លោកនាយករដ្ឋមន្ត្រី ហ៊ុន សែន បានប្ដេជ្ញារក្សាវប្បធម៌សន្ទនាជាមួយគណបក្សប្រឆាំង ខណៈដែលកិច្ចសន្ទនារវាងគណបក្សទាំងពីរដើម្បីឈានទៅដោះលែងក្រុមសកម្មជនសិទ្ធិមនុស្ស សកម្មជនដីធ្លី និងក្រុមសកម្មជននយោបាយដែលកំពុងជាប់ឃុំ កំពុងតែស្ថិតក្នុងភាពមិនច្បាស់លាស់នៅឡើយ។
ក្នុងពិធីរំលឹកថ្ងៃជ័យជម្នះ ៧មករា នៅឯទីស្នាក់ការកណ្ដាលគណបក្សប្រជាជនកម្ពុជា នៅព្រឹកថ្ងៃនេះ លោកនាយករដ្ឋមន្ត្រី ហ៊ុន សែន បានថ្លែងថា គណបក្សរបស់លោក បន្តអនុវត្តវប្បធម៌សន្ទនាជាមួយបក្សដែលមានអាសនៈនៅក្នុងសភា និងបង្កើនកិច្ចសហប្រតិបត្តិការជាមួយអង្គការសង្គមស៊ីវិល ដើម្បីដោះស្រាយសេចក្ដីត្រូវការរបស់ប្រជាជន។
លោកបញ្ជាក់ថា៖ “គណបក្សប្រជាជនកម្ពុជា បន្តអនុវត្តយ៉ាងស្មោះសរនូវវប្បធម៌សន្ទនាជាមួយជាមួយគណបក្សដែលមានអាសនៈក្នុងរដ្ឋសភា និងព្រឹទ្ធសភា តាមគោលការណ៍នៃលទ្ធិប្រជាធិបតេយ្យសេរី ពហុបក្ស និងនិតិរដ្ឋ។ ការមិនស្មោះត្រង់ការប្រើពាក្យសម្តីអសុរសវាយប្រហារគ្នា និងការញុះញង់បង្ក បញ្ឆេះឱ្យមានការគុំកួនចងកំហឹងនឹងគ្នា គឺមិនអាចរក្សាអាយុជីវិតនៃវប្បធម៌សន្ទនាបានឡើយ មិនតែប៉ុណ្ណោះវានឹងបំផ្លាញនូវឯកភាពជាតិរបស់យើង”។
ការថ្លែងដូច្នេះរបស់លោកនាយករដ្ឋមន្ត្រី ហ៊ុន សែន កើតឡើងចំពេលក្រុមសកម្មជនការពារសិទ្ធិមនុស្ស សកម្មជនដីធ្លី និងសកម្មជននយោបាយ នៅតែបន្តស្ថិតនៅក្រោមការឃុំខ្លួននៅឡើយ ខណៈដែលកិច្ចសន្ទនារដើម្បីឈានទៅដោះលែងអ្នកជាប់ឃុំទាំងនោះ បន្តស្ថិតក្នុងភាពមិនច្បាស់លាស់។
មន្ត្រីការពារសិទ្ធិមនុស្ស ៤រូបរបស់សមាគមការពារសិទ្ធិមនុស្សអាដហុក មន្ត្រីរៀបចំការបោះឆ្នោត លោក នី ចរិយា ត្រូវបានអាជ្ញាធរចាប់ឃុំខ្លួនកចាប់តាំងពីខែឧសភាឆ្នាំមុន ក្រោមការចោទថា បានសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី ពាក់ព័ន្ធនឹងសំណុំលោក កឹម សុខា ដែលគេទម្លាយថា មានទំនាក់ទំនងស្នេហាជាមួយ ខុម ចាន់តារាទី ហៅ ស្រីមុំ។
សកម្មជនសិទ្ធិមនុស្ស និងមន្ត្រីរៀបចំការបោះឆ្នោត ត្រូវបានគេរំពឹងថា អាចនឹងត្រូវដោះលែង បន្ទាប់ពីប្រធានស្ដីទីគណបក្សសង្គ្រោះជាតិ លោក កឹម សុខា បានជួបសន្ទនាជាមួយលោកនាយករដ្ឋមន្ត្រី ហ៊ុន សែន កាលពីដើមខែធ្នូឆ្នាំមុន ក្រោយទទួលបានការលើកលែងទោសពីព្រះមហាក្សត្រសម្ដេចព្រះ នរោត្ដម សីហមុនី។
ប៉ុន្តែ រហូតមកដល់ពេលនេះ ក្រុមមេដឹកនាំបក្សជាប់ឆ្នោតទាំងពីរ នៅមិនទាន់បានជួបប្រជុំគ្នាជាថ្មី ដើម្បីពិភាក្សាលើបញ្ហានានា ដែលគេគិតថា អាចមានបញ្ហាការដោះលែងសកម្មជនសិទ្ធិមនុស្ស មន្ត្រីរៀបចំការបោះឆ្នោត សកម្មជនដីធ្លី និងក្រុមសកម្មជននយោបាយបក្សប្រឆាំង៕