ព្រះមហាក្សត្រកម្ពុជាគ្រោងយាងតាមរថភ្លើងជាលើកដំបូងទៅកាន់ខេត្តព្រះសីហនុ នៅពេលបុណ្យឆ្លងឆ្នាំសកល២០១៦នេះ។ នេះបើតាមរដ្ឋមន្រ្តីក្រសួងសាធារណការនិងដឹកជញ្ជូនដែលបានប្រាប់ប្រព័ន្ធផ្សាយមួយចំនួន។
លោករដ្ឋមន្រ្តី ស៊ុន ចាន់ថុល ឲ្យដឹងថា ព្រះមហាក្សត្រនិងសម្តេចម៉ែ គ្រោងយាងតាមរថភ្លើង ហើយមានការអមដំណើរដោយលោកនាយករដ្ឋមន្រ្តី ហ៊ុន សែន នៅថ្ងៃទី៣០ ខែធ្នូ និងយាងត្រឡប់មកវិញនៅថ្ងៃទី១ ខែមករា។
ផ្លូវរថភ្លើងពីភ្នំពេញទៅខេត្តព្រះសីហនុ ត្រូវបានសាងសង់ឡើងនៅក្នុងសម័យសង្គមរាស្រ្តនិយមរបស់សម្តេចព្រះនរោត្តម សីហនុ ហើយត្រូវផ្អាកដំណើរការនៅរយៈពេល៣០ឆ្នាំចុងក្រោយនេះ។
លោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់រដ្ឋាភិបាល ធ្លាប់បានធ្វើដំណើរជាលើកដំបូងតាមរថភ្លើង ពីភ្នំពេញទៅខេត្តព្រះសីហនុ កាលថ្ងៃទី៣០ ខែមេសា ឆ្នាំ២០១៦នេះ បន្ទាប់ពីផ្លូវដែកនេះត្រូវបានជួសជុលឲ្យដំណើរការឡើងវិញ៕
