ងៃអាទិត្យនេះ លោក កឹម សុខា បានរិះគន់លើអ្នកនយោបាយដែលចាប់យកយុវជនធ្វើជាឈ្នាន់ ដើម្បីការពារអំណាចរបស់ខ្លួន។ ក្នុងវេទិកានោះ លោកក៏បានរិះគន់ថា មានគណបក្សខ្លះបានបង្រៀនយុវជនឲ្យចេះវាយដំតំណាងរាស្ត្រ និង បង្រៀនឲ្យយុវជនឲ្យចេះជេរប្រមាថជា គំរូមិនល្អក្នុងសង្គម។
ទន្ទឹមនឹងនោះដែរលោកបានបន្ថែមថា គណបក្សសង្រ្គោះជាតិបានបណ្តុះយុវជនឱ្យចេះរួមគ្នាដើម្បីប្រយោជន៍ជាតិ និងប្រយោជន៍ផ្ទាល់ខ្លួនឯង។
គួរំលឹកថា តំណាងរាស្ត្រគណបក្សប្រឆាំងចំនួនពីររូបគឺលោក គង់ សភា និងលោក ញ៉យ ចំរើន ត្រូវបានអ្នកគាំទ្រគណបក្សប្រជាជនកម្ពុជា ព្រួតគ្នាវាយបណ្តាលឱ្យរងរបួសធ្ងន់ធ្ងរ កាលពីថ្ងៃទី ២៦ ខែតុលា ឆ្នាំ ២០១៥ នៅក្បែររបងរដ្ឋសភា៕