មេដឹកនាំគណបក្សប្រឆាំងដែលកំពុងស្នាក់នៅតែក្នុងស្នាក់ការបក្សដោយថាមកពីការភ័យខ្លាចនោះ បានបន្តអវត្តមាននៅក្នុងពេលបើកសម័យប្រជុំសភាពេញអង្គនៅថ្ងៃនេះ បើទោះជាមុនថ្ងៃបើកកិច្ចប្រជុំនេះ មានព័ត៌មានមួយចំនួនបង្ហើបថា លោក កឹម សុខា មានបំណងចូលប្រជុំសភាវិញបន្ទាប់ពីខកខានប្រមាណជាង៥ខែមកនោះ។
នៅពេលបើកសម័យប្រជុំសភានៅថ្ងៃអង្គារនេះ គេឃើញមានវត្តមានលោកនាយករដ្ឋមន្រ្តី ហ៊ុន សែន ចូលរួមផងដែរ ក្នុងនោះបើតាមបញ្ជីវត្តមាន គឺមានតំណាងរាស្ត្រគណបក្សប្រជាជនកម្ពុជាចំនួន៦៧រូបក្នុងចំណោម៦៨រូប ខណៈគណបក្សសង្រ្គោះជាតិបានចូលរួមតែ៣៩រូបលើ៥៥រូប ដោយមិនមានវត្តមានលោក កឹម សុខា និងលោក សម រង្ស៊ី នោះទេ។
កិច្ចប្រជុំរដ្ឋសភានៅថ្ងៃនេះ ផ្តោតសំខាន់លើលើសេចក្តីព្រាងច្បាប់ថវិកាជាតិសម្រាប់ការចាយវាយនៅឆ្នាំ២០១៧។
បើតាមសេចក្តីព្រាងច្បាប់ថវកាជាតិនោះ រដ្ឋាភិបាលកម្ពុជាគ្រោងចំណាយថវិកាជាតិជិតប្រាំពាន់លាន ( ៤.៩៨៣.៨១៦.៥៤០) ដុល្លារអាមេរិកនៅឆ្នាំ២០១៧ ក្នុងនោះក៏គ្រោងខ្ចីលុយបរទេសប្រមាណមួយពាន់លានដុល្លារទៀតផង។
បើទោះជាមិនបានចូលប្រជុំសភាក៏ដោយ តែលោក កឹម សុខា បានសរសេរនៅលើហ្វេសប៊ុករបស់លោកកាលពីម្សិលមិញថា៖ «ថវិកាជាតិប្រមាណ៥ពាន់លានដុល្លារសហរដ្ឋអាមេរិកក្នុងមួយឆ្នាំនេះ គឺជាថវិការបស់ប្រជាពលរដ្ឋខ្មែរទាំងអស់គ្នាជាម្ចាស់ មិនមែនជាថវិការបស់មេដឹកនាំណាឬគណបក្សនយោបាយណាមួយនោះទេ»។
លោកបន្តថា៖ «ប្រាក់កម្ចីពីគេមួយឆ្នាំប្រមាណ១ពាន់លានដុល្លារសហរដ្ឋអាមេរិកនោះ ប្រជាពលរដ្ឋខ្មែរទាំងអស់គ្នាជាអ្នកសង ជាពិសេសយុវជននិងក្មេងជំនាន់ក្រោយជាអ្នកសង មិនមែនជាបន្ទុករបស់អ្នកដឹកនាំរាជរដ្ឋាភិបាលឬគណបក្សនយោបាយកាន់អំណាចជាអ្នកត្រូវសងតែឯងនោះទេ»៕