អង្គការដែលធ្វើការទាក់ទងនឹងបរិស្ថានមួយយល់ថាការផ្តល់ថវិកាជាតិទៅកាន់ថ្នាក់មូលដ្ឋានមានកំរិតទាបជាហេតុធ្វើឲ្យអាជ្ញាធរមូលដ្ឋានមិនសូវយកចិត្តទុកដាក់ទៅលើកិច្ចការពារព្រៃឈើ។
ក្នុងវេទិកាសន្តិភាពស្តីពីមរតកធនធានធម្មជាតិកម្ពុជាសម្រាប់មនុស្សជំនាន់ក្រោយកាលពីថ្ងៃទី២៧ ធ្នូ ម្សិលមិញ ប្រធានគ្រប់គ្រងប្រចាំប្រទេសកម្ពុជានៃអង្គការ ហ្វូរ៉ូមស៊ីដ លោក ឃៀង សុជីវី បានថ្លែងប្រាប់អ្នកសារព័ត៌មានបន្ទាប់ពីបញ្ចប់កិច្ចពិភាក្សាថា កម្ពុជាបានទទួលស្គាល់ពីបញ្ហានិងបានកែសម្រួលវិធានការការពារបរិស្ថានមួយចំនួនរួចហើយ តែលោកថានៅមានបញ្ហាមួយចំនួនទៀតដែលការគាំពារបរិស្ថាននៅមានភាពខ្វះចន្លោះ។ លោកថាភាពខ្វះចន្លោះនោះកើតឡើងពីការមិនសូវយកចិត្តទុកដាក់ទៅលើកិច្ចគាំពារបរិស្ថាននៅថ្នាក់មូលដ្ឋាន ព្រោះតែថវិកាដែលបានទម្លាក់ពីថ្នាក់ជាតិទៅនៅមានកម្រិត ដែលធ្វើឲ្យអជ្ញាធរមូលដ្ឋានផ្តល់អទិភាពទៅលើសេវាផ្សេងៗជាងបរិស្ថាន។
លោកថា៖ «ឥឡូវនេះឃុំសង្កាត់មានថវិកាសម្រាប់អភិវឌ្ឍន៍នោះមានជាង១ម៉ឺនដុល្លារហើយ នៅក្នុងឃុំសង្កាត់ទូទាំងប្រទេស អញ្ចឹងមានថវិកាកើនឡើង សមត្ថភាពច្រើនប៉ុន្តែថវិកាទាំងអស់នេះ មិនគ្រប់គ្រាន់សម្រាប់ឆ្លើយទៅនឹងតម្រូវការនៅតាមបញ្ហានៅតាមសហគមន៍ជាច្រើនទេ ថវិកានេះមួយផ្នែកធំត្រូវបានយកទៅកសាងហេដ្ឋារចនាសម្ព័ន្ធមួយចំនួនជារូបវ័ន្ត ជាផ្លូវថ្នល់ ប៉ុន្តែឃុំសង្កាត់នីមួយៗយើងត្រូវការថវិកាជាច្រើនថែមទៀត ដើម្បីដោះស្រាយបញ្ហាសង្គម ឧទាហរណ៍គ្រឿងញៀន ទាក់ទងនឹងធនធានធម្មជាតិ ទាក់ទងនឹងវិស័យសុខាភិបាល ទឹកស្អាត អនាម័យជាច្រើនទៀត»។
បើតាមលោក សុជីវី ថវិកាដែលត្រូវទម្លាក់ទៅកាន់ថ្នាក់មូលដ្ឋានដើម្បីបង្កើនប្រសិទ្ធភាពនៃការងារ គឺយ៉ាងតិចណាស់ក៏៥ដងបន្ថែមទៀតលើថវិកាបច្ចុប្បន្ន។
តំណាងបណ្តាញសហគមន៍ព្រៃឡង់ខេត្តក្រចេះលោក ផៃ ប៊ុនលាង មានប្រសាសន៍ថាសហគមន៍លោកទទួលបានការគាំទ្រច្រើនពីខាងមន្ទីរបរិស្ថាន តែសម្រាប់អាជ្ញាធរមូលដ្ឋានលោកផ្ទាល់ គឺហាក់ដូចជាមិនសូវយកចិត្តទុកដាក់គាំទ្រលោកក្នុងការដំណើរនៃការការពារព្រៃឈើនោះទេ។
លោកថា៖ «អាជ្ញាធរគាត់ឆ្លើយថាចូលរួម ប៉ុន្តែសកម្មភាពគាត់ពុំបានចូលរួមជាមួយក្រុមអនុរក្សព្រៃឈើនោះទេ។ ក្រុមអនុរក្សនោះគឺក្រុមការពារព្រៃមកពីក្រសួងបរិស្ថានគឺយើងស្នើគាត់ពេលណា គឺគាត់ទៅជាមួយយើងពេលហ្នឹង។ … ខ្ញុំមិនដឹងដែរ តែការផ្សព្វផ្សាយរបស់យើងគឺមានហើយ តែដល់ពេលចូលរួមពេលទាក់ទងទៅគាត់(អជ្ញាធរឃុំ)ទៅគាត់ថារវល់»។
វីអូឌីមិនទាន់អាចទាក់ទងមន្ត្រីជាន់ខ្ពស់ណាម្នាក់នៃគណកម្មការជាតិសម្រាប់ការអភិវឌ្ឍតាមបែបប្រជាធិបតេយ្យនៅថា្នក់មូលដ្ឋានដើម្បីឆ្លើយតបទៅនឹងបញ្ហានេះបាននៅឡើយទេ។
តែទោះជាយ៉ាងណាកាលពីថ្ងៃទី២២ ខែសីហាកន្លងទៅ លោកនាយករដ្ឋមន្ត្រី ហ៊ុន សែន សម្រេចឲ្យមានការជួបប្រជុំរវាងរដ្ឋាភិបាលនិងអង្គការពាក់ព័ន្ធ៣ខែម្តង និងបានសម្រេចឲ្យមានជំនួបនេះជាមួយនាយករដ្ឋមន្ត្រីមួយឆ្នាំម្តងផងដែរ ដើម្បីប្រជុំដោះស្រាយទទួលយកសំណើរ និងបញ្ហានានាទាក់ទងនឹងកិច្ចការការពារបរិស្ថាននេះ។ លោកជំរុញឲ្យក្រសួងពាក់ព័ន្ធស្តាប់ពាក្យពិត៣ខែម្តង ជាជាងស្តាប់ពាក្យកុហក៥ឆ្នាំម្តង៕