លោកនាយករដ្ឋមន្ត្រី ហ៊ុន សែន ត្រូវបានគេលើកឡើងថា លោកកំពុងតែរិះរកគ្រប់វិធីដើម្បីបំបែកថ្នាក់ដឹកនាំគណបក្សសង្គ្រោះជាតិ ដោយនៅពេលនេះលោកកំពុងតែបង្ខំឲ្យលោក កឹម សុខា សរសេរលិខិតមួយ ដោយសន្យាថានឹងបណ្តេញចេញពីគណបក្សសង្គ្រោះជាតិ ចំពោះបុគ្គលណាដែលបានជេរប្រមាថលោក ហ៊ុន សែន ភរិយាលោក និងកូនប្រុសច្បង គឺលោក ហ៊ុន ម៉ាណែត។ នេះបើតាមការចុះផ្សាយរបស់កាសែតភ្នំពេញប៉ុស្តិ៍ ដែលដកស្រង់ខ្លឹមសារលិខិតមួយពីលោក សម រង្ស៊ី។
សារនេះបានអះអាងថា កាលពីយប់ថ្ងៃសៅរ៍ លោក ហ៊ុន សែន បានស្នើឲ្យលោក កឹម សុខា ចេញសេចក្តីថ្លែងការណ៍ជាថ្មីទៀតក្នុងនាមគណបក្សសង្គ្រោះជាតិ ប៉ុន្តែមិនឲ្យប្រើឈ្មោះលោក សម រង្ស៊ី ដែលជាប្រធានគណបក្សដែលកំពុងតែនិរទេសខ្លួនឯងនៅក្រៅប្រទេសនោះឡើយ។
បើតាមសេចក្តីព្រាងសេចក្តីថ្លែងការណ៍ គឺគេចង់ឲ្យលោក កឹម សុខា ថ្កោលទោសយ៉ាងដាច់អហឹង្ការចំពោះជនណាដែលបានប្រមាថមកលើភរិយារបស់លោក ហ៊ុន សែន ថាជាស្រីរបស់អតីតមេដឹកនាំវៀតណាម លោក ឡេ ដឹកថ និងចោទ លោក ហ៊ុន ម៉ាណែត ថាជាកូនរបស់លោក ឡេ ដឹកថ។
សេចក្តីព្រាងនៃសេចក្តីថ្លែងការណ៍នេះបញ្ជាក់ថា៖ «ក្នុងករណីជនអគតិទាំងនេះជាសមាជិកគណបក្សសង្គ្រោះជាតិ គណបក្សមានសិទ្ធិបណ្តេញចេញពីបក្ស»។
កាសែតភ្នំពេញប៉ុស្តិ៍ បានផ្សាយថា បើតាមសារដែលផ្ញើចេញពីអ៊ីមែលរបស់លោក សម រង្ស៊ី នេះបានអះអាងទៀតថា តាមគម្រោងដែលលោក ហ៊ុន សែន នឹងជំរុញឲ្យថ្នាក់ដឹកនាំគណបក្សសង្គ្រោះជាតិ១ឬ២នាក់ ដែលគាត់ទិញបានឲ្យចេញមុខមួលបង្កាច់ លោក សម រង្ស៊ី ម្តងវិញថា លោក សម រង្ស៊ី ជាអ្នកបាននិយាយមួលបង្កាច់ក្រុមគ្រួសារលោក ហ៊ុន សែន។
ករណីនេះ អ្នកនាំពាក្យគណបក្សប្រជាជន លោក សុខ ឥសាន ចោទថាសេចក្តីថ្លែងការណ៍នោះ រៀបចំដោយលោក សម រង្ស៊ី ដោយលោកថា អ្នកនយោបាយរូបនេះកំពុងកើតរោគចិត្តនិងព្យាយាមភូតកុហកប្រជាពលរដ្ឋ៖ «វាជារឿងប្រឌិតរបស់លោក សម រង្ស៊ី ទេ យើងដឹងហើយ សម រង្ស៊ី អស់អីពីដៃ មានតែបញ្ហាបង្កើតរឿងភូតកុហក ដោយសារបោកប្រាស់ ដោយសារប្រឌិតរឿងថ្មីៗ ដើម្បីទាញអារម្មណ៍ប្រជាជនទូទៅឲ្យចាប់អារម្មណ៍មកលើគាត់ ចំពោះគាត់អស់រលីងហើយ ធ្វើនយោបាយប្រមាណ២០ផ្លាយឆ្នាំ អស់ពីដៃ ពីជើង អស់អីអាងទៀត»។
នៅពេលសួរថា តើខ្លឹមសារដែលកាសែតក្នុងស្រុកដកស្រង់នោះ ជាសម្តីរបស់លោក ហ៊ុន សែន ដែរឬយ៉ាងណា? លោក សុខ ឥសាន សុំមិនអត្ថាធប្បាយលើករណីនេះ។
ចំណែកតំណាងរាស្ត្រគណបក្សសង្រ្គោះជាតិ លោក អ៊េង ឆៃអ៊ាង ថាលោក សុំមិនអត្ថាធិប្បាយលើករណីនេះទេ។
កាលពីដើមខែធ្នូ សារឆ្លងឆ្លើយដែលគេជឿថាជាសាររបស់លោក ហ៊ុន សែន និង ធី សុវណ្ណថា មានខ្លឹមសារថា នាងបានទទួលលុយចំនួន៥០ម៉ឺនដុល្លារពីលោក ហ៊ុន សែន ដើម្បីបម្រើសកម្មភាពបំបែកបំបាក់គណបក្សសង្រ្គោះជាតិ៖ «ចៅបានទុក៥០ម៉ឺនរួចរាល់ហើយ ៣០ម៉ឺនដាក់ធនាគារ៣ និង២០ម៉ឺនដាក់ទូដែកទុកប្រើបន្ទាន់ រៀបចំកាំម៉ារ៉ាសុវត្ថិភាព ទ្វាសុវត្ថិភាព និងអង្គរក្សផ្ទាល់ខ្លួនរួចរាល់ហើយ»។
ពេលនោះឃើញសាររបស់លោក ហ៊ុន សែន ឆ្លើយថា៖ «ប្រសិនបើជាចៅត្រូវការយកទុនទុកក្នុងឲ្យហើយ តានឹងបញ្ជូនបន្ថែម ៦០០ ០០០$ទៀត»។
ក្នុងសារបន្តទៀតលោក ហ៊ុន សែន បានប្រាប់ឲ្យ ធី សុវណ្ណថា ឲ្យធ្វើបាតុកម្មដូរមេបក្សប្រឆាំងដោយថា៖ «ធ្វើមុន២០១៨ល្អ។ ចៅរៀបចំកម្លាំងដូរមេបក្ស។ រង្ស៊ី តាទប់មិនឲ្យចូល ចៅចាត់ការ កឹម សុខា បាតុកម្មរាល់ថ្ងៃ បើដូរមេបក្សមិនបាន ត្រូវបក្សជា២។ តាធានាចិញ្ចឹមបាតុកម្មរបស់ក្រុមចៅ»។
បើតាមសារឆ្លងឆ្លើយនោះ ធី សុវណ្ណថា សរសេរថាខ្លួនទទួលយកផែនការនេះ ដោយថានឹងធ្វើបាតុកម្មបិទស្នាក់បក្សប្រឆាំងនៅខែមករាឆ្នាំ២០១៨ ឲ្យរើសប្រធានបក្សថ្មី ហើយលោក ហ៊ុន សែន សន្យាថា៖ «តាបំរ៉ុងហិរញ្ញវត្ថុបម្រើឲ្យការងារចៅ»៕