ជំនួបបក្សប្រឆាំងនិងបក្សកាន់អំណាចដែលគ្រោងនឹងធ្វើឡើងនៅសប្តាហ៍ក្រោយត្រូវបានបានលើកពេលវិញ បន្ទាប់ពីលោក ហ៊ុន សែន ប្រកាសពីក្រៅប្រទេសមកថា លោកលែងចង់ជួបចរចាគ្នាជាមួយបក្សប្រឆាំងទៀតហើយ។
នៅក្នុងលិខិតមួយចុះថ្ងៃទី១៦ ខែមករា ឆ្នាំ២០១៧ អ្នកនាំពាក្យក្រសួងមហាផ្ទៃ លោក ខៀវ សុភ័គ បានឲ្យដឹងថា ប្រធានក្រុមតំណាងរាស្ត្រគណបក្សប្រជាជនកម្ពុជា លោក ស ខេង គ្រោងនឹងជួបជាមួយប្រធានក្រុមតំណាងរាស្ត្រគណបក្សសង្គ្រោះជាតិ លោក កឹម សុខា នៅព្រឹកថ្ងៃទី២៥ ខែមករា នៅឯវិមានរដ្ឋសភា។
ប៉ុន្តែក្នុងលិខិតមួយទៀតចេញនៅថ្ងៃនេះ លោក ខៀវ សុភ័គ បានបញ្ជាក់ឡើងវិញថា គម្រោងជំនួបនោះ ត្រូវបានពន្យារពេលទៅថ្ងៃក្រោយវិញ។ លោក ខៀវ សុភ័គ មិនបានបញ្ជាក់ពីមូលហេតុនៃការលុបចោលនេះទេ ប៉ុន្តែជំនួបនេះត្រូវបានលុបចោលមួយថ្ងៃក្រោយពីលោកនាយករដ្ឋមន្ត្រី ហ៊ុន សែន គំរាមលុបចោលតួនាទីលោក កឹម សុខា ពីប្រធានក្រុមតំណាងរាស្ត្រភាគតិចនៅក្នុងសភាដែលមានឋានៈស្មើនាយករដ្ឋមន្រ្តី។
វីអូឌីមិនអាចទាក់ទងអ្នកនាំពាក្យក្រសួងមហាផ្ទៃនិងជានាយកខុទ្ទកាល័យលោក ស ខេង លោកឧត្តមសនីយ៍ខៀវ សុភ័គ បានទេដោយទូរសព្ទលោកចុចមិនចូល។ តែលោកបានថ្លែងប្រាប់សារព័ត៌មានដែលគាំទ្ររដ្ឋាភិបាលមួយថា ការពន្យារពេលនៃការជួបគ្នារវាងលោក ស ខេង និងលោក កឹម សុខា នេះថា ដោយសាររង់ចាំរដ្ឋសភាធ្វើវិសោធនកម្មបទបញ្ជាផ្ទៃក្នុងសភាមាត្រា៤៨ថ្មី (បី) សិន។
អ្នកនាំពាក្យរដ្ឋសភាលោក ឡេង ប៉េងឡុង បានឲ្យវីអូឌីដឹងថា ការធ្វើវិសោធនកម្មបទបញ្ជាផ្ទៃក្នុងសភាលោកថាសភាមិនទាន់ទទួលបានសំណើណាមួយជាផ្លូវការពីបក្សប្រជាជននៅឡើយទេ។
លោកថា៖ «ខ្ញុំមិនទាន់ទទួលបានសំណើជាផ្លូវការណាមួយទេ។ ដូច្នេះខ្ញុំមិនអាចឆ្លើយបានយ៉ាងម៉េចនោះទេ»។
វីអូឌីមិនអាចទាក់ទងមន្ត្រីជាន់ខ្ពស់ណាមួយរបស់បក្សប្រឆាំងដើម្បីឆ្លើយតបទៅនឹងការពន្យារពេលនេះបានទេនៅរសៀលថ្ងៃទី១៧នេះ។
ការលុបចោលជំនួបនេះបានជំរុញឲ្យក្ដីរំពឹងនៃការដោះលែងសកម្មជនសិទ្ធិមនុស្ស មន្ត្រីរៀបចំការបោះឆ្នោត និងសកម្មជនដទៃទៀត ស្ថិតនៅកាន់តែឆ្ងាយ។
សាស្ត្រាចារ្យវិទ្យាសាស្ត្រនយោបាយលោក សូ ចន្ថា យល់ថា ការព្រមជួបនិងពន្យារវិញនេះវាបានបង្ហាញពីឥទ្ធិពលរបស់លោក ហ៊ុន សែន តែម្នាក់ដែលបានជះឥទ្ធិពលដល់បក្សទាំងមូលក្នុងការសម្រេចណាមួយ លោកថាសកម្មភាពបែបនេះវាបានធ្វើឲ្យតម្លៃរបស់ស្ថាប័នជាតិធ្លាក់ចុះ ហើយរឹតតែធ្វើឲ្យស្ថានភាពនយោបាយនៅកម្ពុជាមិនអាចត្រលប់ទៅរកភាពប្រក្រតីឡើងវិញនោះទេ។
លោកថា៖ «ជាការពិតការសម្រេចពន្យារពេលនោះគឺឥទ្ធិពលដែលធំបំផុតនោះគឺការលើកឡើងរបស់លោក ហ៊ុន សែន នៅក្រៅប្រទេសពីការចង់ឲ្យមានការស្នើឲ្យមានការធ្វើវិសោធនកម្មបទបញ្ជាផ្ទៃក្នុង ហើយលុបចោលក្រុមភាគតិចនិងក្រុមភាគច្រើននៅក្នុងសភានោះ»។
លោកថាប្រសិនជានៅតែពន្យារការចរចាឬលុបចោលមតិសម្លេងភាគតិចនៅក្នុងសភាចោលនោះ ក្តីសង្ឃឹមរបស់មន្ត្រីអង្គការសង្គមស៊ីវិលនិងអ្នកទាំងប៉ុន្មានដែលកំពុងជាប់ពន្ធនាគារនោះកាន់តែតិចទៅៗ ហើយកម្តៅនយោបាយរបស់កម្ពុជានឹងកើនឡើងវិញ។
អ្នកតាមដានពីការអភិវឌ្ឍសង្គមនិងនយោបាយលោក គឹម សុខ បានប្រាប់វីអូឌីកាលពីម្សិលមិញថា ចេតនារបស់លោក ហ៊ុន សែន នេះគឺកំពុងតែដាក់សម្ពោធទៅដល់បក្សប្រឆាំងក្នុងការជម្រុញឲ្យបក្សនេះយល់ព្រមធ្វើអ្វីមួយដែលជាការចរចាកាលពីលើកមុន។ លោកថាប្រសិនជាគណបក្សប្រជាជនសម្រេចបញ្ចប់វប្បធម៌សន្ទនាជាមួយបក្សប្រឆាំងពិតមែននោះ សម្ពោធនយោបាយនឹងកាន់តែធ្ងន់ធ្ងរ អាចឈានដល់ការចាប់ខ្លួនមន្ត្រីបក្សប្រឆាំងនិងមនុស្សមួយចំនួនដែលកំពុងជាប់បណ្តឹងនៅតុលាការផងដែរ។
លោកថា៖ «ក្រឡាថ្មីវាគ្មានអីក្រៅពីការបង្កើតសម្ពោធថែមទៀតទេ! ដើម្បីជាន់កគណបក្សសង្គ្រោះជាតិហ្នឹងឲ្យដល់កម្រិតនៃការឈឹចាប់ រហូតដល់ថ្នាក់ពេលខ្លះពិបាកទ្រាំ តែយ៉ាងណាក៏ដោយខ្ញុំគិតថាគណបក្សសង្គ្រោះជាតិប្រកដជាទ្រាំ។ … ល្បិចកលនយោបាយបែបណាទៀតនឹងពិបាកស្មាន ថាគាត់ហ្នឹងបង្កើតបែបណា តែអ្វីៗវាស្ថិតក្នុងក្របខ័ណ្ឌមួយដែលយើងធ្លាប់មើលឃើញកន្លងមកហើយ គឺ គ្មានអ្វីក្រៅពីបំភ្លៃច្បាប់ ចោទប្រកាន់ គម្រាមកំហែង ដាក់ខ្នោះ រហូតទៅដល់ដាក់គុក និងជិវិតអញ្ចឹងទៅ»។
គួរបញ្ជាក់ផងដែរថា បន្ទាប់ពីអវត្តមានពីក្នុងប្រទេសជាង២ឆ្នាំនិងជាប់បណ្តឹងផ្សេងៗនោះ តំណែងរបស់លោក សម រង្ស៊ី ជាប្រធានក្រុមភាគតិចនៅក្នុងសភាមានឋានៈស្មើនាយករដ្ឋមន្ត្រី ត្រូវធ្លាក់ទៅលើ លោក កឹម សុខា ដែលទើបតែត្រូវបានលោក ហ៊ុន សែន ស្នើដល់ព្រះមហាក្សត្រក្នុងការលើកលែងទោសកាលពីចុងឆ្នាំ២០១៦។ ប្រសិនបើបក្សកាន់អំណាចសម្រេចវិសោធនកម្មបទបញ្ជាផ្ទៃក្នុងសភាមាត្រា៤៨ថ្មី នោះគឺ លោក កឹម សុខា នឹងត្រូវបាត់បង់តួនាទីប្រធានក្រុមភាគតិចនៅក្នុងសភា មានឋានៈស្មើនាយករដ្ឋមន្ត្រី៕
