ប្រមុខរាជរដ្ឋាភិបាលកម្ពុជា សម្រេចបំពាក់មេដាយឲ្យទាហ៊ានវៀតណាមជាច្រើននាក់ទៀត ដោយថាពួកគេបានជួយបំពាក់បំប៉ន និងបណ្ដុះបណ្ដាលកងយោធាកម្ពុជាកាលពីកន្លងមក។
យោងតាមអនុក្រឹត្យចុះថ្ងៃទី១៣ធ្នូឆ្នាំ២០១៦ ឲ្យដឹងថា បន្ទាប់ពីទទួលបានសំណើមួយរបស់រដ្ឋមន្ដ្រីក្រសួងការពារជាតិលោក ទៀ បាញ់ លោកនាយករដ្ឋមន្ដ្រី ហ៊ុន សែន បានយល់ព្រមចុះហត្ថលេខាបំពាក់មេដាយសហមេត្រីថ្នាក់ធិបឌិន្ទចំនួន៣គ្រឿង និងថ្នាក់សេនាចំនួន២៤គ្រឿង ដល់នាយទាហាននៃកងទ័ពប្រជាជនវៀតណាមចំនួន២៧នាក់។
រដ្ឋាភិបាលបានបញ្ជាក់នៅក្នុងអនុក្រឹត្យថា ការសម្រេចបំពាក់មេដាយទាំងនេះ គឺដោយសារមន្ត្រីយោធាវៀតណាមទាំង២៧នាក់ «មានស្នាដៃល្អក្នុងកិច្ចសហប្រតិបត្តិការជួយបណ្តុះបណ្តាល និងបំប៉នជំនាញផ្សេងៗដល់នាយទាហាន និងនាយទាហានរងនៃកងយោធពលខេមរភូមិន្ទកន្លងមក»។
VOD មិនអាចទាក់ទងអ្នកនាំពាក្យក្រសួងការពារជាតិលោក ឈុំ សុជាតិ ដើម្បីសុំការអត្ថាធិប្បាយបន្ថែមបានទេ ជុំវិញការបំពាក់មេដាយឲ្យយោធាវៀតណាមជិត៣០នាក់នេះ ខណៈមជ្ឈដ្ឋានទូទៅបានដាក់ការសង្ស័យនិងចោទជាសំនួរថា «រដ្ឋាភិបាលកម្ពុជា ហាក់ដឹងគុណខ្លាំង និងផ្តល់កិត្តិយសញឹកញយឲ្យមន្ត្រីយោធាប្រទេសមិត្តជិតខាង»។
កាលពីឆ្នាំ២០១៦ កន្លងទៅ រាជរដ្ឋាភិបាលក៏បានសម្រេចបំពាក់មេដាយសហមេត្រីថ្នាក់មហាសេរីវឌ្ឍន៍ថ្នាក់មហាសេនា និងថ្នាក់ធិបឌិន្ទ ដល់នាយទាហ៊ានវៀតណាម ចំនួន៣៣នាក់ ដោយរដ្ឋាភិបាលថា ពួកគេធ្លាប់មាន «ស្នាដៃផ្សេងៗ»៕